Аслан Бжьаниа Башар Хафез аль-Асад иубилеи идиныҳәалеит

Аҧсны Аҳәынҭқарра Ахада Аслан Бжьаниа Шьамтәылатәи Арабтә Республика Ахада Башар Хафез аль-Асад иубилеи идиныҳәалеит.

Адныҳәаларатә цҳамҭаҟны иҳәоуп:

"Ҳаҭыр зқәу Ахада Шәхацкы!

          Гәык-ҧсыкала ишәыдысныҳәалоит 55 шықәса шәхыҵра арыцхә!

        Шәара хамеигӡарада шәыжәлари шәыҧсадгьыли рымаҵ аураҟны иаашәырҧшуа апатриотизм иаша ала иҿырҧшыгоу ҳәынҭқарратә усзуҩуп. Уи ус шакәу шьақәзырҕәҕәо ракәны иҟоуп аҵыхәтәантәи ашықәсқәа рзы шәтәылаҟны имҩаҧысуаз ахҭысқәа. Адәныҟантә ақәыҕәҕәара шшәырҭозгьы, Шәара шәнапхгарала Шьамтәыла ажәлар ирылшеит Аҧсадгьыл аҕацәеи жәларбжьаратәи атерроризми ирцәыхьчаны, асуверенитети адгьылҵакыра акреи реиқәырхара.
    
      Аҧсны жәлар ахә ҳаракны иршьоит ҳтәылақәа рыбжьара адипломатиатә еизыҟазаашьақәа рышьақәыргыларазы иҟашәҵаз ашьаҿа. Ҳара ҳзы акраҵанакуеит зҭоурыхи зкультуреи беиоу Шьамтәылатәи Аеспубликеи Аҧсны Аҳәынҭқарреи реиҩызаратә еимадарақәа рырҕәҕәара.
  
     Ҳаҭыр зқәу Ахада, Аҧсны Аҳәынҭқарра иқәынхо ажәлари хаҭала сара сҟынтәи шәиубилеи амш аҽны ишәзеиҕьасшьарц сҭахуп агәабзиара, агәамч, аихьӡарақәа шәнапы злаку аҭакҧхықәра зцу амаҵураҟны, Шьамтәыла ажәлар – аҭынчра, аизҳазыҕьара!"  


Возврат к списку