Аҧсны Аҳәынҭқарра Ахада

 

Рауль Ҳаџьымба Тҟәарчал ақалақьи Аҧсны ашколхәыҷқәа зегьи Адырра амш рыдиныҳәалеит

01.09.2015

Рауль Ҳаџьымба Тҟәарчал ақалақь ашколқәа дырҭааит, арҵаҩцәеи, ашколхәыҷқәеи, аҭаацәеи ирыдиныҳәалеит аҵарашықәс ҿыц алагамҭа.

Ахада дицын Тҟәарчал араион ахада Аида Чачхалиа.

Ишкол гәакьа Алеқсеи Аршба ихьӡ зху ахәбатәи абжьаратә школ аҟны арҵаҩцәа ихы рықәкны Ахада иҳәеит: “Раҧхьа инаргыланы, Аҧсны ашколхәыҷқәеи арҵаҩцәеи ишәыдысныҳәалоит аҵарашықәс ҿыц алагамҭа. Арҵаҩы иџьабаа даара иуадаҩу, аха убри аангьы ҵакы ду змоу акоуп. Шәара ахәыҷқәа ирышәҭо адыррақәа рыдагьы, зегь реиҳа ихадараны иҟашәҵо, абзиабара, ауаҩра, аразра, аҧсадгьыл абзиабара ахьрылашәааӡо ауп. Шәара ишәыбзоураны урҭ уаа бзиақәаны ирызҳауеит, иара убас ҳтәыла иаҧсаны, ҵеицәа иашақәаны гылоит».

Рауль Ҳаџьымба иара убас далахәын Иури Воронов ихьӡ зху абжьаратә ашкол №2 , Кьыршьал Чачхалиа ихьӡ зху абжьаратә ашкол №1, Баграт Шьынқәба ихьӡ зху абжьаратә ашкол № 4 аҟны Адырра амш иазкыз агәырҕьаратә цәаҳәа. Ахада ашколқәа рырҵаҩцәа драцәажәеит, иазгәеиҭеит арҵаҩратә еилазаара иубартә есааира ишқәыҧшхо. «Аспециалистцәа ҿарацәа рықалақьқәа рышҟа ихынҳәлароуп,аҳәынҭқарра иалшо зегьы ҟанаҵалоит урҭ адгылара рыҭаразы», - абас агәра диргеит Ахада. Рауль Ҳаџьымба иаҵшьны иҳәеит арҵаҩы иџьабаа иақәнагоу ахәшьара шаҭатәу. «Ҳазҭагылоу аамҭазы атәылаҟны аекономикатә ҭагылазаашьа акыр иуадаҩуп. Ҳара ҳашколқәа рыдагьы, атәыла зегьы ахаҿра аҧсахра ҳҽазаҳшәоит», - иҳәеит Ахада.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org