Аҧсны Аҳәынҭқарра Ахада

 

Аедыгтәыла Ареспублика Ахада иинаугурациа ацеремониаан Ахада иқәгылара

Аедыгтәыла Ареспублика Ахада иинаугурациа ацеремониаан Ахада иқәгылара 10.09.2017

Аедыгтәыла Ареспублика Ахада иинаугурациа ацеремониаан Ахада иқәгылара

Цәыббрамза 10 рзы Аԥсны Аҳәынҭқарра Ахада Рауль Ҳаџьымба далахәын Аедыг Республика Ахада аамҭала инапынҵақәа назыгӡо Мураҭ Кумпилов иинаугурациа ацеремониа.

***

Ҳаҭыр зқәу аҩызцәа!

Ҳаҭыр зқәу Мураҭ Каральби-иԥа!

Ареспублика ахада имаҵурахьы анеира – Аедыгтәыла аԥсҭазаараҟны ҿыц иаатуа даҟьоуп. Иахьа шәтәыла анапхгарахь дааит иҿоу, агәацԥыҳәара ду злоу, иҿыцу, ҳазҭагылоу аамҭа иашьашәалоу ахәыцшьа змоу ауаҩы. Аекономикатәи, асоциалтәи, агуманитартәи усхкқәа рҟны иара иаԥхьанеиуаз ахадацәа иҟарҵаз алагалақәа ишрыциҵо агәра згоит.

Урыстәыла есааира аҽарӷәӷәоит, иара ахьӡ ҭыго, ахыԥша ду шамоу шьақәырӷәӷәо аҿиара иаҿуп. Уи зыбзоуроу Урыстәылатәи Афедерациа асубиектқәеи, уи анапхгаҩцәеи, иқәынхо ажәларқәеи ирыбзоуроуп. Аедыгтәылеи уи атәыла ԥшӡа иқәынхо ажәларқәеи Урыстәыла ҿыц ашьақәырӷәӷәаразы иҟарҵо алагала дууп. Иахьа шәреспублика иҭышәынтәалоу аекономикатәи асоциалтәи шьаҭақәа амоуп, аинфраструктуратә лшарақәа ирызҳауеит. Анапхгаҩ ҿыц имариам азҵаарақәа рыӡбара инапы иануп. Агәра згоит, урҭ зегьы рынагӡара шилшо.

Аԥсуааи адыгақәеи – иашьаратә жәларқәоуп. Ҳара милаҭк ҳахылҵит, азеиԥш ҭоурых ҵаула ҳамоуп, ҳмилаҭқәа аимадара ӷәӷәақәа жәытә-натә аахыс ирыбжьоуп. Ҳҭоурых ҿыцгьы уи аршаҳаҭуеит. Аԥсны аамҭа цәгьақәа ианырҭагылаз уи ҳаиҳабыра адгылара ӷәӷәа арҭон Аслан Али-иԥа Џьаримов, Хазреҭ Меџьид-иԥа Совмен, урҭ ажәала мацара акәым, усла иҳахәон, ҳҳәынҭқарра ҿа ашьақәгыларазы рылшамҭақәа маҷым. Иҷыдоу аизыҟазаашьақәа ҳабжьалеит Аслан Кит-иԥа Тхакушинови ҳареи, уи иеиҳабацәа рытрадициақәа ирыциҵон.

Арҭ ашықәсқәа рзы ҳзыхьӡаз маҷым, аха еиҳа иалыскаар сҭаху хатәгәаԥхарала иеибашьуаз ҳашьцәа иааныркылаз аҭыԥ. Шәҩыла арԥарцәа гәымшәақәа гылеит Аԥсны ахақәиҭтәразы. Ирацәаҩны рыԥсҭазаарақәа ақәырҵеит рашьцәа аԥсуаа рыхьчаразы. Уи алагьы дара ишьақәдырӷәӷәеит ҳажәларқәа узеиҟәымҭхо ишеимадоу, ҳаиашьаратә еизыҟазаашьақәа аҵак дуӡӡа наунагӡа ишрымазаауа.

Рыхьӡ кашәара ақәым зхы иамеигӡаз, зхәышҭаарақәа рахь изыхнымҳәыз хатәгәаԥхарала иеибашьуаз афырхацәа. Гәык-ԥсыкала иҭабуп ҳәа раҳҳәоит иахьа уажәраанӡа ҳаиашьаратә еимадарақәа еиҳа-еиҳа рырҭбааразы аџьабаа збо зегьы.

Ҳаҭыр зқәу Мураҭ Каральби-иԥа, Шәара шәсас дахьуп Аԥсназы. Аԥсуа жәлар зегьы рыхьӡала ишәзеиӷьасшьоит аԥеиԥш бзиа. Ҳара ҳахәҭаахьала иахьҳалшо ҳшәывагылоит, иеиуеиԥшым азҵаарақәа рыӡбараҟны ҳамчи ҳалшеи ҳреигӡом.

Агәабзиара ӷәӷәа, аманшәалара, аедыг жәлар реизҳазыӷьаразы шәмаҵура ҿыц аҟны аихьӡара ҿыцқәа шәзеиӷьасшьоит.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT