Аҧсны Аҳәынҭқарра Ахада

 

Аҧсны Аконституциа Амш инамаданы Ахада иҟнытә адныҳәалара

26.11.2015


Акыр иаҧсоу ҳауаажәлар!

Шәара ибзианы ижәдыруеит, ишәгәалашәоит иахьа ныҳәамшны иазгәаҳҭо Аҧсны Аконституциа Амш иацыз ауадаҩрақәа. Уи ианыҧшит ҳара ҳхьыҧшымра, ҳхақәиҭра, ҳбызшәа, Аҧсны аҳәынҭқарра аполитикатә система аиҿкаашьа уҳәа, шәышықәсала ҳажәлар ззыҧшыз, иззықәҧоз азҵаарақәа. Ҳажәлар ирхыргеит агәаҟра бааҧсы, амлакра, ахьҭакра, аха ршьамхы адмырсит ампыҵахалаҩцәа рҿаҧхьа. Аҧсны аҵеицәа ирылдыршеит ҳтәыла ахьыҧшымра ашьақәыргылара. Ҳәарас иаҭахузеи, ашьа ҕәҕәа азкаҭәаны Аиааира згаз Аҧсынтәыла, азин аман Ахатәы Конституциа ҿыц адкылара. Ус иагьыҟалеит, аџьабаа адбаланы, ҳаҧсадгьыл астратегиатә интересқәа еилыхха ианырҧшны, Владислав Арӡынба инапхгарала, демократиатә ҟазшьала иалырххьаз Актәи Жәлар Реизара-Апарламент 1994 шықәсазы иаднакылеит Аҧсны Аконституциа Ҿыц - Азакәан Хада. Уи иеицырдыруа аполитикцәа, аиуристцәа аӡәырҩы рыхшыҩ неилаҵаны изызкылсыз документуп.

Абар ҩажәа шықәса рыҩныҵҟа ҳзықәныҟәо, хсаалас иҳамоу, аҩныҵҟатәи ма адәныҟатәи проблемак анҳамоу ҳазхыҧшыло шәҟәуп, мҩақәҵагоуп ари Азакәан Хада.

Сгәы иаанагоит, аринахысгьы ихадароу, ишьагәыҭу уи ахәҭаҷқәа кьыс рымамкәа, ҳазну ахьыҧшымра амҩаҿы ҳусқәа арманшәалалоит ҳәа жәлар рықәҧара, рдунеихәаҧшра, рхьаа, рыгәҭыха иалҵыз Аҧсны Аҳәынҭқарра Аконституциа.

Гәык-ҧсыкала ишәыдысныҳәалоит ҳиааиреи ҳхақәиҭреи ирсимволу иахьатәи Амш! Ишәзеиҕьасшьоит агәамч ҕәҕәа, аманшәалара, аихьӡара ҿыцқәа шәызну амҩаҿы!

Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org