Аҧсны Аҳәынҭқарра Ахада

Аԥсны Аҳәынҭқарра Ахада Аслан Бжьаниа ажьырныҳәамза 27 рзы Аԥснытәи ателерадиоеилахәыра Адиректор хада И.Агрԥҳа данлыҿцәажәоз ирылацәажәеит иара убас ареспублика аекономикеи аинвестициақәеи рызҵаара.
  
Аслан Бжьаниа иажәақәа рыла, 2020 шықәсазы иазԥхьагәаҭаз ареспублика абиуџьет короновирус апандемиа иаҿагылаз ауснагӡатәқәа ирыхҟьаны анагӡара 1 млрд мааҭк аҟынӡа агхеит. Уи адагьы абиуџьет иахыхтәхеит даҽа 300 млн мааҭ инареиҳаны.  
  
  «Атәыла 100 млн.мааҭ алагаланы ацхыраара ду ҟарҵеит абизнесуаа, ҳара ҳдиаспора, жәларбжьаратәи аиҿкаарақәа. Ҳазҭагылаз аамҭа уадаҩ иахҟьаны ҳарҭ ааԥхьара ҟаҳҵар акәхеит  Урыстәылатәи Афедерациа Ахада иахь ацхыраара ҳаҳәеит, уи инақәыршәаны апрограмма иҳадыргалаз ала  Аԥсныҟа иаашьҭын 1, 2 млрд.мааҭ  аекономикатә проектқәа рынагӡаразы.  

  Урыстәылатәи Афедерациа Ахада иҟаиҵаз адҵала, ашәҟәы ҳзааит ацхыраара аҭара ишазыхиоу ала, аха уи азы ԥасатәи аинвестициатә программа хыркәшазароуп.
Ҳарҭ обиектқәак рыҟны аусура рхыркәшара ҳаҿуп апрограмма ҿыц ахацыркразы»,-ҳәа азгәеиҭеит Бжьаниа.

Ахада иара убас иҳәеит, апандемиа иахҟьаны адунеи аҟны иҟалаз аекономикатә уадаҩрақәа ириааины аекономика ашьҭыхра рыҽшазыршәо.
«Аинвесторцәа радыԥхьаларазы аусурақәа ирыцҵоуп, уи азы аҿырԥшы бзиақәа ыҟоуп. Иаҳҳәап, Тамшь ақыҭан зыргылара иаҿу аԥсшьарҭатә хыбра, аинвестпроект инақәыршәаны Гал араион аҟны ашьхарыжь Ахада ааӡаразы. Аслан Бжьаниа иазгәеиҭеит, Урыстәылатәи Афедерациа Ахада Владимир Путини иареи реиԥылараҿы ишышьҭыхыз азҵаарақәа жәпакы Аҟәатәи аҳаиртә баӷәаза аргылара иадҳәалаз, уи аус ауроуп 2024шықәса иахымгакәа.

Убри азы Аԥсныҟа изныкымкәа иаахьеит Урыстәылатәи атранспорт аминистрра аспециалистцәа, иара убас аинвесторцәа. Аҳаиртә  баӷәаза шьақәыргылахар, уа аус рурц рылшоит 1000-ҩык инарзынаԥшуа ауаа.

Анаҩстәи Аԥсны газла аиқәыршәара апроект, афымцамч ашәарҭадара иадҳәалоуп, афымцамч азы ацхыраагӡатә альтернативатә ҟазшьа амоуп. Ари ахырхарҭала аиҿцәажәарақәа мҩаԥысхьеит, иахәҭоу адҵақәагьы рыҭоуп.

Урыстәылатәи ҳколлегацәа 80 млн. мааҭ рҟынӡа рыԥшаахьеит Аԥсны Аҳәынҭқарра газла аиқәыршәара аплан –апроект аус адуларазы. 2021ш. иахымгакәа ҳауаажәлар ари зымҽхак ҭбаау апроект аҿҳәара рылаҳәахоит.

«Атәыла агазла аиқәыршәара афымцамчы аусура акыр иацхраауеит. Ҩнаҭацыԥхьаӡа иҟалоит агаз, афымцамчы аасҭа зыхә акыр еиҵоу. Ари апроект азы исҳәо ҳтәылауаа ԥыҭҩык лакәҵас ирыдыркылар ҟалоит, аха  ишәгәаласыршәарц сҭахуп, Аԥсны агаз шыҟаз. Ҳарҭ иҿыцу ҳәа акагь ҟаҳҵаӡом, анкьа зны иҟаз еиҭашьақәҳаргылрц ҳҭахуп».