Аҧсны Аҳәынҭқарра Ахада

 

Ахада 2021ш. аԥсшьара аамҭа аҽазыҟаҵара инамаданы инарҭбааны аилатәара мҩаԥигеит

08.05.2021

Ахада 2021ш. аԥсшьара аамҭа аҽазыҟаҵара инамаданы инарҭбааны аилатәара мҩаԥигеит

Аизара аартуа, аҳәынҭқарра Ахада иазгәеиҭеит ари ашықәс азы  аԥсшьаҩцәа рацәаҩны иаҳҭаар шауа. «Ҳарҭ аҭагылазаашьа бзиа аԥаҳҵароуп Аԥсны зыԥсы зшьаз ҩаԥхьа аарахь ааразы агәаҳәара роурц азы», - иҳәеит Бжьаниа.  

Аԥсшьара аамҭазы аҽазыҟаҵаратә усқәа шымҩаԥысуа ртәы иажәахә аҿы дазааҭгылеит Ҭемраз Хышба.

Аԥхынтәи аԥсшьара аамҭазы ауаажәларратә зинтә леишәа ахьчаразы иҷыдоу ауснагӡатәқәа ртәы дазааҭгылеит Аҩныҵҟатәи аусқәа рминистр Дмитри Дбар.
Аҭагылазаашьа ҷыдақәа рзы аминистр Лев Кәыҵниа аԥсшьара аамҭа аҽазыҟаҵара иазку русуразы аинформациа риҭеит.

Агәабзиарахьчара аминистр Ҭамаз Ҵахнакиа иажәахә аҟны дазааҭгылеит атәылаҟны иҟоу аепидимиологиатә ҭагылазаашьеи 2021 ш. аԥхынтәи аԥсшьара аамҭазы короновирустә ҿкычымазара иаҿагыланы ақәԥаразы  имҩаԥырго ауснагӡатәқәа ртәы.

Аизараҟны иара убас дықәгылеит асанитартә ҳақьым хада Лиудмила Скорик. Уи далацәажәеит аԥсшьара аамҭазы ауаа рхыԥхьаӡара зларацәахо ала, ауаа реимадара иаҳа излазҳауа ала, коронивирустә ҿкычымазара аҿагыларазы агәҽанҵаратә уснагӡатәқәа ртәы.

Аҳәынҭқарра Ахада асанитартә ҳақьым хада длазҵааит аԥсшьаҩцәа рынхарҭа ҭыԥқәа рыҟны асанитартә ҭахрақәа хылаԥшра рызҭо азы. Скорик излалҳәаз ала, асасааирҭақәа рнапхгаҩцәа рхаҭақәа ахылаԥшлароуп 2020ш.рзы Урысхархәарахылаԥшреи дареи иаздырхаиз аинструкциа ақәныҟәарала асанитартә-епидемеологиатә ҭахрақәа рынагӡара. Ахада иазгәеиҭеит анормақәа зегьы рықәныҟәара шымҩаԥысуа азы атуризм аминистрра аҭакԥхықәра шаду.    

Аԥхынтәи аԥсшьара аамҭазы Аԥсны Аҳәынҭқарра Ашәарҭадаратә маҵзура Аҳәаахьчаратә отриад аусура иазкыз адырра ҟаиҵеит Аҳәынҭқарратә шәарҭадаратә маҵзура ахантәаҩы ихаҭыԥуаҩ - Аԥсны Аҳәынҭқарра Ашәарҭадаратә маҵзура Аҳәаахьчаратә отриад аиҳабы Рустам Латипов.

Аԥсшьара аамҭа аҽазыҟаҵаратә усурақәа ирызкны Аиҳабыра реилазаара злахәны имҩаԥысыз инарҭбааз аилатәараҟны ашәахтәқәеи аизгақәеи рминистр ин. н. Мераб Логәуа 2019ш., 2020ш. рзы аусбарҭа аҳасабырба дазааҭгылеит.

Аҟәатәи, Гагратәи, Гәдоуҭатәи администрациақәа рхадацәа Беслан Ешба, Иури Хагәышь, Баграт Боџьгәуа иазгәарҭеит гәацԥыҳәарала аԥсшьара аамҭа аҽазыҟаҵара ишаҿу, иагьалацәажәеит имҩаԥыргаз аусурақәа ртәы.  

Алкаақәа ҟаҵо, Ахада иҳәеит: «Ҳарҭ зегьы агәыӷра ҳамоуп аԥсшьара аамҭазы асасцәа рхыԥхьаӡара рацәахоит ҳәа. Аусбарҭақәа ахьынӡазыхио, сара сызлахәаԥшуа ала, уажәазы хар амам, аха уи аҟны ҳаангылар ҟалаӡом», - иҳәеит Аслан Бжьаниа.

Иара убас, Аҳәынҭқарратә автоинспекциеи Адәныҟатәи аусқәа рминистрреи  рахь адҵа ҟаиҵеит автотуристцәа рахь азҿлымҳара ҷыда аадырԥшларц.
«Аҭагылазаашьа бзиа рзаԥҵатәуп, амҩаҿы раанкылара аҵаҵӷәы амазароуп, аматериал ыҟазароуп уи азы ма аилагара ӷәӷәақәа ҟарҵазар. Егьырҭ аҭагылазаашьақәа рҿы, ус баша адокументқәа ҳрыхәаԥшуеит ҳәа автотуристцәа рыргәамҵра аҭахым. Аԥсшьаҩцәа ибзиоу агәаанагара роуроуп. Иара убас амҩатә инфраструктура иацхраатәуп ишахәҭоу иҟазарц азы»,-иҳәеит Ахада.



Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org