Аҧсны Аҳәынҭқарра Ахада

 

Ахада И. Гь. Папасқьыр ихьӡ зху Амилаҭтә библиотека 100 шықәса ахыҵра инамаданы адныҳәалара ҟаиҵеит

29.03.2021

Аԥсны Аҳәынҭқарра Ахада Аслан Бжьаниа И. Гь. Папасқьыр ихьӡ зху Амилаҭтә библиотека 100 шықәса ахыҵра инамаданы адныҳәалара ҟаиҵеит.

Адныҳәаларатә текст аҟны иҳәоуп:

"Ҳаҭыр зқәу Аҧсны Амилаҭтә библиотека аусзуҩцәа!

Гәык-ҧсык ала ишәыдысныҳәалоит И. Гь. Папасқьыр ихьӡ зху Амилаҭтә библиотека 100 шықәса ахыҵра. Ари хҭыс дууп ҳажәлар зегь рзы. Амилаҭтә библоитека ҳажәлар гәадурас ирымоу акультуратә хәышҭаарақәа ираукуп. Иара иамоуп аҭоурых ду.  

Иаартын Аҧсны асовет мчра анышьақәгыла 1921 шықәса хәажәкырамзазы. Уи иаҳәоит Аҧсуа ҳәынҭқарра еиҭашьақәзыргылаз анапхгаҩцәа ажәлар аҵарадырра рыларҵәара аус зегь раҧхьа ишдыргылоз.

Амилаҭтә библиотека иааӡеит ҳҳәар ҳалшоит ҳмилаҭә литература ӡырызгоз ҳашәҟәыҩҩцәа хьӡырҳәагақәа, ҳҵарауаа дуқәа.

Иахьа аелектронтә мыругақәа аҧыжәара анрымоу аамҭазы, ашәҟәыҧхьарҭақәагьы аусура азнеишьа рыҧсахуеит. Агәра ганы сыҟоуп шәара ҳаамҭа иақәшәо аҿыцрақәа ралагалараҿы ақәҿиарақәа раарҧшра шшәылшо.

Иҭабуп ҳәа шәасҳәоит иуадаҩыз аибашьра ашьҭахьтәи аамҭақәа рзы шәгәы камыжькәа, ауадаҩрақәа шәыриааины, ҳмилаҭтә культура ахәышҭаара ду аиқәырхара ахьшәылшаз.

Иахьатәи аныҳәа аҽны ишәзеиҕьасшьоит агәабзиара, аманшәалара, шәнапы злаку иҧшьоу аус аҿы аихьӡарақәа".


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org