Аҧсны Аҳәынҭқарра Ахада

 

Аҧсны Аҳәынҭқарра Ахадеи Науру Ареспублика Ахадеи инарҭбаау реиҧылара

Аҧсны Аҳәынҭқарра Ахадеи Науру Ареспублика Ахадеи инарҭбаау реиҧылара 12.11.2017

Аҧсны Аҳәынҭқарра Ахадеи Науру Ареспублика Ахадеи инарҭбаау реиҧылара

Абҵарамза 12 рзы Аҧсны Аҳәынҭқарра Ахада Иусбарҭаҟны имҩаҧысит Аҧсны Аҳәынҭқарра Ахада Рауль Ҳаџьымбеи Науру Ареспублика Ахада Барон Вакои инарҭбаау реиҧылара

Рауль Ҳаџьымба: Ҳаҭыр зқәу аҩызцәа! Бзиала шәаабеит ҳәа шәаҳҳәоит! Ҳара ҳзы ари аҵак ду змоу хҭысуп. Науру Ареспубликеи Аҧсны Аҳәынҭқарреи реизыҟазаашьақәа кыршықәса имҩасуеит. Ҳдипломатиатә еизыҟазаашьақәа шьақәыргылан 2009 шықәса ҧхынҷкәынмзазы. Уи аахижьҭеи усутә визитла ҳтәыла иаҭаахьан имаҷымкәа шәделегациақәа, урҭ шаҳаҭра руан аиҩызаратә, агәрагаратә, апартниорратә еимадарақәа шҳабжьоу. Дара Аҧсны жәларбжьаратәи аренаҟны еиҳау аилкаара аиура иацхраауеит. Гәыҩбара сымам 2016 шықәсазы анапы зҵаҳҩыз Науру Ареспубликеи Аҧсны Аҳәынҭқарреи реиҩызареи русицуреи рзы аиқәшаҳаҭра инақәыршәаны, ҳаиныррақәа рыҽшдырҭбаауа. Ара шәыҟазаара ҳара ҳзы аҵак ду амоуп. Ҳаҭыр зқәу Вако ихаҵки сареи иахьа еибаҳҳәахьан, уажәтәи шәвизит аҿҳәара шкьаҿу, аха ҧхьаҟатәи шәааираан ҳҭыҧҧшӡарақәеи, ҳекономикеи, ҳажәлар рыҧсҭазаашьеи еиҳа иааигәаны ижәдырырц аҭагылазаашьа шәоуп ҳәа. Хымҧада, уи ҳаизыҟазаашьақәа анырра бзиа рынаҭон. Иахьа Аҧсни Науруи рзы акрызҵазкуа азҵаарақәа ҳрылацәажәап ҳәа агәаанагара сымоуп.

Егьырҭ Аокеанҭынчтәи абассеин ахь иаҵанакуа аҳәынҭқаррақәеи ҳареи адипломатиатә еизыҟазаашьақәа шҳабжьам инамаданы, Аҧсны Аҳәынҭқарреи Науру Ареспубликеи рыбжьара Аиҩызара апарламентбжьаратә гәыҧ ма Науру, Вануату, Тувалу злало Аҧсны Аҩызцәа ргәыҧ шәганахьала иаҧҵазар бзиан. Уи зыӡбахә ҳәоу арегион аҟны Аҧсны аинтересқәа ахьчалон. Ҳара ибзианы еилаҳкаауеит инарҭбаау ҳазхаҵара иаарласны ишзыҟамло, аха ас еиҧш иҟоу аструктурақәа рыла ҳинтересқәа рцәыргара ирылшо маҷым, агуманитартәи аекономикатәи зҵаарақәа рҟны.

Иара убасгьы, сгәы иаанагоит, Науру злоу Аокеанҭынчтәи адгьылбжьахақәа рфоруми ҳареи аизыҟазаашьақәа ҳабжьаҳҵар, Аҧсназы инарҭбаау аинформациа рылаҵәар шалшоз.

Ҷыдала иҭабуп ҳәа шәасҳәар сҭахуп Науру Ареспублика анапхгареи ЕАР аҟны Науру Есымшатәи ахаҭарнак Марлен Моузеси, ЕАР Ассамблеиаҟны ахҵәацәа рызҵаара ианалацәажәо иҟашәҵо адгыларазы. Аҧсны макьана уи аҭыҧ аҟны хаҭарнакра азыҟанаҵом, аха ҳҩызцәа ҳазҭагылоу атәы жәларбжьаратәи аилазаараҟынӡа инеиртә иҟарҵоит. Иҭабуп иахьа ара шәахьыҟоу азы.

Барон Вака (ишеиҭагоу еиҧш): Иҭабуп, ҳаҭыр зқәу Ахада. Сколлегацәеи сареи Аҧсныҟа визитла ҳааразы уажәааигәа ҳаилацәажәеит. Уи ҳажәларқәа рыбжьара аиҩызареи аидгылареи шаҳаҭрас ирзаҳур ҳҭахын. Уаанӡагьы арахь сааир акәын, аха иеиуеиҧшым амзызқәа ирыхҟьаны, иахызгон. Ус иагьа иҟазаргьы, акрызҵазкуа ахҭысқәа раан Аҧсныҟа иаауан сколлегацәа, Апарламент Аиҳаби аминистрцәеи. Урҭ зегьы сыхьӡала акәын ишаауаз, аинформациагьы нхарҭәааны исызнаргон. Уи сара сзы игәахәароуп.

Ҳделегациа дацны дааит зхыҧхьаӡара маҷу ҳаиҳабыра ҧҳәыс заҵәны иалоу Чармин Скотти. Лара лнапы иануп агәабзиарахьчара, аҵарадырра, иара убас аҳауа аҽыҧсахра иадҳәалоу азҵаарақәа рыӡбараҟны дсыцхраауеит. Иара убас дҳацуп Диуб ихаҵкы. Уи адәныҟатәи аполитика азҵаарақәа инапы иануп, аҳәаанырцәтәи ҳвизитқәа раан ацхыраара ду ҟаиҵоит. Моузес лхаҵкы лтәы уҳәозар, уи ЕАР аҟны данықәгыло, ибзиаӡаны илдыруеит Аҧсны иадҳәаланы илҳәаша. Иара убас ихаҵкы Арои – адәныҟатәи аполитика азҵаарақәа рзы амаӡаныҟәгаҩ. Гадабу ихаҵкы Моузес аус лыциуеит, уигьы ЕАР аҟны Аҧсны аинтересқәа ихьчоит. Иара убасгьы иӡбахә сҳәар сҭахуп сыцхырааҩ, сабжьгаҩ Кеннон ихаҵкы, уи еснагь сҳәаанырцәтә визитқәа раан дсыцуп.

Шәаҳаракыра, шәара еснагь шәҳақәгәыҕыр шәылшоит. Иахьагьы, наҟ-наҟгьы Аҧсны аинтересқәа ҳахьыҟазаалакгьы иҳахьчалоит. Ҳара шәара шәҟынтәи аиҩызарада акгьы ҳшазыҧшым жәдыруазар ҳҭахуп. Ҳара ҳзы уи зегь реиҳа ихадоуп. Аҧсны иҟоу аҭагылазаашьа еснагь ҳазҿлымҳауп. Ҳгәылара изықәшәаз ауадаҩрақәа ртәгьы ҳдыруеит. Урҭ аҧхьаҟа иҟамларц азы иҳалшо зегь ҟаҳҵалоит.

Иҭабуп даара.

Рауль Ҳаџьымба: Иҭабуп. Аусеицура атәы ҳҳәозар, хымҧада, ҳхаҭарнакцәа рыҽшәымардалоит. Ара исыдтәалоуп Акультура аминистр Ельвира Арсалиа, Ахада Иусбарҭа Аиҳабы Даур Аршба, Апарламент Аиҳабы, акыр шықәса аполитика иалахәу Валери Кәарҷиа, иахьа шәымҩаҧызго Адәныҟатәи аусқәа рминистр Даур Ақаҩба. Хымҧада, ҳазлацәажәоз азҵаарақәа рыӡбара ҳажәларқәагьы рхы аладырхәуеит. Уи ҳара ҳзы акраҵанакуеит. Ҳаизыҟазаашьақәагьы еиҳа-еиҳа иҿиалароуп.

Аиҧылараҟны аҧсуа ган аҟынтәи иалахәын Аҧсны Жәлар Реизара – Апарламент Аиҳабы Валери Кәарҷиа, Аҧсны Аҳәынҭқарра Ахада Иусбарҭа Аиҳабы Даур Аршба, Адәныҟатәи аусқәа рминистр Даур Ақаҩба, Акультуреи аҭоурых-культуратә ҭынха ахьчареи рминистр Ельвира Арсалиа. Науру аган аҟынтәи иалахәын Апарламент адепутат, Агәабзиарахьчареи аҵареи рминистр Чармин Скотти, Апарламент адепутат, иҷыдоу анапынҵақәа рзы Ахада иабжьгаҩ Милтон Диуб, ЕАР аҟны Науру Ареспублика Есымшатәи ахаҭарнак Марлен Моузес, Ахада иҧшәмаҧҳәыс Луиза Вака, Адәныҟатәи аусқәа рминистрра амаӡаныҟәгаҩ Маик Арои, ЕАР аҟны Науру Ареспублика Есымшатәи ахаҭарнакра актәи амаӡаныҟәгаҩ Ренньер Гадабу, ацхырааҩ Девид Кеннон.

Абҵарамза 12 рзы Науру Ареспублика Ахада Барон Вака усутә визитла Аҧсны даҭааит. Науру Ареспублика Ахада напхгара зиҭо аделегациа иалоуп Апарламент адепутат, Агәабзиарахьчареи аҵареи рминистр Чармин Скотти, Апарламент адепутат, иҷыдоу анапынҵақәа рзы Ахада иабжьгаҩ Милтон Диуб, ЕАР аҟны Науру Ареспублика Есымшатәи ахаҭарнак Марлен Моузес.

IMG_9044.JPG
IMG_9016.JPG

Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT