Аҧсны Аҳәынҭқарра Ахада

 

Ахада Аҧсны Аҳәынҭқарра Аҽыбҕаҟазаратә спорт афедерациа анапхгаҩцәа идикылеит

12.06.2018
Ахада Аҧсны Аҳәынҭқарра Аҽыбҕаҟазаратә спорт афедерациа анапхгаҩцәа идикылеит

Рашәарамза 12 рзы Аҧсны Аҳәынҭқарра Ахада Рауль Ҳаџьымба Аҧсны Аҳәынҭқарра Аҽыбҕаҟазаратә спорт афедерациа анапхгаҩы  Аслан Камлиеи уи ихаҭыҧуаҩ Адгәыр Ҧачалиеи  идикылеит.   

Аслан Камлиа Аҧсны Аҳәынҭқарра Ахада Урыстәылатәи Афедерациа Ахада ихьӡала XV ҽырыҩра рыҧхьахә хада инапы иаиркит. Аҩынтә раан ари аицлабраҟны актәи аҭыҧ ааннакылеит Аҧсны Ахьӡала иқәгылаз Конард Лорд захьӡу аҽыҩ.

Аслан Камлиа иаҵшьны иҳәеит ас еиҧш ҳаҭыр змоу аицлабраҟны ҩышықәса инеиҧынкыланы аиааира агара иуникалтәу хҭысны ишыҟоу. Уи иара убас иазгәеиҭеит Урыстәылатәи Афедерациа Ахада ихьӡала аҧхьахә азы аҽырыҩрааан аҩбатәи аҭыҧ шааннакылаз Фаст Керл захьӡыз аҽыбҕаҟаза Ахра Ашәба иҽыҩ.

Аҳәынҭқарра Ахада иазгәеиҭеит Аҧсны ари ажәабжь гәахәара дула ишрыдыркылаз.

«Ҳаигәырҕьеит ари аицлабраҟны аҧхьатәи аҭыҧқәа ҩба ргара. Аҩбатәи аҭыҧгьы лыҵшәа бзиоуп. Ас еиҧш аихьӡарақәа ҟаларц азы аҧхьаҟагьы аусура иацышәҵароуп. Ҷыдала узыргәырҕьо акоуп ҳаспортсменцәа ахьалахәу азы атурнир жәларбжьаратәи аицлабрақәа рыстатус ахьаиуз, насгьы арҭ аицлабрақәа рыҟны Аҧсны Аҳәынҭқарра абираҟгьы ахьыҟоу», - иҳәеит Ахада. 

Ахада Иусбарҭа Анапхгаҩы Беслан Барцыц ари аиааира аҧхьа иргыланы агара алзыршаз Аҧсны Аҳәынҭқарра Аҽыбҕаҟазаратә спорт афедерациа анапхгара дрыдныҳәалеит.

«Аҧсны аҽыбҕаҟазацәа рпозициа акраҵанакуа иҟалеит. Уи шьақәзырҕәҕәо акы акәны иҟоуп абас заҳаҭыр ҳараку атурнир аҟны аҩынтә раан аиааира агара. Аҧснытәи аҽқәа иааиҧмырҟьаӡакәа аҧхьахәтә ҭыҧқәа ргара иаҿуп. Ари аҩыза ҟамлаӡацызт жәохә шықәса раахыс ари Акубок азы аҽырыҩра аҭоурых аҟны. Ҳәарада, уи изызбзоуроу, ҳаҽқәа зааӡои урҭ аус зцыруа рпартниорцәа - Москватәи, Ростовтәи, Краснодартәи аипподромқәа роуп. Аҧсуа спортсменцәа ралахәра иабзоураны арҭ атурнирқәа жәларбжьаратәи аҩаӡарахь ишьҭыҵуеит. Ҳтәыла абираҟи ҳкоманда ахаҭарнакцәа раҧхьахәтә ҭыҧқәеи – ари Аҧсны ахьӡ  шьҭызхуа лшара бзинаы иҟалеит», - иҳәеит Беслан Барцыц.

Безымянный.png

A65A6007.JPG A65A6014.JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT