Аҧсны Аҳәынҭқарра Ахада

 

Гәылрыҧшь араион усуратә визитла аҭаара

24.08.2015

Агәуӡера, 10.00

Ахада Рауль Ҳаџьымба Гәылрыҧшь араион даҭааит усуратә визитла.

Агәуӡера аҳаблаҟны Ахада дырҧылеит Донецктәи Жәлартә Республикаҟнытә Аҧсны зыҧсы зшьоз аҿар ргәыҧ.

Аиҧылара иалахәын иара убас Гәылрыҧшь араион аусбарҭа Ахада Аслан Бараҭелиа, Жәлар Реизара адепутат Саид Ҳаразиа.

Рауль Ҳаџьымба ДЖӘР аҟнытә аибашьра иалҵны иааз аҿар данрацәажәоз иҳәеит Аҧсны зҿлымҳара ду аҭаны ишазнеиуа ртәылаҟны имҩаҧысуа апроцессқәа: «Ари телехәаҧшрала мацара избо, аҵыхәанӡа аибашьра иацу ахьаа, агәырҩа рзеилымкааргьы ҟалоит. Ҳара 1992-1993 шш. раан иаҳхаҳгеит уажәы шәара шәызҭагылоу, убри аҟнытә даҽаӡәы иеиҧшымкәа шәара ишәныруа бзианы иеилаҳкаауеит».

Ахада Алада-Мрагыларатәи Украина иҟоу аимак ҭышәынтәалап ҳәа агәыҕра шимоу иҳәеит, ДЖӘРеи ЛЖӘРеи ауааҧсыра ирзеиҕьеишьеит аҭынчра, аманшәалара.

Донецкынтәи иааз, ДЖӘР Жәлар Рхеилак адепутат Андреи Мирошниченко иаҵшьны иҳәеит ДЖӘРи Аҧсни ирыбжьоу агәыҳалалратә еимадарақәа ирымоу аҵакы ду. «ДЖӘР, Аҧсныҟа иааз зегьы ҳахьӡала Аҧсны Аҳәынҭқарра, Шәара атәыла анапхгаҩы иаҳасабала иҭабуп ҳәа шәасҳәоит гәаартыла ҳахьшәыдышәкылаз азы», - иҳәеит иара.

Рауль Ҳаџьымба аусуратә визит аҳәаа иҭагӡаны даҭааны ибеит Гәылрыҧшьтәи абжьаратә школ. Ахада иазгәеиҭеит зҭагылазаашьа уадаҩу ашкол аиҭашьақәыргыларазы аҧаратә хархәагақәа рзоужьра шаҭаху атәы.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org