Аҧсны Аҳәынҭқарра Ахада

 

Очамчыра араион усуратә визитла аҭаара

20.11.2015

Абҵара 19 рзы Ахада Рауль Ҳаџьымба усуратә визитла Очамчыра араион даҭааит.

Ахада дицын Очамчыра араион Аусбарҭа ахада Хьрыҧс Џьопуа.

Рауль Ҳаџьымба дахәаҧшит амшынҿықәрҕәҕәаразы аусура ахьымҩаҧгатәу абаҕәаза иаҧну аҧшаҳәа.

Анаҩс аҳәынҭқарра Ахада игәеиҭеит Очамчыратәи абжьаратәи ашкол № 4 иаҵанакуа аҭыҧи ақалақь егьырҭ аобиектқәеи рыҟны акоммуникациеи аӡымҩангагақәеи реиҭашьақәыргылареи ррыцқьареи ирыдҳәаланы имҩаҧысуа аусурақәа.

Рауль Ҳаџьымба ибзиоуп ҳәа азиҳәеит имҩаҧгоу аусурақәа рылҵшәақәа, аха иаҵшьны иҳәеит анхамҩатә маҵзурақәа макьана иҟарҵаша шырацәоу «Арҭ аусурақәа аҵыхәанӡа инагатәуп. Ҳара ақәоурақәа рышьҭахь аҩнқәеи ауаажәларратә хыбрақәеи ирыҵало аҩарқәа иахьынӡауа ирыгҳархароуп», - иҳәеит Рауль Ҳаџьымба.

Хьрыҧс Џьопуа Ахада иҟынӡа инеигеит ақалақь адәахьтәи аҧшра аиҕьтәразы имҩаҧысуа аусурақәа шымҩаҧысуа атәы. Араион ахада иаҧшьгарала амшын аҧшаҳәа иаҧныз ихыбгалаз, иблыз аргыларақәа ықәган. "Аусурақәа зегьы мҩаҧган излауалаp араионтә биуџьет ахарџь ҧкны. Акраҵанакуеит атәыла анапхгара ақалақь аҧшра аиҕьтәразы ҳгәазыҳәарақәа адгылара ахьарҭо», - иазгәеиҭеит Хьрыҧс Џьопуа.

Ахада иара убас дырҭааит ачаитә плантациақәа Мықә ақыҭан. Хьрыҧс Џьопуа аҳәынҭқарра Ахада иеиҳәеит иааиуа ашықәс азы араион анапхгара иазҧхьагәаҭаны ишрымоу 600 гектар инарзынаҧшуа ачаи еиҭаҳатәқәа реиҭашьақәыргылара. «Ари ақыҭауаа рзы аусурҭа ҭыҧқәа раҧҵаразы алшара ҳнаҭоит, ачаи фабрика аусура иалагоит", - иҳәеит араион ахада.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org