Ахада Гьаргь Калҕьы ииубилеи идиныҳәалеит

 Аҧсны Аҳәынҭқарра Ахада Рауль Ҳаџьымба СССР Иреиҳаӡоу Аӡбарҭа аӡбаҩ, Урыстәылатәи Афедерациа Аҳәынҭқарратә Дума Ашәарҭадаразы аилак абжьгаҩ, Аҧсни Урыстәылеи зыҽрыҧсазтәыз аиурист Гьаргь Калҕьы ииубилеи идиныҳәалеит.

Адныҳәалараҟны иҳәоуп:

«Ҳаҭыр зқәу Гьаргь Николаи-иҧа!

Ишәыдысныҳәалоит шәиубилеитә мышныҳәа.

Шықәсырацәала Шәара имҩаҧыжәгоз шәзанааҭтә усура акрызҵазкуа лагаламҭаны иҟоуп Аҧсни Урыстәылеи аиуриспруденциеи азини рыҿиараҟны.  

Шәара шәусура ҿырҧшыга бзиоуп Аҧсны жәлар рымаҵ ауразы.  

Ҷыдала иазгәасҭарц сҭахуп Аҧсны жәлар рмилаҭ-хақәиҭратә қәҧараҟны хаҭала Шәара шәылшамҭақәа, иара убас Урыстәылатәи Афедерациа Аҳәынҭқарратә Дума ҳреспублика аекономикатә блокада ақәхразы иаднакылаз аӡбамҭа иазкыз адокументқәа разырхиараҟны.

Урыстәылатәи Афедерациа Аҳәынҭқарратә Думаҟны шәусураан Шәара иазшәырхиаз аексперттә хәшьарақәеи аналитикатә нҵамҭақәеи ҳтәыла адгылара азҭоз апозициақәа рышьақәыргылара иацхраауан. Шәара шәылшамҭа дуқәа рзы аҳәынҭқарратә ҳамҭақәа жәпакы шәанашьоуп.

Гьаргь Николаи-иҧа, абри амш аҽны ишәзеиҕьасшьоит агәабзиара, агәамч, анасыҧ, ақәра ду». 


Возврат к списку