Аҧсны Аҳәынҭқарра Ахада

 

Ахада имаҵураҿы иқәгылара

Хаджимба Рауль Джумкович - Президент Республики Абхазия

Цәыббра 25, 2014 шықәсазы Аҟәа ақ. имҩаҧысит иалху Аҧсны Аҳәынҭқарра Ахада Рауль Џьумка-иҧа Ҳаџьымба имаҵураҿы иқәгылара иазку аныҳәатә церемониа.

Амаҵураҿы ақәгылара иазку аныҳәатә церемониа мҩаҧысит АА Аминистрцәа реилазаара Азал ду аҟны. Уи иалахәын азакәанҧҵаратә, анагӡаратә, аусӡбаратә мчхара аусбарҭақәа рхаҭарнакцәа, хыҧхьаӡара рацәала асасцәа. Аиноугәурациа аҵас аҽалархәразы Аҧсны аҳҭнықалақь иаҭааит Урыстәыла, Никарагәуа, Алада Уаҧстәыла, Днестр иаҧну Молдавиатәи ареспублика, Ашьхатә Ҟарабах аделегациа.

Ахада имаҵура ахагылара аҵас амҩаҧгара иалагаанӡа Аҧсны Ахада Рауль Ҳаџьымбеи асасцәеи 1992-93шш. Аҧсны жәлар рџьынџьтәылатә еибашьраҿы иҭахаз аибашьцәа рыҧсыбаҩ ахьамадоу Ахьӡ-аҧша Абаҟа аҟны ашәҭқәа шьҭарҵеит.

Аиноугәурациа иазку аныҳәатә ҵас аартуа Аҧсны Жәлар Реизара Аиҳабы Валери Бганба иҳәеит:

«Ҳаҭыр зқәу аҩызцәа, ҳаҭыр зқәу асасцәа. Ииасыз Аҧсны Ахада иалхрақәа ишьақәдырҕәҕәеит ҳтәылаҿы адемократиатә принципқәа аиааира шыргаз, адунеи зегьы аҿы ҳуаажәларра атәылауаҩратә ҭәымҭа ишҭагылаз, Аҧсны ҳәынҭқаррак аҳасабала ишышьақәгылаз ддырбеит. Алхратә кампаниа амҩаҧысшьа иацклаҧшуаз хыҧхьаӡара рацәала анаҧшыҩцәа аӡәк иеиҧш иазгәарҭеит Аҧсны азакәанҧҵареи, жәларбжьаратәи адемократиатә принципқәеи ажәлар ргәазыҳәара атрадициақәеи ишрықәшәо атәы.

Имҩаҧысыз алхрақәа рполитикатә ҵаки рҵабыргреи шьақәнарҕәҕәеит ара иахьа абри азал аҿы Аҳәынҭқарра Ахада Рауль Џьумка-иҧа Ҳаџьымба имаҵураҿы иқәгылара иазку аныҳәатә церемониа иахьалахәу УА ахаҭарнакратә делегациа, Никарагәуа, Алада Уаҧстәыла, Днестр иаҧну Молдавиатәи ареспублика, Ашьхатә Ҟарабах аделегациа, аҧсуа диаспора, Аҧсны ажәлар, ауаажәларратә-политикатә усзуҩцәа рхаҭарнакцәа.

Аҧсны жәлар зегьы рыхьӡала гәыкала иҭабуп ҳәа шәасҳәар сҭахуп, агәра згоит аринахысгьы ҳажәларқәа риашьаратә еизыҟазаашьақәа есааира ишыҕәҕәахо».

Жәлар Реизара Аиҳабы иеишьҭаргыланы Рауль Ҳаџьымба инапы иаиркуеит ахада имчхара адыргақәа – ахада ибираҟ, Аҳәынҭқарратә герби «Аҧсны Ахада» ҳәа аҩыра зну амҳәыри; Аҧсны Ахада Аҧсны Арбџьар мчқәа Ркомандаҟаҵаҩы хада иаҳасабала иҟазаара символра азызуа аҳәа, иара убас аҟәыҕареи, ачҳареи символра азызуа алабашьа.

Валери Бганба аныҳәа иалахәыз зегьы рыхьӡала Ахада имаҵураҿы иқәгылара идиныҳәалеит.

Аҳәынҭқарра Ахадас иалхыз Рауль Ҳаџьымба Аҧсны Аконституциа атекст инапы нақәҵаны ҭоуба иуит идырра, имч - илша зегьы Аҧсны жәлар рҭынчреи реизҳазыҕьареи ишазикуа, Аконституциа дықәныҟәаны, уи ишаҳәо еиҧш, амчхара аусбарҭақәа уи еиларымгарц, атәыла ауааҧсыра рзинқәеи рхақәиҭрақәеи рыхьчараҿы ихы ишаирхәо ала. Иҭоуба анеилига ажәлар рҿаҧхьа аҭакҧхықәра анагӡара дшазхиоу. Аҵыхәтәан, Анцәа диҳәеит иҧсадгьыли иуаажәлари рымаҵ аураҿы амчи алшареи ииҭарц.

Инагӡаз Аҧсны Аҳәынҭқарратә Гимн анаҩс имҩаҧысуеит гәышьҭыхрала асценахь ихагалахо Аҳәынҭқарра Ахада официалла аҳәынҭқарратә мчхара атрибутқәа иҭара.

Абри ашьҭахь ажәа иҭан Аҧсны иҟоу Урыстәылатәи Афедерациа ацҳаражәҳәаҩ Семион Григориев. Уи иажәахә аҿы иҳәеит: «Ҳаҭыр зқәу Рауль Џьумка-иҧа! Ҳаҭыр зқәу асасцәа! Азин сышәҭ Урыстәылатәи Афедерациа анапхгареи ажәлари рыхьӡала Аҧсны Аҳәынҭқарра Ахада имаҵураҿы иқәгылара шәыдныҳәаларазы. 2014 шықәса нанҳәа мзазы имҩаҧысыз алхрақәа азгәаҭоуп ауаажәларра активла ралархәрала, амилаҭтә закәанҧҵареи жәларбжьаратәи астандартқәеи ишрықәыршәаз ала. Ари ырҵабыргын хыҧхьаӡара рацәала жәларбжьаратәи анаҧшыҩцәа рыла. Аҧсны ари аҧышәара қәнагала иалҵит уҳәар алшоит, зықьҩыла арҧарцәеи аҭыҧҳацәеи зхы зқәырҵаз аҳәынҭқарратәрагьы шьақәнарҕәҕәеит. Рауль Џьумка-иҧа, Шәара ижәгаз аиааира иаша иаанарҧшит аҧсуа жәлар амилаҭтә ҳәоуеиқәшәаразы, аҩныҵҟаполитикатә ҭышәынтәалара, асоциалтә-економикатә ҿиара иазку актуалтә зҵаарақәа еффективла рыӡбаразы рыбжьы шырҭииз.

Анапхгара ҿыц аҿаҧхьа иқәгылоуп иуадаҩу, аҭакҧхықәра зцу ауснагӡатәқәа маҷымкәа. Агәра ганы сыҟоуп урҭ рыӡбараҿы Аҧсны есқьынгьы ишадгыло, фышықәса рышьҭахь раҧхьаӡа Аҧсны Аҳәынҭқарра азхазҵаз, астратегиатә ҩызара азызуа – Урыстәылатәи Афедерациа, уинахыстәи ашықәсқәа зегьы ари атәыла аганахьала ахы иаднаҵаз ишацәхьамҵыз аанарҧшуан иара имҩаҧнагоз аусқәа рыла. Иахьа аҧсуа-аурыс еизыҟазаашьақәа аҿиара есааира иацҵо иаауеит. Уи шьақәнарҕәҕәеит нанҳәа мзазы Москва имҩаҧысыз Урыстәылеи Аҧсни рхадацәа реиҧыларагьы. Еффективла аӡбара иаҿуп атәылахьчаратә шәарҭадара алыршара апроблемақәа. Аусура иаларгоуп урыстәылатәи афинанстә цхыраарала иеиҭашьақәыргылоу асоциалтә-економикатә обиектқәа жәпакы.

Ҳазҭагылоу аамҭазы зҽеиҭазкуа аҭагылазаашьақәа аҧсуа-аурыс еизыҟазаашьақәа атәыла аҧсҭазаара аганқәа зегьы рыҟны аусеицура шьақәзыргыло даҽа ҩаӡарак ахь аиагара аҭахны иҟарҵоит. Раҧхьа иргыланы, атәылахьчаратә шәарҭадара алыршараҿы аицхыраара, иара убас аибашьрашьҭахьтәи аиҭашьақәыргыларатә усурақәа рҟынтә иҭышәынтәалоу аекономикатә ҿиара ашҟа аиасраҿы. Аҧсни Урыстәылеи реизыҟазаашьақәа иҿыцу аҩаӡара аныҧшроуп урҭ реиқәшаҳаҭра-зинтә уасхыр аҟны. Иахьа ҳара иҳамоуп Аҧсни Урыстәылеи анапхгаҩцәа рҳәоуеиқәшәара аиҩызареи аусеицуреи рзы аиқәшаҳаҭра ҿыц аус адуларазы. Ҳгәыҕуеит аиқәшаҳаҭра ҳазҭоу ашықәс хыркәшахаанӡа анапаҵаҩра мҩаҧысып ҳәа. Аҵыхәтәан, азин сышәҭ даҽазнык аиашьаратә Аҧсны иахьатәи аҭоурыхтә хҭыс адныҳәаларазы, Шәара, Рауль Џьумка-иҧа, ишәзеиҕьасшьоит иҳаракӡоу Аҧсны аҳәынҭқарратә маҵзура аҿы аихьӡарақәа».

Рауль Џьумка-иҧа Ҳаџьымба Аҧсны Ахадас иалхра идырныҳәалеит: Алада Уаҧстәыла Ахада Леонид Тибилов, Ашьха Ҟарабахтәи ареспублика Ахада иҟнытә адныҳәаларатә аацҳамҭа иаҧхьаз, Ашьхатә Ҟарабахтәи Жраульәлар Реизара ахантәаҩы Ашот Гулиан, Никарагәуа Ареспублика иааҳакәыршаны иҟоу аҧсабареи ацхыраагӡақәеи рминистр Хуанита Сандавал Аргениал, Днестр иаҧну Молдавиатәи ареспублика адәныҟатәи аминистр ихаҭыҧуаҩ Виталий Игнатиев, иара убас Ахада иҟнытә адныҳәаларатә шәҟәы иаҧхьаз Евгени Шевчук.

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT