Аҧсны Аҳәынҭқарра Ахада

 

Ахада Шәача ақалақь аҿы ҳаамҭазтәи ажурналистика Афорум «Урыстәыла зегьы-2018» алахәцәа дырԥылеит

10.10.2018
Ахада Шәача ақалақь аҿы ҳаамҭазтәи ажурналистика Афорум «Урыстәыла зегьы-2018» алахәцәа дырԥылеит

Жьҭаарамза 10 рзы Аԥсны Аҳәынҭқарра Ахада Рауль Ҳаџьымба Шәача ақалақь аҿы ҳаамҭазтәи ажурналистика Афорум «Урыстәыла зегьы-2018» алахәцәа дырԥылеит.

Аҩажәиҩбатәи ҳаамҭазтәи ажурналистика афорум «Урыстәыла зегьы-2018» 2,5-нызқьҩык ауаа еиднакылеит - еицырдыруа ажурналистцәа ауаажәларратә усзуҩцәа.

Аиԥылара ааиртит Урыстәыла ажурналистцәа Реидгыла ахантәаҩы Владимир Соловиов: «Сара гәахәарыла аԥсшәа иасҳәоит, ҳаҭыр зқәу ҳасас, Рауль Џьумка-иԥа. Азҿлымҳара ду интерес амоуп ҳапресс-конференциа, Урыстәылеи Аԥсни ажурналистцәа Реидгыла рацәажәара. Ҳарҭ ҳаимадарақәа акыр шықәса раахыс ишьақәгылеит, урҭ аԥхьаҟагьы иҳарӷәӷәоит».

Ахада афорум алахәцәа аԥсшәа реиҳәеит, дазааҭгылеит Аԥсны аҩныҵҟатәи адәныҟатәи аполитикаҟны ихадароу ахырхарҭақәа, Аԥсны Аҳәынҭқарра ҳаамҭазтәи аҭоурых аетап хадақәа ртәы.

«Ҳаиԥыларақәа уажәшьҭа итрадициахеит. Ҳара ҳзы уи аҵак ду амоуп, избанзар ари ажурналистцәа Аԥсны аӡбахә рзеиҭаҳәара, ҳтәылаҿы имҩаԥысуа ахҭысқәа дырдырра, иааидкыланы ҳаԥсадгьыл аҿы иҟоу аҭагылазаашьа ауаажәларра рызнагаразы лшароуп. 

Ҳара ҳтәыла знысыз амҩа мариамызт. Ари аамҭа иалагӡаны иаҳхаҳгахьоу рацәоуп. Шәара ижәдыруеит аибашьра шыҟаз, аибашьра ашьҭахьтәи аамҭа, аблокада, уҳәа аҳәынҭкарра ашьақәыргыларазы акыр ихьанҭаз аамҭа. 2018 ш. Алада Уаԥстәыла иҟаз ахҭысқәа, урҭ рнаҩстәи апроцессқәа рышьҭахь ҳҳәынҭқарра ахьыԥшымра азхаҵахеит. Ҳарҭ, Урыстәыла ҳазханаҵеит, ари ҳара даҽа ҭагылазаашьак ҳзаҧнаҵеит.

Иахьа аҳәынҭқарра аргылара амҩа ҳануп. Ҳәарада, иҟоуп ауадаҩрақәа, аха ашьақәгылара шцо уаҩы ибартә иҟоуп.

Сара даара сеигәырӷьоит ари ахҭыс сахьалахәу, аԥхьаҩцәеи, ахәаԥшцәеи адунеитә еилазаара зегьы аҟынӡа аинформациа назго Аԥсны имҩаԥысуа ахҭысқәа ирызкны, аҳәаанырцәтәи атәылақәеи ҳареи ҳаизыҟазаашьақәа ртәы зҳәо ауаа сахьрацәажәо».

Аҳәынҭқарра Ахада аиԥылара иалахәыз хыԥхьаӡара рацәала рызҵаарақәа рҭакқәа ҟаиҵеит, уахь иаҵанакуан атуризм, Аԥсны аграртә сектор, аҿартә политика, Шьамтәылатәи Арабтә Республикеи Аԥсни реизыҟазаашьақәа уҳәа.

Ахада, иара убас аҭак ҟаиҵеит Аԥсны иҭыҵуа ихьыԥшым апериодикатә кьыԥхь иазкыз азҵаара.

«Иҟоуп ихьыԥшым агазеҭқәа, активла аус зуа аԥхьаҩцәа рҟынӡа зхатә гәаанагара назго еиуеиԥшым аҭагылазаашьақәа ирызкны. Уи аӡәгьы даҿагылаӡам, иаарту процессуп. Еснагь зегьы ианыргәамԥхо ыҟоуп, аха уи ажурналист, ашәҟәыҩҩы ирзинуп, раԥхьаҩцәеи дареи ргәы иҵхо ахҭыс иазкны ргәаанагара аҳәара», -иҳәеит Аҳәынҭқарра Ахада.

Аԥсны Ажурналистцәа Реидгыла ахантәаҩы Руслан Ҳашыг аиԥылара алахәцәа ирзеиҭеиҳәеит Аԥснытәи Амассатә информациа ахархәагақәа русура атәы.

«Ҳарҭ еснагь алшара ҳамоуп атәыла анапхгара злахәу аиҿцәажәарақәа реиҿкаара. Уи аганахь ала, аԥсуа журналистцәа насыԥ рымоуп. Ҳарҭ иҳаԥхьоит, иҳахәаԥшуеит, ахҳәаа ҳзыҟарҵоит, уи ҳара ҳаигәырӷьоит. Сара Аԥсны Ажурналистцәа Реидгыла хантәаҩыс самоуп, иара убас ихьыԥшым ателеканал напхгара асҭоит, ари афакт иаҳәо рацәоуп ҳтәылаҿы иҟоу ажурналисттә еилазаара аганахьала»,-иҳәеит Руслан Ҳашыг.

Даӷьысҭантәи ажурналистцәа Реидгыла ахантәаҩы Али Камалов Ахада ианеишьеит еицырдыруа апоет, апрозаик, апублицист Расул Гамзатов диижьҭеи 95ш. аҵра инамаданы иҭыжьу аудиовизуалтә материалқәа зцу апоезиеи апрозақәеи реизга.

Абаза газеҭ «Абазашҭа» аредактор Фардаус Кулова Ахадеи аԥсуа жәлари рганахьала иҭабуп лҳәеит.

«1992 ш. рзы Аԥсны Аџьынџьтәылатә еибашьра ианалага Нхыҵ-Кавказ зегьы гылеит, милаҭ еилых ҟамҵакәа, уи иаҳнарбеит Нхыҵ-Кавказаа аӡәыкны ишыҟоу. Арԥарцәа маҷҩымкәа иҭахеит. Рҭаацәа рыхьӡала ҭабуп ҳәа шәасҳәарц сҭахуп урҭ ргәалашәаразы. Сара избоит, иҭахаз рҭаацәа Аԥснынтә ианыхынҳәуа ргәалаҟазаара зеиҧшроу, шаҟа жәа ԥха рҳәо. Ишәҭлааит иеизҳалааит Аҧсны!», - абас лажәа хлыркәшеит «Абазашҭа» аредактор Ф. Кулова.

Ахада Фардаус Кулова ҭабуп ҳәа леиҳәеит: «Уи ҳара ҳаԥсҭазаара иахәҭакуп. Арԥарцәа ргәалашәара ҳарҭ зегьы ҳаиднакылоит, алшара ҳнаҭоит аԥхьаҟагьы аҳәынҭқарра аргыларазы. Излаҳалшо ала, иҭахаз ранацәа ҳадаҳкылоит, маҷк иадамхаргьы, Аԥсны рыԥсы ршьартә еиԥш аҭагылазаашьа рзаԥаҳҵоит. Урҭ ахааназы аӡәгьы ихашҭраны дыҟаӡам, даргьы, ҳаргьы. Афырхацәа рыхьӡ кашәара ақәӡам».

Аиԥылара иалахәыз иара убас зҿлымҳара арҭеит Аԥсни Алада Уаԥстәылеи реизыҟазаашьақәа аҧхьаҟатәи аҧеиҧш, аԥсуа тауарқәа жәларбжьаратәи аџьармыкьахь рцәырҵра амҩа ахыҵхырҭақәа, аҵарадырреи аҭҵааареи рыҿиашьа, аԥсуа бызшәа аиқәырхареи, арҿиареи, Пицундатәи аныхабааҿы аорӷан  атагылазаашьа уҳәа ирызкыз азҵаарақәа.

1 (2).JPG

1 (6).JPG

1 (3).JPG

1 (5).JPG

 1 (4).JPG



Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT