Аҧсны Аҳәынҭқарра Ахада

 

Аҧсны Ахада Рауль Ҳаџьымбеи Алада Уаҧстәыла Ахада Леонид Тибилови реиҧылара.

20.09.2015

Иацҵоуп Ахада Рауль Ҳаџьымба Алада Уаҧстәыла официалтә визитла иаҭаара.

Цхинвал ақ. аҟны имҩаҧысит Ахада Рауль Ҳаџьымбеи Алада Уаҧстәыла Ахада Леонид Тибилови реиҧылара.

Аҧсуа ган аҟнытә аиҧылара иалахәын Ашәарҭадара Ахеилак Амаӡаныҟәгаҩы Муҳамед Кьылба, Аладауаҧстәылатәи аган аҟнытә – Ахада Иусбарҭа Анапхгаҩы Алан Джиоев, Адәныҟатәи аусқәа рминистр Казбулат Цховребов, Ахада иҳәынҭқарратә абжьагаҩы Давид Санакоев, Аҧсны иҟоу Алада Уаҧстәыла Ареспублика Аҷыдалкаатәи Амчнаӡа змоуи Ацҳаражәҳәаҩ Олег Боциев.

Рауль Ҳаџьымба Леонид Тибилов иҭабуп ҳәа иеиҳәеит Алада Уаҧстәыла Ареспублика ашьақәгылара 25 шықәсахыҵра иадҳәалоу аныҳәатә усмҩаҧгатәқәа рыҽрылархәразы иҟаиҵаз ааҧхьаразы. Ахада Леонид Тибилови Алада Уаҧстәыла ажәлар зегьи ирыдиныҳәалеит рмилаҭтә ныҳәа.

«1990 шықәса цәыббрамза 20 аҭоурыхтә ҵакы змоу мшуп. Алада Уаҧстәыла автономтә республика жәлар рдепутатцәа Рхеилак зхы иақәиҭу Алада Уаҧстәыла Ареспублика анрыланаҳәаз амш аҵакы ду змоу хҭысны иҟалеит Алада Уаҧстәыла ахақәиҭра наӡеи ахьыҧшымреи риуразы изныз амҩаҟны, - иазгәеиҭеит Рауль Ҳаџьымба. – Аладауаҧстәылатәи ажәлар знысыз амҩа Аҧсны жәлар знысыз амҩеиҧш ихьанҭоуп. Ҳара ҳажәларқәа ауадаҩрақәа маҷымкәа ирхыргеит. Аха илаҳхыз амҩа ҳацәхьаҵраны ҳаҟаӡам».

Ахада иара убас иазгәеиҭеит, «иахьа Алада Уаҧстәыла ашәарҭадареи, шьаҿа ҕәҕәала аҭышәынтәалареи, асоциалтә-економикатә ҿиареи рымҩа иануп» ҳәа.

Леонид Тибилов Аҧснынтәи иааз аделегациа иҭабуп реиҳәеит Алада Уаҧстәылаҟа ааҧхьара аҭакс уи иахьаҭаа, аныҳәатә усмҩаҧгатәқәа рҽахьрыладырхәыз азы. «Ҳара ҳзы гәахәароуп есқьынгьы Аҧсны аиҭакра бзиақәа анымҩаҧысуа, урҭ лабҿаба иубартәгьы иҟоуп. Иахьа аус дуқәа шәаҧхьа ишьҭоуп, агәра ганы сыҟоуп Шәара шәнапхгарала шәгәы иҭакқәоу, иазҧхьагәашәҭаз зегьы хымҧада ишынагӡахо. Ҳара иҳалшо зегьы ҟаҳҵоит ҳҳәынҭқаррақәа рыбжьара ишьақәгыло аизыҟазаашьақәа ҳажәлар ринтересқәа ирызку аҵакы ҿыцқәа рыла ихаҭәааларц азы», – иҳәеит Алада Уаҧстәыла Ахада.

Леонид Тибилов ҷыдала иазгәеиҭеит, Рауль Ҳаџьымба раҧхьаӡакәны Аҧсны Аҳәынҭқарра Ахада иаҳасабала Алада Уаҧстәыла дшаҭааз.

Ҩ-тәылак рхадацәа иаҵшьны ирҳәеит, адунеи аҟни Нхыҵкаваказтәи арегионқәа рыҟни аҭагылазаашьақәа аныуадаҩу, ҿыц ицәырҵуа ашәарҭарақәа раан Аҧсни Алада Уаҧстәылеи рзы Урыстәыла аҩызара аҵакы акырӡа ишазҳауа. «Сгәы иаанагоит Урыстәылеи ҳареи иҳабжьаҳҵаз Аиқәшаҳаҭрақәа ашәарҭадареи атәылахьчареи, иара убас Аҧсни Алада Уаҧстәылеи рсоциал-економикатә ҿиареи даҽа ҩаӡара ҿыцк ашҟа риагара алдыршоит ҳәа», - иазгәеиҭеит Рауль Ҳаџьымба.

Аиҧылараҟны иара убас ирылацәажәан ҩ-тәылак русеицура аҿиара азҵаарақәа. "Ҳҿаҧхьа иқәгылоу ауснагӡатәқәа ируакуп аҧсуа-аладауаҧстәылатәи ауаатәҩсатә еимадарақәа рышьақәырҕәҕәареи реизырҳареи", - иҳәеит Рауль Ҳаџьымба .

Аиҧылара ахыркәшамҭаз Леонид Тибилов Рауль Хаџьымба инапы иаиркит Аиҩызара Аорден Аҧсни Алада Уаҧстәылеи рыжәларқәа реиҩызареи русеицуатә еиыҟазаашьақәа рырҿиареи рышьақәырҕәҕәареи рыҟны хаҭала илагаламҭази иара убас Алада Уаҧстәыла Ареспублика ашьақәгылара 25-шықәсахыҵреи инарымаданы. Аҧсуа делегациа иалахәыз Алада Уаҧстәыла Ареспублика 25 шықәсахыҵра иазкны иранашьан амедалқәа.

Афото: © Sputnik/ Алексеи Никольски


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org