Ахада Аҟəа иҟаз урыстəылатəи арратə хәышәтәырҭа ахатəы еилазаара аџьшьара риҭеит

Ахада Аҟəа иҟаз урыстəылатəи арратə хәышәтәырҭа ахатəы еилазаара аџьшьара риҭеит

Аҧсны Аҳәынҭқарра Ахада Аслан Бжьаниа Урыстəылатəи Афедерациа Атəылахьчара аминистрра хырхарҭарацәалатәи амобилтə хəышəтəырҭа аиҳабы Абдулмеџьид Магомедов, ихаҭыҧуаҩ Ренат Курбанов идикылеит Аҧсны имҩаҧыргоз русура ахыркəшара инамаданы.

Аҧсны жəлар рыхьӡала аҳəынҭқарра Ахада иҭабуп ҳəа реиҳəеит урыстəылатəи арратə хәышәтәырҭа ахатəы еилазаара еиҳа ианыуадаҩыз аамҭазы аҿкычымазара Ковид-19 иаҿагыланы ақəҧаразы имҩаҧыргаз ацхырааразы.
  
«Сара хымҧада агəра згоит, шəара аџьатә фырхаҵара аашәырԥшит ҳәа, ари Аҧсны жəлар ргəалашəараҿы наунагӡа ишаанхо. Избан акәзар, шəара ацхыраара ҟашəҵеит еиҳа ианаҭахыз аамҭазы. Астатистика азгәаумҭар ҟалом. Шəара напхгара зышəҭоз ахәшәтәырҭаҟны ихəышəтəын шəҩыла ҳтəылауаа. Арҭқəа зегьы Аҧсни Урыстəылеи ажəларқәа еиҳагьы реизааигəахара  иацхраауеит.

Аҳәара ҟасҵоит арратә хәышәтәырҭа хаҭалатәи аилазаара аџьшьара ҳазрышәҭарц. Ҳарҭ еснагь сасцəа дахьқəак раҳасабала шəбара ҳаигәырӷьоит.  Иҭабуп даара. Агəабзиара, анасыҧ шәзеиӷьасшьоит».

Урыстəылатəи Афедерациа хырхарҭарацәалатәи амобилтə хəышəтəырҭа аиҳабы Абдулмеџьид Магомедов Аҧсны Ахадеи атəыла анапхгара зегьи иҭабуп ҳəа реиҳəеит урыстəылатəи аҳақьымцəа русура анагӡаразы аҭагылазаашьа бзиақəа ахьаҧҵаз азы. Магомедов иажəақəа рыла, ицəырҵуаз азҵаарақəа зегьы иаарласны аӡбара алыршан аиҳабыреи, атəылахьчареи агəабзиарахьчареи рминистррақəа ирыбзоураны.

Аҧсны Ахада Аслан Бжьаниа ианаамҭаз аҿкычымазара Ковид-19 иаҿагыланы ақəҧаразы иҟарҵаз ацхыраареи, рыпрофессионализм ҳараки, рхамеигӡареи, аепидемиологиатə ҭагылазаашьа аҭышəынтəалараҟны рлагаламҭеи  рзы Урыстəылатəи Афедерациа Атəылахьчара аминистрра хырхарҭарацәалатәи амобилтə хəышəтəырҭа ахатəы еилазаара аџьшьара риҭеит.

Аҧсны Ахада Абдулмеџьид Магомедови Ренат Курбанови агəаларшəагатə ҳамҭақəа ранеишьеит.


Возврат к списку