Аҧсны Аҳәынҭқарра Ахада

 

Ахада Ҟабарда-Балкариатәи Ареспубликеи Аедыг Республикеи рахь ивизит хыркәшоуп

11.09.2017

Ахада Ҟабарда-Балкариатәи Ареспубликеи Аедыг Республикеи рахь ивизит хыркәшоуп

Цәыббрамза 11 рзы Аԥсны Аҳәынҭқарра Ахада Рауль Ҳаџьымба Ҟабарда-Балкариатәи Ареспубликеи Аедыг Республикеи рахь ивизит хыркәшаны Аԥсныҟа дхынҳәит.

Ҟабарда-Балкариатәи Ареспублика Ахада Иури Коков иааԥхьарала Аԥсны Ахада иаҭаара аҳәаақәа ирҭагӡаны ихы рылаирхәит Аҳәынҭқарра Амшныҳәеи Ҟабарда-Балкариеи Урыстәылеи рыжәларқәа ракзаара 460 шықәса ахыҵреи рныҳәамш. Рауль Ҳаџьымба Иури Кокови, 1992-1993 шш. Аԥсны Аџьынџьтәылатә еибашьраан хатәгәаԥхарала иеибашьуази, урҭ рҭаацәарақәеи дырԥылеит. Рауль Ҳаџьымбеи, Иури Кокови, дареи Нальчик ақалақь аҟны иҟоу Аԥсны Ашҭаҿ игылоу Иҭахаз хатәгәаԥхаралатәи аибашьцәа рбаҟа амҵан ашәҭшьыҵәрақәа еицышьҭарҵеит. Ҟабарда-Балкариа Аҳәынҭқарра Амшныҳәа аҽны Рауль Ҳаџьымба ихы алаирхәит «Амилаҭтә ԥштәеилазаара» захьӡу Афестиваль. Уи мҩаԥысуан Аԥсны Ашҭаҟны, амилаҭтә культуратә центрқәа жәпакы алархәны. Урҭ рхыԥхьаӡараҟны иҟан Ҟабарда-Балкариатәи Акультура афонд амилаҭтә культуратә центр «Аԥсны». Аԥсны Ахадеи Алада Уаԥстәылеи Ҟабарда-Балкариеи рхадацәеи уи ахьаарԥшыз апавилионгьы иаҭааит. Аԥсны Ахада ари атәылаҟны иҟазаара аҵыхәтәантәи амш азы Нальчик агәаны иҟоу Ҟабардатәи аҭоурыхтә мҩаду аҟны Ҟабарда-Балкариа ахадеи иареи неиааит, ауааԥсыра ирыҿцәажәеит.

Мураҭ Кумпилов иааԥхьарала Аедыгтәылаҟа ивизит аҳәаақәа ирҭагӡаны Аԥсны Ахада далахәын Ареспублика Ахада иинаугурациа ацеремониа. Иара убасгьы иара дырԥылеит 1992-1993 шш. Аԥсны Аџьынџьтәылатә еибашьраан хатәгәаԥхарала иеибашьуаз ҳашьцәа аедыгцәа. Иҭахаз рбаҟа аҿаԥхьа ашәҭшьыҵәрақәа еицышьҭарҵеит. Ари ацеремониа иалахәын хатәгәаԥхарала иеибашьуази Маикоп аҵара зҵо аԥсуа студентцәеи.

Авизит аҵыхәтәантәи амш азы Рауль Ҳаџьымба Аедыг Республика Ахада ҿыц Мураҭ Кумпилов иинаугурациа ацеремониа ихы алаирхәит.

Аԥсны Ахада Ҟабарда-Балкариеи Аедыгтәылеи рахь ивизит цәыббрамза 7 инаркны 10-нӡа имҩаԥысуан. 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT