Аҧсны Аҳәынҭқарра Ахада

 

Аҧсны Жәлар рышәҟәыҩҩы, Д.И. Гәлиа ихьӡ зхыу Аҳәынҭқарратә премиа алауреат, «Ахьӡ-аҧша» аорден I аҩаӡара занашьоу Алықьса Гогәуа идныҳәалара

15.03.2017

Аҧсны Жәлар рышәҟәыҩҩы, Д.И. Гәлиа ихьӡ зхыу Аҳәынҭқарратә премиа алауреат, «Ахьӡ-аҧша» аорден I аҩаӡара занашьоу Алықьса Гогәуа идныҳәалара

Ҳаҭыр зқәу Алықьса Ноча-иҧа!

Гәык-ҧсыкала ишәыдысныҳәалоит шәиижьҭеи 85 шықәса аҵра , ишәзеиҕьасшьоит агәамч ҕәҕәа, агәалаҟара бзиа, шәнапы злакыу арҿиаратә усураҿы ҧхьаҟатәи аихьӡара ҿыцқәа! Шәара шәеицырдыруеит Аҧсни, уи анҭыҵи иналыукааша ажәа азҟазак иаҳасабала.

Баҩхатәра ҳаракла иаҧҵоу шәыпрозатә ҩымҭақәа аҭыҧ ҷыда ааныркылоит аҧсуа литература аҿиареи, аизҳа-зыҕьареи рыпроцесс аҿы. Урҭ амҩа ҭбаа азаадыртит ҳмилаҭтә литература асоциалтә-ҧсихологиатә, афилософиатә хырхарҭа. Шәырҿиамҭақәа ирныҧшит ҳаамҭазтәи ауаҩытәыҩса иҩныҵҟатәи идунеи амаӡақәа, ҳажәлар рдоуҳатә ҧсҭазаара ахыҵхырҭақәа. Шәнапы иҵшәыжьхьеит адраматургиатә рҿиамҭақәа, иара убас аҧсшәахь ҟазара ҳаракыла еиҭагоу аҳәаанырцәтәи асахьаркыратә ҧҵамҭақәа жәпакы.

Жанрла еиуеиҧшым иреиҕьыу шәаҧҵамҭақәа «Аӡиас ццакуеит амшынахь», «Аси амацәыси», «Шьха-ҧшӡа», «Аӡы агьама», «Асыс-мҟаа», «Мшәагә - хәыҷи Мшәагә –дуи», «Аҽыкәаҳа», «Асду» уҳәа егьырҭгьы ахәшьара ҳаракы роухьеит аҧхьаҩцәеи, аҵарауааи, акритикцәеи рыҩныҵҟа, урҭ еиҭагоуп аурысшәахь, иара убас егьырҭ аҳәаанырцәтәи амилаҭтә бызшәақәа рахь.

Шәара шәалахәын амилаҭтә-хақәиҭратә қәҧара. 1988 ш. инаркны, такәаамҭа напхгара ашәҭон Аҧсны жәлар Рфорум «Аидгылара» – ихьыҧшым ҳҳәынҭқарра ашьақәгылараҿы ароль ду назыгӡаз. Шәалхын СССР жәлар рдепутатс. Напхгара рышәҭон ахәыҷтәы журнал «Амцабз», Аҧсны ашәҟәыҩҩцәа Реидгыла. Иахьа хантәаҩра азыжәуеит Д.И. Гәлиа ихьӡ зху Аҳәынқарратә премиа азы Ахеилак.

Даҽазныкгьы ишәзеиҕьасшьоит шәиубилеитә ныҳәамш, агәабзиара ҕәҕәа, аҧсуа шықәсынҵыра наӡа, арҿиаратә гәацҧыҳәара ду!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT