Аҧсны Аҳәынҭқарра Ахада

Лаҵарамза 4 рзы Аҧсны Аҳәынҭқарра Ахада Рауль Ҳаџьымба  Жәларбжьаратәи акласс иаҵанакуа аспорт азҟаза СССР-и  Европеи рчемпион Рашь Хәытаба ихьӡ зху аҧхьахә агаразы зхы иақәиҭу абырзен-римтә қәҧаразы  XXVI  Жәларбжьаратәи атурнир аартра даҭааит.

  Аҳәынҭқарра Ахада  атурнир аиҿкааҩцәеи, асасцәеи, алахәцәеи аҧсшәа реиҳәеит:

«Итрадициа бзиахеит  Аҧснеиҧш, уи анҭыҵгьы ибзианы  еицырдыруа Рашь Хәытаба ихьӡ зху аицлабрақәа рымҩаҧгара. Акраҵанакуеит ас еиҧш иҟоу аусмҩаҧгатәқәа егьырҭ аспорт хкқәа рыҿгьы  иҿиалар, ирлас-ырласны имҩаҧыслар.  Ҳара иаҳҭахуп аспорт еисааира аҿар аднаҧхьалаларц, аҳәынҭқарра уи азы иалшо зегьы ҟанаҵоит. Ҳасасцәагьы, аспортсменцәагьы, иахьа абраҟа иқәгылараны иҟоу зегьы, аихьӡарақәа шәзеиӷьасшьоит». 

Аицлабрақәа ирылахәуп Аҧсны араионқәа зегьы рҟынтә аспортсменцәа, иара убас Урыстәылатәи Афедерациеи Ихьыҧшым Аҳәынҭқаррақәа Реидгылеи рыҟынтә. 
Ҳаҭыр ду зқәу сасык иаҳасабала атурнир далахәуп хынтәны аолимпиатә чемпион, фынтәны Адунеи ачемпион, фынтәны  Европа ачемпион, ҧшьынтәны Урыстәыла ачемпион, Иван Иарыгин игәалашәаразы Красноиарсктәи атурнир бжьынтәы иаиааихьоу, 1998ш.рзы  Хатә гәаҧхаралатәи ахәмаррақәа  рыҟны аиааира згахьоу, Урыстәыла зҽаҧсазтәыз аспорт азҟаза Буваисар Саитиев. 
Рашь Хәытаба атурнир алахәцәа ақәҿиарақәеи аспорттә разҟи рзеиӷьеишьеит.