Аҧсны Аҳәынҭқарра Ахада

Аԥсны Аҳәынҭқарра Ахада Аслан Бжьаниа имҩаԥигеит Аконституциатә реформазы акомиссиа актәи аилатәара.  

Аилатәара иалахәыз аԥсшәа раҳәаны, аҳәынҭқарра Ахада иҳәеит: «Ҳаԥхьа аҭакԥхықәра зцу, аҵак ду змоу аусура шьҭоуп. Ари  адокумент ҳҳәынҭқарра ашьақәгылараҟны ароль дуӡӡа нанагӡеит. Аамҭа ԥхьаҟа ицоит,  ицәырҵуеит атәыла адокумент хада ианымԥшыр зымуа апроцессқәа».

Аслан Бжьаниа иҳәеит ари аусура аилатәара иалахәу дарбанзаалак ҭакԥхықәрала дшазнеиуазы агәрагара шимоу.  

Аконституциатә реформазы акомиссиа актәи аилатәараҟны ирылацәажәеит аиҿкааратә зҵаарақәа.  

  2020 шықәса жьҭаарамза 10 рзы  Аԥсны Аҳәынҭқарра Аконституциа аҳәынҭқарратә мчхареи напхгараҭареи асистема аиҭакра иазкыз арҽеирақәа разырхиара хықәкыс иҟаҵаны, Ахада инапы аҵаиҩит  Аконституциатә реформазы акомиссиа аԥҵаразы Аусԥҟа.  
Акомиссиа напхгара алҭоит ауаажәларратәи аполитикатәи усзуҩы Наҭелла Акаба.

Акомиссиа аилазаараҟны иҟоуп ауаажәларратә усзуҩцәа, азиндырҩцәа: Асҭамыр Ҭаниа, Арда Инал-иԥа, Баҭал Тапаӷәуа, Асҭамур Аппба, Саида Быҭәба, Витали Габниа, Алхас Ҭҳагушев, Гиви Габниа, Саид Гезердаа, Кама Џьынџьал, Ҭамаз Қьецба, Олег Папасқьири, Диана Ԥлиа, Сергеи Смыр.