Аҧсны Аҳәынҭқарра Ахада

 

Кавказ ажәларқәа Урыстәылатәи Рконгресс Апрезидиум ахантәаҩы Али Тоторкулов иҧылара

16.11.2015

Аҟәа, 11.00

Ахада Рауль Ҳаџьымба Азеиҧшурыстәылатәи ауаажәларратә еиҿкаара «Кавказ ажәларқәа Урыстәылатәи Рконгресс» (КАУР) ахантәаҩы Али Тоторкулов диҧылеит.

КАУР аҧҵан 2007 шықәса хәажәкырамзазы амилаҭбжьаратә дилог, кавказтәи ажәларқәа руаажәларратә хаҭарнакра аҭышәныртәалареи аҿиареи, ауаажәларреи аҳәынҭеилазаарақәеи реидкылара, кавказаа реилаҵәареи, урҭ рылшарақәа Урыстәыла рхархәареи ацхыраара рыҭара хықәкыс иҟаҵаны. Аиҧылараҟны ирылацәажәан Аҧсни Урыстәыла иаҵанакуа Нхыҵ Кавказ ареспубликақәеи ргәылеимабзиаратә еизыҟазаашьақәа рышьақәырҕәҕәара, Кавказ ажәларқәа рмилаҭтәи ркультуратәи хаҿра аиқәырхара азҵаарақәа. «Кавказтәи ацивилизациа Аҧсны ихацыркын, ара хымҧада иеиқәхароуп азеиҧшкавказтәи культура», - иазгәеиҭеит Али Тоторкулов.

Рауль Ҳаџьымба иаҵшьны иҳәеит Нхыҵ Кавказ аиашьаратә жәларқәа рыбжьара аекономикатәи, агуманитартәи, акультуратәи еимадарақәа рышьақәырҕәҕәара атәыла анапхгара ҧыжәара зырҭо акы акәны ишыҟоу. Уи иазгәеиҭеит нхыҵкавказтәи хатәгәаҧхаралатәи аидгыларақәа 1992-1993 ш. Аҧсны жәлар Рџьынџьтәылатә еибашьраан иргаз аиааираҟны рлагаламҭа ду атәы.

Аиҧылара иалахәын иара убас Ахада ихаҭыҧуаҩ Витали Габниа, аекономикатә зҵаарақәа рзы Ахада Иабжьагаҩ Амиран Лагәлаа.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org