Аҧсны Аҳәынҭқарра Ахада

 

Ахада Аҩадатәи Кавказ хатәгәаԥхаралатәи аибашьцәа-аветеранцәа рымадара азҵаарақәа рзы Иабжьгаҩ Рисмаг Аџьынџьал дидикылеит

13.04.2021

Аԥсны Аҳәынҭқарра Ахада Аслан Бжьаниа  Аҩадатәи Кавказ хатәгәаԥхаралатәи аибашьцәа-аветеранцәа рымадара азҵаарақәа рзы Иабжьгаҩ Рисмаг Аџьынџьал  иҟаиҵаз аҳасабырба идикылеит .

Р. Аџьынџьал Ахада инапынҵала Маиҟәаԥ, Нальчик, Владикавказ ақалақьқәа рыҟны иаамҭаӡамкәа зыԥсҭазаара иалҵыз аибашьцәа рҭаацәа дырҭааит, Аԥсны Аҳәынҭқарра анапхгара ахьӡала адышшылара ҟаиҵеит, афинанстә цхыраарагьы риҭеит.  

Аслан Бжьаниа аҳасабырба аматериалқәа дрыхәаԥшны иазгәеиҭеит, визитк аҳәаа иҭагӡаны ареспубликақәа зегьы рымҽхакра залымшазаргьы, Иабжьгаҩ Аҩадатәи Кавказҟа ушьҭантәи ивизит аан хымԥада Ҟарачы-Черқьестәи Ареспубликеи, Аладатәи Уаԥстәыла Ареспубликеи, егьырҭ ареспубликақәеи дырҭаароуп ҳәа.  

Нальчик  ақалақь аҟны имҩаԥысит ҞБА зҽаԥсазтәыз аҭҵаарадырра аусзуҩы, аҭоурыхтә ҭҵаарадыррақәа рдоктор Барасби Хачим-иԥа Бгажноков игәалашәаратә хәылԥазы. Ахәылԥаз аҟны Р. Аџьынџьал Аԥсны Ахада ихьӡала Бгажнокаа рҭаацәа дрыдышшылеит, Б. Бгажноков иашьа гәакьа ииркит Барасби Хачим –иԥа ианашьаз «Ахьӡ-Аԥша» аорден II аҩаӡара.  

Ари аиԥылараҟны Ахада Аҩадатәи Кавказ ареспубликақәеи Аԥсны Аҳәынҭқарреи реимадара аԥхьаҟагьы арӷәӷәара шаҭаху азгәеиҭеит.  


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org