Аҧсны Аҳәынҭқарра Ахада

 

Ахада Аҳәса рымш азы адныҳәалара ҟаиҵеит

08.03.2021

Аԥсны Аҳәынҭқарра Ахада Аслан Бжьаниа Аҳәса рымш азы адныҳәалара ҟаиҵеит.

"Акыр иаԥсоу анацәа, андуцәа, ҳаҳәшьцәа!

Ишәыдысныҳәалоит игәырӷьахәу ааԥын ныҳәа – Жәларбжьаратәи аҳәса рымш!

Аԥсуа уаажәларраҟны аамҭақәа зегьы раан аԥҳәыс аҭыԥ ҷыда аанылкылон, аԥшӡара, аҟәыӷара, аразра дахаҿырбаганы дыҟан. Уи атәы рҳәоит ижәытәӡатәу ҳлегендақәеи ҳҳәамҭақәеи.

Аԥҳәыс лыжәҩахыр иқәуп ахәышҭаара аиҿкаара, аиқәырхара, ахшара рааӡара, аҭаацәа еилымшәарада аидкылара. Аԥсабара шәара ишәнаҭеит аԥшӡареиԥш, ахаара, нҵәара зқәум ачҳара.

Аԥсҭазаараҟны иарӷьажәҩаны иҳадгылоу, акыр иаҳзаԥсоу ҳанацәа, ҳаҳәшьцәа, иҭабуп ҳәа шәасҳәоит иҳашәҭо адгыларазы.

Ҷыдала ари аныҳәа аҽны срыдныҳәаларц сҭахуп Аԥсадгьыл ахьчаҩцәа-гәымшәақәа зааӡаз анацәа. Схырхәоит шәара шәфырхаҵареи шәычҳареи рҿаԥхьа.  

Абри ааԥын ныҳәа ссир азы ишәзеиӷьасшьар сҭахуп агәабзиара, анасыԥ, аразҟы бзиа, аҭынчра, аизҳазыӷьара! "



Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org