Аҧсны Аҳәынҭқарра Ахада

 

Рауль Ҳаџьымбеи Владимир Путини иеицыҟарҵаз аҳәамҭа

08.08.2017
Рауль Ҳаџьымбеи Владимир Путини иеицыҟарҵаз аҳәамҭа

Нанҳәамза 8 рзы Аҧсны Аҳәынҭқарра Ахада Рауль Џьумка-иҧа Ҳаџьымбеи Урыстәылатәи Афедерациа Ахада Владимир Владимир-иҧа Путини реиҧылара ашьҭахь апрессазы аҳәамҭа еицыҟарҵеит.

Уи аҧхьа Аҧсны Аҳәынҭқарра Агәабзиарахьчара аминистр Ҭамаз Ҵахнакьиеи Урыстәылатәи Афедерациа Агәабзиарахьчара аминистр Вероника Скворцовои Аҧсны Аҳәынҭқарра Ахада Рауль Џьумка-иҧа Ҳаџьымбеи Урыстәылатәи Афедерациа Ахада Владимир Владимир-иҧа Путини рҿаҧхьа Аҧсны Аҳәынҭқарра аҵакырадгьыл аҟны иеиҧмырҟьаӡакәа инхо Урыстәылатәи Афедерациа атәылауаа рыҧгаҧсара аиҿкаара аусхкаҟны, Урыстәылатәи Афедерациа хымҧадатәи амедицинатә ҧгаҧсара асистемаҟны, Урыстәылатәи Афедерациа амедицинатә усбарҭақәа рҟны урҭ атәылауаа амедицианатә цхыраара рыҭараҟны аусеицуразы аиқәшаҳаҭра рнапы аҵарҩит.

***

Ҳаҭыр зқәу Владимир Владимир-иҧа! Ҳаҭыр зқәу ҳҩызцәа, ҳколлегацәа!

Аҧсны жәлар зегьы ҳзы ихьӡуп, игәырҕьара дууп Урыстәылатәи Афедерациа Ахада Владимир Владимир-иҧа Путин аҧсуа дгьыл аҟны идкылара. Ҳара ҳаиҧыларақәа лассы-лассы имҩаҧыслоит, уи Аҧсни Урыстәылеи рҳәынҭқаррабжьаратә еизыҟазаашьақәа рыҩаӡара ҳараки аҩ-ҳәынҭқарраки урҭ рмилаҭқәеи иҕәҕәоу реиҩызаратә еимадарақәеи рыстратегиатә усеицуреи ртәы аҳәоит.

Урыстәылатәи Афедерациа Ахада Владимир Владимир-иҧа Путин дызлахәыз иахьатәи ҳаиҧылара ишаҧу еиҧш, аиҩызаратәи аусуратәи ҭагылазаашьаҿы, Аҧсни Урыстәылеи рҭахрақәа инарықәыршәаны акырӡа хәарҭара аманы имҩаҧысит. Аҩ-ганктәи рымшхәаҧштә аҟны иқәгылаз еиҳа акрызҵазкуаз азҵаарақәа ҳрылацәажәеит.

Хымҧада, раҧхьаӡа иргыланы ҳара ҳрылацәажәеит Аҧсны асоциалтә-економикатә ҿиара азҵаарақәа. Ишдыру еиҧш, Урыстәылатәи Афедерациа Аинвестициатә программеи егьырҭ ахырхарҭақәеи инарықәыршәаны афинанстә цхыраара ду ҟанаҵоит. Уи ҳара иҳалнаршоит акрызҵазкуа аинфраструктуратә проектқәа рынагӡара, аекономика арҿиара, амҩақәеи акоммуникациақәеи рырҽеира, асоциалтә ҵакы змоу аобиектқәа рыргылара. Сынтәа Аинвестициатә программа инақәыршәаны афинансыркра ашәагаа иартәоит 2,5 млрд мааҭ инареиҳаны. Аҧсуа ган иеиқәнаршәеит зхаҭабзиара ҳараку апроекттә-харџьынҵатә документациа, иара аекспертиза иахысит, ишьақәырҕәҕәоуп. Уи Аинвестициатә программа иазҧхьагәанаҭо аобиектқәа рыла хықәкылатәи аусура алагара алнаршеит.

Анаплакра маҷи абжьаратә наплакреи русхкаҟны апроектқәа рынагӡара иаҿуп, аурыс банкқәа рыкредиттә хархәагақәа адҧхьаланы. Арҭ ахықәкқәа рныгаӡаразы урыстәылатәи «"Аинвестициатә усбарҭа" аганахьала » 1,2 млрд мааҭ азоужьуп. Ари апрограмма абзоурала Аҧсны қәҿиарала аусура иалагеит аарыхратә наплакқәа жәпакы, раҧхьаӡа иргыланы, ақыҭанхамҩатә усхк аҟны. Уи Аҧсны ааигәатәи аҧеиҧш азы Аҧсны ахатә економика арҿиара анырра ҕәҕәа аҭара шалнаршо азы агәыҕрақәа ҳнаҭоит.

Ари программа иаанарҧшуа алҵшәақәа, атәылаҟны анаплакратә активра аизҳара, абизнес кредитла аиқәыршәара аҭахра ҳасаб азуны, аҧсуа ган зҿлымҳара шамаз аанарҧшит абри ахырхарҭала акредиттә хархәагақәа рышәагаа ацҵаразы. Уи иалнаршоит асоциал-економикатә ҿиара еиҳа иццакны амҩаҧысра, аусуратә ҭыҧқәа рхыҧхьаӡара ацҵара, ҳтәылаҟны ашәахтәқәҵаратә шьаҭа арҭбаара.

2008 шықәсазы Урыстәылатәи Афедерациа Аҧсны Аҳәынҭқарра ахьыҧшымра аназханаҵа аахыс, Аҧсни Урыстәылеи рыбжьара атауареикәыршара иазҳаит 3,5-нтә – 7 млрд мааҭк рҟынтәи 24,5 млрд рҟынӡа. Аекспорт – 0,9 млрд мааҭ рҟынтәи 5,5 млрд рҟынӡа.

Иааидкыланы, Аиҩызареи астратегиатә усеицуреи рзы аҧсны-урыстәылатәи аиқәшаҳаҭра аҧҟарақәа рынагӡара шымҩаҧысуа азгәаҳҭеит. Убас, ҳаиҧылара аламҭалазы аҧсуа ган ишьақәнарҕәҕәеит Аҧсни Урыстәылеи рыҩныҵҟатәи аусқәа рминистррақәа иеицырзеиҧшу Аинформациа-координациатә центр аиҿкаареи аусуреи рыҧҟарақәа рзы Аиқәшаҳаҭра. Иара ацәгьоурақәа ирҿагыланы ақәҧареи ҳтәылаҟны акриминогентә ҭагылазаашьа аиҕьтәреи ирыдҳәалоу азҵаарақәа рыӡбаразы акрызҵазкуа усбарҭа ҿыцны иҟалап ҳәа агәыҕра ҳамоуп.

Атәылахьчареи ашәарҭадареи рызҵааразы иаку аусуеицура аанкылаӡам. Уи ахықәкы инадҳәаланы, Аҧсни Урыстәылеи Рырбџьармчқәа Иеизаку рарратә гәыҧ ашьақәыргылара азҧхьагәаҭоуп, хазы игоу аиқәшаҳаҭрала иҳәаақәҵааны.

Адәныҟатәи аусқәа русбарҭақәа русеицура амҩаҧысра иаҿуп, адәныҟатәи аполитика аҭышәныртәаларазы ауснагӡатәқәа мҩаҧысуеит, ҷыдала иааугозар, Женеватәи аиҿцәажәарақәа.

Акультуреи аҵараиуреи рганахьала, агуманитартә хырхарҭала аусеицура активла имҩаҧысуеит.

Хазы иазгәасҭар сҭахуп, Урыстәылатәи Афедерациа Ахадеи ҳареи уаанӡатәи ҳаиҧыларақәа раан ҳазлацәажәоз, ҳтәылауаа рыҧсҭазаашьа аиҕьтәра иазкыз азҵаарақәа рыӡбара ишаҿу. Ҷыдала иааугозар, аҳәынҭқарратә ҳәаа ахыҵразы аҭагылазаашьақәа рырманшәалара азҵаара. Аҳәаахьчаратәи аҳазалхратәи усмҩаҧгатәқәа рынагӡашьа арццакреи рылҵшәақәеи азгәаҭатәуп, иумбар залшом аушьҭратә ҭыҧқәа рҟны атәылауаа аҧшра еиҳа имаҷны ишрықәшәо.

Абри инамаданы ҳара зҿлымҳара заҳҭо зҵаароуп – урыстәылатәи анапхгара ашҟа аҳәарагьы ҟаҳҵоит иахьынӡауа аҧснытәи ақыҭанхамҩа тауарқәа Урыстәылатәи Афедерациахь рекспорт азы аҭагылазаашьақәа рырманшәаларазы. Ҳгәы иаанагоит аҳазалахра еиҳа ирласни лҵшәабзиалеи аиқәыршәареи еиуеиҧшым аҳәынҭқарратә гәаҭара хкқәа рымҩаҧгареи рзы, афитосанитартә гәаҭарагьы убрахь иналаҵаны, иҟоу амеханизмқәа рхархәара аҭахуп ҳәа, ҷыдала, аҳазалхратә ҟәшаҿы аиқәшаҳаҭрақәа рыҟны иазҧхьагәаҭоу. Ари Аҧсны аграртә ҟәша аҿиара иацхраауеит, урыстәылатәи ахархәаҩ зхаҭабзиара ҳараку, аҧснытәи ақыҭанхамҩаарыхыҩцәа изҩыдоу раалыҵ еиҳа инацҵаны ироуртә иҟанаҵоит.

Ахыркәшамҭазы хаҭала Урыстәыла Ахада Владимир Владимир-иҧа Путин иҭабуп ҳәа иасҳәар сҭахуп ҧсахрада Аҧсны Аҳәынҭқарра иаиҭо адгыларазы, ҷыдала иҳамоу апроблемақәа зҿлымҳара ахьриҭо азы. Ҳажәлар ари азы гәыкала иҭабуп ҳәа шәарҳәоит. Аҧсны Аҳәынҭқарреи Урыстәылеи ирыбжьоу аиҩызара еицакра ақәӡам. Агәра ганы сыҟоуп аидгылареи астратегиатә усеицуреи апринципқәа шьаҭас измоу ҳажәларқәа рыҿиара иазку аҧсны-урыстәылатәи аизыҟазаашьақәа аҧхьаҟагьы аҿиара шроуа азы.

Владимир Путин:

«Ҳаҭыр зқәу Рауль Џьумка-иҧа, ҳаҭыр зқәу аҩызцәа!

Аҧсны Ахадеи сареи хра злоу аиҿцәажәара мҩаҧаҳгеит. Ишдыру еиҧш, жәы-шықәса раҧхьа игәыҭшьаагоу ахҭысқәа рышьҭахь Урыстәылатәи Афедерациа Аҧсни Алада Уаҧстәылеи рхьыҧшымра азханаҵеит. Убри нахыс арҭ атәылақәа ҳәынҭқарра иашақәаны рышьақәгыларазы иҟаҵаз рацәоуп, алҵшәа бзиақәагьы ҳаухьеит.

Аҧсны – Урыстәыла иапартниор иашоуп, иаҩыза бзиоуп. Ҳара азеиҧш ҭоурыхи адоуҳатә еизаагәареи ҳаидыркылоит. Урыстәыла аҧхьаҟагьы Аҧсны асоциал-економикатә ҿиара иацхраалоит, уи ашәарҭадара иахылаҧшлоит, ганрацәалатәи аполитикатә дгылара анаҭалоит. Аҧсуа ган ахәҭаахьала аҳәынҭқарра ажәларбжьаратә-зинтә статус ашьақәырҕәҕәаразы иақәнагоу ауснагӡатәқәа мҩаҧнагоит. Ҳтәылақәа рминистррақәеи, рпарламентқәеи, ауаажәларратә институтқәеи, атәылаҿацәқәеи реимадарақәа еиҳа-еиҳа рыҽдырҭбаауеит.

Иахьатәи аиҧылараҿы еиҳа хшыҩзышьҭра рыҭан Аҧсны иахьатәи аамҭа иақәшәо, иеффективтәу, ихьыҧшым аекономика змоу ҳәынҭқарраны иҟаларазы иӡбатәу азҵаарақәа. Уи алнаршар ауеит Аинвестпрограмма. 2017-2019 шш. рзы уи иҟанаҵо ацхыраара ашәагаа иартәоит 6 млрд мааҭ.

Урыстәыла, ишаҧу еиҧш, Аҧсны аекономикатә партниорс иҟоуп. Ажьырныҳәа-хәажәкыра амзақәа ирҭагӡаны ҳтауареикәыршара иазҳаит 6,5% рыла. Урыстәылаҟа ицо аҧсуа експорт шьақәдыргылоит раҧхьаӡа иргыланы ашәыри ауҭраҭыхи. 2014 ш. тәылақәак рзы ишьақәҳаргылаз ақәиҭымтәрақәа Аҧсны алшара арҭоит урыстәылатәи аџьармыкьахь инарго аалыҵ ашәагаа аизырҳара.

Анаплакра аганахьалагьы аимадарақәа ҳарҕәҕәаразы ҳаицәажәеит. Уи аҟны аҭыҧ ду аанныркылоит лассы-лассы имҩаҧысуа аурыс-аҧсуа усутә форумқәа. Ари аҩыза аабатәи афорум мҩаҧысраны иҟоуп Аҟәа, ашықәс анҵәамҭазы.

Ишәгәаласыршәар сҭахуп, аурыс банкқәа рыцхыраарала миллиард мааҭк инеиҳаны атуризми, ақыҭанхамҩатәи, афатәи раалыҵқәа ирыдҳәалоу апроектқәа рынагӡара ишаҿу. Уи Аҧсны абиуџьет ахь ашәахтә лагаларақәа реизҳареи, аусуратә ҭыҧқәеи разырҳареи, ауаа рыҧсҭазаашьа аиҕьтәреи алнаршоит. Аҧсны Ахада иқәиргылаз азҵаарақәа ируакуп аҳазалхратә документациа аиқәыршәареи, афитосанитартә маҵзурақәа ргәаҭарақәеи русуреи рыҧҟарақәа рыҧсахра. Сгәы иаанагоит, иаарласны ари азҵаара аӡбара ҳалшап ҳәа.

Рауль Џьумка-иҧеи сареи ҳрылацәажәеит аҩ-ганктәи аиқәшаҳаҭра-зинтә шьаҭа наҟ-наҟтәи аҿиара азҵаарақәа. Шәкы инареиҳаны аиқәшаҳаҭрақәа ҳнапы рыҵаҳаҩхьеит. 2014 шықәсазтәи Аиҩызареи астратегиатә усеицуреи рзы Аиқәшаҳаҭра аҧҟарақәак рынагӡаразы аиқәшаҳаҭрақәа аус рыдулара арццакразы адҵақәа ҟаҳҵеит. Атәылахьчареи, ашәарҭадареи, аҳәаахьчареи, асоциалтә, аекономикатә, агуманитартә усхкқәеи рҟны аусеицура арҭбааразы аусмҩаҧгатәқәа шьаҿа-шьаҿала инаҳагӡоит. Мшқәак раҧхьа Аҧсны Аҳәынҭқарреи Урыстәылатәи Афедерациеи рыҩныҵҟатәи аусқәа русбарҭақәа Ринформациатә-координациатә центр аҧҵаразы аиқәшаҳаҭра аусура иалагеит. Уи хықәкыс иамоуп ацәгьоурақәа ирҿагыланы ақәҧаразы иеицырзеиҧшу аусура ахаҭабзиара ашьҭыхра. Ари ихадоу зҵаароуп, Аҧсныҟа иаауа аҧсшьаҩцәа ршәаҭадарагьы уи иахьыҧшуп. Асоциалтә ҵак ду амоуп иахьа знапы аҵаҩыз Урыстәылатәи Афедерациа хымҧадатәи амедицинатә ҧгаҧсара асистема Аҧсны аларҵәара азҧхьагәазҭо, Аҧсны иқәынхо урыстәылатәи атәылауаа Урыстәыла аҵакырадгьыл аҿы иҟоу амедицинатә усбарҭақәа рҟны амедицинатә цхыраара рыҭара алзыршо аиқәшаҳаҭра.

Иҿиоит акультура-гуманитартә еимадарақәа. 2016ш. нанҳәамзазы Урыстәыла амшқәа мҽхакы ҭбаала Аҧсны имҩаҧысит. Сынтәа Урыстәыла-Аҧсны 2017 захьӡу акультуратә сезон аусмҩаҧгатәқәа рынагӡара иаҿуп. Аиҿцәажәарақәа раан иара убасгьы ҳалацәажәеит Аахыҵ Кавказ ашәарҭадара арҕәҕәара азҵаарақәа, уи иаҧырхагоу аҭагылазаашьақәа рҭышәныртәалараҟны иҟарҵар рылшо ашьаҿақәа ртәы. Уи аус аҟны аҭыҧ ду ааннакылоит Аҧсны иҟоу иеизаку аурыс арратә база. Аҵыхәтәаны агәра го исҳәар сҭахуп, иахьатәи ҳаиҧылараан ҳаззааиз аиқәшаҳаҭрақәа рынагӡара аурыс-аҧсуа еизыҟазаашьақәа наҟ-наҟ рырҕәҕәаразы алагала ду шыҟанаҵо. Ҳаҭыр зқәу Рауль Џьумка-иҧа! Иҭабуп идуӡӡаны ҳәа шәасҳәоит шәареи шәколлегацәеи иаашәырҧшыз асасдкыларазы».

IMG_0831.JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org