Аҧсны Аҳәынҭқарра Ахада

 

Рауль Ҳаџьымба Урыстәылатәи Афедерациа Ахада диҧылеит

08.08.2017

Рауль Ҳаџьымба Урыстәылатәи Афедерациа Ахада диҧылеит

Нанҳәамза 8 рзы Аҧсны Аҳәынҭқарра Ахада Рауль Ҳаџьымбеи Урыстәылатәи Афедерациа Ахада Владимир Путини Пицунда иеиҧылеит.

Рауль Ҳаџьымба:

Ҳаҭыр зқәу Владимир Владимир-иҧа,

Ҳара ҳаҭыр ду шшәықәаҳҵо азгәаҭо, еиҭа аҧсуа дгьыл аҟны бзиала шәаабеит ҳәа шәаҳҳәоит.

Урыстәылатәи Афедерации иҳанаҭо адгылара иабзоураны, Аҧсны асоциалтә-економикатә ҿиара, аинфраструктуратә ргылара амҩа иануп, атәылахьчареи ашәарҭадареи рызҵаарақәа рыӡбара иаҿуп.

Ҧасатәи ҳаиҧылараан Шәареи сареи ҳазлацәажәоз азҵаарақәа рыӡбара мҩаҧысуеит. Инеиҧынкыланы анагӡара иаҿуп Аидгылареи астратегиатә усеицуреи рзы 2014 шықәсаҟнытә Аиқәшаҳаҭра аҧҟарақәа.

Ҷыдала иаҳҳәозар, аҧсуа ган ишьақәнарҕәҕәеит Аинформациа-координациатә центр азы Аиқәшаҳаҭра. Ари аусбарҭа ацәгьоура иаҿагыланы ақәҧаразы акрызҵазкуа акы ауп ҳәа иҳаҧхьаӡоит.

Аҧсназы акраҵанакуеит уи ауааҧсыреи асасцәеи ршәарҭадара.

Аусура мҩаҧысуеит адәныҟаполитикатә усбарҭақәа адәныҟатәи аполитика азҵаарақәа рыҟны русеицура. Имҩаҧысуеит аинвестпрограмма иазҧхьагәанаҭо аусмҩаҧгатәқәа ирызку аусура. Сынтәатәи ашықәс азы аҧаратә хархәагақәа рымҽхак 2,5 млрд мааҭ инареиҳаны иартәоит. Заа иазырхиан, аекспертиза иахысит, иагьышьақәырҕәҕәоуп апроект-сметатә документациа.

Хазы иазгәасҭарц сҭахуп, Аинвестициатә усбарҭа ацхыраарала зыӡбара мҩаҧысуа азҵаарақәа. Акредитқәа рымҽхак иартәеит 1,2 млрд мааҭ. Ари абжьаратәии абизнес дуи рзы цхыраара дууп.

Иахьа иаҵаҩхоит ихымҧадатәиу амедицинатә ҧгаҧсаҟаҵаразы аиқәшаҳаҭра. Ари крызҵазкуа хҭыс дууп Урыстәылатәи Афедерациа иатәылауаау Аҧсны ауааҧсыра рзы. Агәра ганы сыҟоуп иахьа ҳазлацәажәараны иҟоу азҵаарақәа зегьы шәтәыла аҿиаразы алшарақәа ишрыцнаҵо. Аҧсны жәлар гәыкала иҭабуп ҳәа шәарҳәоит ҳаизыҟазаашьақәа рырҿиара иацхраауа аӡбамҭақәа рзы. Даҽазныкгьы иазгәасҭар сҭахуп иахьа ҳазлацәажәо, иӡбахо азҵаарақәа ҳаизыҟазаашьақәа рырҕәҕәара ишацхраауазы.

Исымҳар ҟалом, иахьатәи амш, нанҳәамза 8, ари Алада Уаҧстәыла Ареспубликеи Аҧсни рзы хашҭра зқәым рыцхәуп. Абри аҽны ақырҭуа ар мҽхакыҭбаала аоперациа ианалагази Урыстәыла анапхгара уи аҿагыларазы имҩаҧыргаз ажәылареи ирыбзоураны Алада Уаҧстәыла Ареспублика аиқәырхара алыршан. Ҳәарада, уинахыс ҳҳәынҭқаррақәа разхаҵаразы алшарагьы ҟалеит. Ари азы иҭабуп ҳәа шәаҳҳәоит.

Владимир Путин:

"Рауль Џьумка-иҧа, сара сзы гәахәароуп Аҧсны, аҧсуа дгьыл аҟны сахьыҟоу. Сеигәырҕьоит еиҭа шәара шәҿы сыҟазаара. Шәара, шамахамзар, ҳусеицура ахырхархарҭақәа зегьы еиқәышәыҧхьаӡеит. Иазгәасҭар сылшоит ареспублика ахьчаралшара аиҿкаара аганахьала ҳусеицура атәы. Еидҵоу агәыҧ ауасхыр ду азышьҭоуп, аҧхьаҟатәи ашьаҿақәа ҳрылацәажәахьеит. Шәара уажәы Аинформациатә центр аӡбахә шәҳәеит. Ҳәарада, ари акрызҵазкуа усмҩаҧгатәуп, избан акәзар Аҧсны атәылауаагьы, иахьынтәаалак асасцәагьы, Урыстәылатәиқәагьы уахь иналаҵаны, ишыхьчоу рдыруазароуп, ргәы ҭынчзароуп. Сгәы иаанагоит ари ҳусеицура арахь иаауа атуристцәа ршәарҭадара аҩаӡара иацнаҵоит, иарҕәҕәоит ҳәа. Аекономикатә усура атәы ҳҳәозар, Шәара урҭ ахырхарҭақәа зегьы азгәашәҭеит. Урҭ реиқәыҧхьаӡара аҭахны иҟаӡам. Асоциалтә ҟәша азы, ҳара иахьа ҳнапы аҵаҳҩуеит амедицинатә ҧгаҧсаҟаҵара асистема ахархәаразы алшара адагьы, раҧхьа иргыланы урыстәылатәи агәабзиарачаҧарҭақәагьы рхархәаразы Аҧсны атәылауаа алшара рызҭо аиқәшаҳаҭра. Ҳара ҳазлацәажәо ҳамоуп, аха зегь раасҭа ихадараны иҟоу, Аҧсни ҳареи ҷыдалатәи аизыҟазаашьақәа ахьҳабжьоу ауп. Ҳара Аҧсны ашәарҭадара, ахақәиҭра, ахьыҧшымра набыцра ақәымкәа аҟазааразы аҭагылазаашьа аҧаҳҵоит. Амала, Аҧсны аекономика арҿиаразы еиҳа еиҕьу амҩақәа ҧшаатәуп аусурҭа ҭыҧ ҿыцқәа раҧҵаразы, ашәахтәқәҵаратә база ҿыц аҧҵаразы. Абри ҳагьалацәажәап иахьа.   


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT