Аҧсны Аҳәынҭқарра Ахада

 

Ҭамара Шьаҟрыл лгәалашәара амш

12.11.2015

Аҟәа, 12.00

Рауль Ҳаџьымба Ҭамара Шьаҟрыл - иеицырдыруа аҵарауаҩ, ауаажәларра-политикатә усзуҩы, азинхьчаҩ, Аҧсны Афырхаҵа лмемориалтә ҕәы амҵан ашәҭшьыҵәрақәа шьҭеиҵеит.

Абҵара 11 Ҭамара Шьаҟрыл лҭахара иашықәсны иазгәарҭоит.

Ажурналистцәа рызҵаарақәа рҭакқәа ҟаҵо, Ахада иаҵшьны иазгәеиҭеит Ҭамара Шьаҟрыл Аҧсны жәлар рмилаҭ-хақәиҭратә қәҧараҟны иаанылкыло аҭыҧ ду атәы.

«Ҭамара Платон-иҧҳа - Аҧсны апатриот ду, Аҧсуа ҳәынҭқарра ашьақәгылара аус аҟны илылшаз ахә ашьара уадаҩуп, насьы уи - аӡәырҩы рыбжьы ҭыганы аҧсуа жәлар рҿахәы аҳәара ианацәшәоз аамҭазы. Усҟан аамҭа уадаҩын Аҧсназы, ҳажәлар рылшарақәа аадырҧшыртә аҭагылазаашьа ыҟамызт, ҳаҧсадгьыл азы аиаша аҳәара мариамызт.Ҭамара Шьаҟрыл – агәаҕьра змаз, даара згәы ҭбааз уаҩын», - иҳәеит Рауль Ҳаџьымба.

Ахада иара убас иазгәеиҭеит, 2014 шықәсазы Ҭамара Шьаҟрыл лыхьӡ акамыршәразы иаҧҵаз Акомиссиа аусура ишаҿу. Иҳәеит Ҭамара Шьаҟрыл лыхьӡ акамыршәразы Акомиссиа иазнархиаз аусмҩаҧатәқәа разҧхьагәаҭа хымҧада ишынагӡахо. «Уи Ҭамара Шьаҟрыл лыхьӡала абаҟа аргылара мацара акәӡам. Ҭамара Платон-иҧҳа лыхьӡ, лус еиқәырханы аҧхьаҟатәи абиҧарақәа рахь ииасроуп», - иҳәеит Ахада.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org