Президент Республики Абхазия

 

Президент поздравил коллектив Абхазской государственной телерадиокомпании с днем основания Абхазского государственного телевидения

06.11.2020

 Президент поздравил коллектив Абхазской государственной телерадиокомпании с днем основания Абхазского государственного телевидения

Президент Республики Абхазия Аслан Бжания поздравил коллектив Абхазской государственной телерадиокомпании с днем основания Абхазского государственного телевидения. 

 


«Ҳаҭыр зқәу Аҧсуа телехәаҧшра аусзуҩцәа!

Гәыкала ишәыдысныҳәалоит Аҧснытәи аҳәынҭқарратә телехәаҧшра аҧҵоижьҭеи 42 шықәса аҵра амш. 1978 шықәса абҵарамза 6 аҵак ду змоу мшуп ҳаамҭазтәи Аҧсны аҭоурых азы. Аҧсуа жәлар рзинқәа рырҭбааразы имҩаҧыргоз ақәгыларақәа ирлыҵшәаны, абри аҽны раҧхьаӡа акәны аефир ахь ицәырҵит ҳмилаҭтә телехәаҧшра. Аҧсуаа рзы уи аҵакы аинформациа амассатә хархәагак аасҭа акыр еиҳан. Уи ҳажәлар ҿахәҳәаганы ирзыҟалеит, ҳбызшәеи ҳмилаҭтә культуреи рӡыргаразы цхыраагӡа духеит.

Лымкаала иазгәаҭатәуп, Аҧсны жәлар рџьынџьтәылатә еибашьраан Аҧсуа телехәаҧшра аусзуҩцәа ирбаз аџьабаа. Аҕа импыҵаихалаз рмыругақәа зегьы Аҟәа ишалахазгьы, аамҭа кьаҿк иалагӡаны ирылдыршеит аефир ахь аҭыҵра. Урҭ идырхиоз адырраҭарақәа гәышьҭыхган зыҧсадгьыл ахақәиҭразы иеибашьуаз ҳажәлар рзы.

Ргәалашәара лаша ҳацуп ахааназы Аҧсны ахьчара зхы ақәызҵаз ателехәаҧшра аусзуҩцәа.
Ҳаамҭазы Аҧсны хкы рацәала аҿиара рымоуп аинформациа амассатә хархәагақәа. Иаатит ателеканал ҿыцқәа, инарҭбааны ахархәара амоуп аинтернет. Иагьа убас акәзаргьы, ҳажәлар рзы 42 шықәса раҧхьа еиҧш, иахьагьы Аҧсуа телехәаҧшра лымкаала аҭыҧ ааннакылоит.

Аҵыхәтәантәи аамҭазы иубарҭоуп Аҧсуа телехәаҧшра аефир аҿы имҩаҧысуа аиҭакрақәа, иаҳа иҭбаахеит, ицәырҵит адырраҭара ҿыҵқәа, ахархәара рымоуп ҳаамҭа иақәшәо арҿиаратә знеишьақәа.

Ҷыдала ари амш азы сшәыдысныҳәалар сҭахуп Аҧсуа телехәаҧшра хамеигӡарада шықәса рацәала иазааҧсоз. Иахьа аус зуа аколлектив аилазаара раҧхьаӡа иргыланы ишәзеиҕьысшьоит еснагь ишәымазарц ахәаҧшцәа ргәыбылра, ақәҿиарақәа, аихьӡара дуқәа, шәыҩнаҭақәа рҿы аманшәалара».


Возврат к списку

 
 
 
 
© 2015 Администрация Президента Республики Абхазия, г. Сухум, Набережная Махаджиров, 32, тел.: +7 840 226 46 31, факс: +7 840 226 46 31
почта: info@presidentofabkhazia.org