Аҧсны Аҳәынҭқарра Ахада

 

Аҧсны Аҳәынҭқарра жәларбжьаратәи азхаҵара Амш адныҳәалара

26.08.2015

Акыр иаҧсоу аџьынџьуаа!

Гәык-ҧсыкала ишәыдысныҳәалоит Аҧсны Аҳәынҭқарра жәларбжьаратәи азхаҵара Амш ныҳәа!

Быжьшықәса раҧхьа, 2008 шықәса нанҳәамза 26 рзы Д.А.Медведев инапы аҵаиҩит Аҧсны Аҳәынҭқарра азхаҵара иазку Аусҧҟа. Аҧсны жәларбжьаратәи астатус акырӡа ишьақәырҕәҕәахеит, Нхыҵ Кавказ аполитика-зинтә ҭагылазаашьа шьаҭанкыла аҽаҧсахит. Аҧсни Алада Уаҧстәылеи разхаҵара иазкыз имариамыз, аха ииашаз аӡбамҭа адкыланы, Урыстәыла адунеи аҟны ҧыжәара змоу аҳәынҭқарра астатус шьақәнарҕәҕәеит.

Ҳтәылуаа рфырхаҵарала, ршьала, есҽнытәи рџьа ала анагӡара алыршахеит Аҧсны жәлар рыгәҭакы. «Иарбанзаалак иаҳхаҳго амш, инаҳагӡо аус, анс акәу арс акәу, азхаҵара амш ҳазааигәанатәуеит », - иҳәон аҧсуа ҳәынҭқарра ашьаҭаркҩы Владислав Арӡынба. Уи 1990-тәи ашықәсқәа раангьы Урыстәылатәи Афедерациа Аҧсны азханаҵараны ишыҟоу атәы иҳәахьан.

Аҧсны Урыстәылатәи Афедерациа аганахьала иаиуз азхаҵара иалнаршеит ирццакны аҿиара. Иҟаҵоу рацәоуп аҧсуа-аурыс еизыҟазаашьақәа хаҭәааны рышьақәыргыларазы. Иахьагьы аҿиара мҩаҧысуеит аҧсуа-аурыс усеицура иазку аиқәшаҳаҭра-зинтә база, рыҽдырҭбаауеит аекономикатәи агуманитартәи еимадарақәа, есааира иҵаулахоит атәылахьчареи ашәарҭадареи рыҟәшаҟны аусеицура. Аидгылареи астратегиатә усеицуреи рзы Аиқәшаҳаҭра ианаҵаҩха анаҩс аҧсуа-аурыс еизыҟазаашьақәа хаҭабзиарала иҿыцу аҩаӡарахь ихалеит. Уи Аҧсни Урыстәылеи ажәларқәа ринтересқәа ирықәшәоит.

Иахьа ҳҿаҧхьа уснагӡатәны иқәгылоуп ирццакны асоциалтә-економикатә ҿиара алыршара, аҳәынҭқарратә еиҿкаарақәа зегьрыла рышьақәырҕәҕәара, ауаажәларратә ҧсҭазаара аҟәшақәа зегьы рырҿыцра. Шықәсқәак рыла ахалафинансыртәра аҩаӡарахь ахалара, атәылахьчареи ашәарҭадареи рырҕәҕәара, акырӡа зҵазкуа азакәан ҧыжәара аҭара ашьақәырҕәҕәара алыршатәуп. Ари аҭахуп иара убас Аҧсны Аҳәынҭқарра Урыстәыла иадгылоу ихаҭәаанагӡоу, аҭакзыҧхықәу ҳәынҭқаррак аҳасабала жәларбжьаратәи аполитикаҟны ақәгыларазы , иара убас егьырҭ атәылақәа иазхарҵарц азы ҵаҵҕәы аманы иҟаларц азы.

Агәра ганы сыҟоуп, ҳҳәынҭқарра амчала, шәаргьы ҳаргьы ҳамчала, Урыстәылатәи Афедерациа иаҳнаҭо адгылара иабзоураны Аҧсны атәылауаа рзы акрызҵазкуа алҵшәа бзиақәа ҳауп ҳәа.

Акыр иаҳзаҧсоу ҳџьынџьуаа, абри амш ссир аҽны ишәзеиҕьасшьоит аҭынч ҧсҭазаара, аҭышәынтәалара, аизҳазыҕьара.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org