Аҧсны Аҳәынҭқарра Ахада

Аҧсны Аҳәынҭқарра Ахада Аслан Бжьаниа Приднестровие ажәлар ПМА ашьақәгылара 30-шықәсахыҵразы дрыдныҳәалеит.

Аҧсны Ахада аиубилеи инадҳәаланы иҟаиҵаз авидеоааҧхьара Приднестровиатәи Молдавиатәи Ареспублика ателехәаҧшра аканалқәа зегьы рыла идырбан.
  
Ааҧхьара атекст аҟны иҳәоуп:

“Акыр иаҧсоу приднестроваа!

Аҧсны жәлар рыхьӡала, хаҭала сара сыхьӡала гәык-ҧсыкала ишәыдысныҳәалоит Приднестровиатәи Молдавиатәи Ареспублика шьақәгылеижьҭеи 30 шықәса аҵра амш.  
Приднестровиатәи Молдавиатәи Ареспублика ахьыҧшымра ¬– ари аҭоурыхтә ҵабырг ашьақәырҕәҕәара мацара акәӡам, ари зегьы ирыцку – ауаҩытәҩсатә зин – ишьаарҵәыроу аибашьраҟны инагӡахаз ахақәиҭразы азин, дасу илахьынҵа аӡбаразы имоу азин фырхаҵарала азықәҧара аҭоурых ауп.

Шәара шәыдгьыл аҟны аҭынчра ашьақәыргыларазы аибашьра аамҭа хьанҭақәа шәхыжәгеит. Аибашьра ахәра ҕәҕәақәа шәыннаҵеит, зықьҩыла ауаа рлахьынҵақәа ҿаҟәаны иннажьит. Аха Приднестровие ажәлар мычла еиҟарамыз аибашьра хьыӡла-ҧшала иалҵны, шьаҿа ҕәҕәала ихьыҧшым аҳәынҭқарра аргылара амҩа ианылеит. Иахьа амилаҭтә интересқәа, атәылауаа ршәарҭадара алыршара амҩа ақәныҟәарала Приднестровиатәи Молдавиатәи Ареспублика иара   асуверенитет ашьақәырҕәҕәара иаҿуп, иагьаанарҧшуеит жәларбжьаратәи ауаажәларра аус рыцура ишазхиоу.  

Аҧсни Приднестровиеи еидызкыло аиҩызареи аилибакаареи рымацара ракәӡам. Ҳтәылақәа рыбжьара аусеицура ашықәсқәа рыҩныҵҟала иаҧҵан аҳәынҭқаррабжьаратә усеицура алзыршо  акрызҵазкуа аиқәшаҳаҭра-зинтә база.

Агәра згоит, ҳамчқәа реибыҭарала ҳара аҧхьаҟагьы шьаҿа-шьаҿала ҳажәларқәа реизҳазыҕьара иазку ҩ-ганктәи ҳаимадарақәа рырҕәҕәара ҳшалаго.

Абри аныҳәамш аҽны Приднестровие ажәлар зегьы ирыдысныҳәалоит ахьыҧшымра 30 шықәса ахыҵра амш. Ирзеиҕьасшьоит аҭынчра, ахирра, аизҳазыҕьара!”