Аҧсны Аҳәынҭқарра Ахада

 

Аҧсны Аҳәынҭқарраҟны урыстәылатәи аџьынџьуаа аурыс уаажәларра акоордианциатә хеилак ахаҭарнакцәа рҧылара

21.08.2015

Аҟәа, 15.00

Ахада Рауль Ҳаџьымба Аҧсны Аҳәынҭқарраҟны урыстәылатәи аџьынџьуаа аурыс еидгылара акоордианциатә хеилак анапхгареи ахаҭарнакцәеи идикылеит.

Аиҧылара далахәын иара убас Аҧсны иҟоу Урыстәыла Ацҳаражәҳәаҩ Семион Григориев, Ахада Иусбарҭа Анапхгаҩы Асҭамыр Ҭаниа, Аҧсны иҟоу Урысусециура Ахаҭарнакра Анапхгаҩи Ахада Иусбарҭа Аексперттә усбарҭа аиҳабы Иракли Хынҭәба.

Рауль Ҳаџьымба аиҧылара аартуа, иҳәеит Аҧсны аетносбжьаратә еизыҟазаашьақәа рырҕәҕәареи реинырнаалареи рзы аусура аҵакы ду атәы. «Аетность гәыҧқәа рыбжьара аизыҟааашьа, аиҳабыра амчқәеи аетностә гәыҧқәеи реизыҟазаашьа еинырнааланы иҟазароуп. Аурыс еидгылара иахьа ҳуааажәларра иахәҭакны иҟоуп. Рыцҳарас иҟалаз, уи иахьа излашьақәгылоу еиҳарак абиҧара еиҳабацәа рылоуп, аӡәырҩы 1990 шықәсазы иқәҵны ицахьан. Аҧсны иҟоу Урыстәыла Ацҳаражәҳәара иҟанаҵо рацәоуп аурыс уаажәларра апроблемақәа рыӡбаразы, аха арҭ азҵаарақәа ӡбазароуп, иӡбазароуп ҳҳәынҭқарра азеиҧш социалтә-економикатә политика инақәыршәаны. Аурыс уаажәларра акны иҟазароуп иара аҩныҵҟа, иара убас аҧсны жәлари иареи еимадазароуп, атәылаҟны имҩаҧысуа апроцессқәа анырра аҭара алшозароуп, урҭ ирылахәзароуп», - иҳәеит Ахада.

Рауль Ҳаџьымба иара убас дазааҭгылеит урыстәыла-аҧснытәи аизыҟааашьақәа: «Аӡәы ҳаизыҟазаашьақәа рҽеиҭаркит ҳәа игәы иаанагозаргьы, уи ус иҟаӡам. Ҳаизыҟазаашьақәа есҽны аҿиара, аҽырҭбаара иаҿуп».

Аҧсны иҟоу Урыстәыла Ацҳаражәҳәаҩ Семион Григориев Ахада иҭабуп ҳәа иеиҳәеит ари аиҧыларахь ииҭаз ааҧхьаразы. «Аҵыхәтәантәи ашықәсқәа рзы раҧхьаӡакәны абас Ахада аурыс уаажәларра дырҧылоит. Ари Аҧсны анапхгара амилаҭтә уаажәларрақәа рыпроблемақәа ирырҭо азҿлымҳара аныҧшуеит. Аурыс уаажәларра аҿаҧхьа иқәгылоу апроблемақәа маҷӡам, аха аурыс уаажәларра Аҧсны ауаажәларра иузаҟәымҭхо иадҳәалоуп, убри аҟнытә, ганкахьала, апроблемақәа акыр ҳаицхырааны рыӡбара ҳалагоит. Егьырҭ, Аҧсны иқәынхо аурыс уааҧсыра мацара ирыдҳәалоу апроблемақәа, Шәара хаҭала, атәыла анапхгара гәцаракра иашәҭо азгәаҭаны, Урыстәыла Ацҳаражәҳәара, Акоординациатә Хеилаки Урысусеицуреи еидгыланы шьаҿа-шьаҿала рыӡбара мҩаҧыслоит», - иҳәеит Семион Григориев инаҵшьны.

Акоординациатә Хеилак Ахантәаҩы Игор Лишьенко игәаанагарала, аурыс уаажәларра рҿаҧхьа иқәгылоу апроблема хадақәа рыӡбара иаҿуп. «Аурысқәа – милаҭрацәала иеилоу ҳажәлар ирыхәҭакуп. Ҳара зегьы аус еицаҳуеит Аҧсны ҿиаларц, иҕәҕәхарц азы. Ҳара даара ахә ҳаракны иаҳшьоит атәыла анапхгара зҿлымҳара иаҳзыруа», - иҳәеит Игор Лишьенко.

Игор Лишьенкои егьырт аиҧылара иалахәызи иазгәарҭеит аџьынџьуаа ахаҭарнакцәақәак Аҧсны иҟоу аурысқәа рзинқәа рырҭшәаразы иҟарҵо ҳәамҭақәак аринахыс ишыҟамлар акәу. Уи игәаанагарала, ас еиҧш аҳәамҭақәа апровакациатә ҟазшьа рымоуп, урыстәылатәи аџьынџьуаа рыҩныҵҟа аҳәоуеиқәымшәарақәа рырҕәҕәароуп изызку. Ҳара иҳадаҳкылаӡом ирадикалтәу аҳәамҭақәеи аурысқәеи Аҧсны иқәынхо егьырҭ ауааҧсыреи реиҿагыларақәа. Ҳара зегьы жәларык ҳауп», - инаҵшьны иҳәеит Игор Лишьенко.

Акоординациатә хеилак ахаҭарнакцәа ишџьаршьо атәы рҳәеит ҳазҭоу ашықәс нанҳәа 26 рзы «Аҧсны иҟоу аурыс Диаспора» «Аҧснытәи аурыс уаажәларра реизара ду» амҩаҧгара разҧхьагәаҭара, избан акәзар, Аҧсны иҟоу урыстәылатәи аџьынџьуаа иртәу аурыс уаажәларра Акоординациатә хеилак ауп официалтә еиҿкаараны иҟоу. Уи иеиднакылоит Аҧсны иҟоу аурыс уаажәларрақәа 20 рҟынтә 14 уаажәларра.

Ахада иазгәеиҭеит, аурыс уаажәларра ахаҭаранакцәақәак рыбжьара аполитикатә ҳәоуеиқәымшәарақәа, рҭахрақәа, ргәазыҳәарақәа урыстәылатәи аџьынџьуаа руаажәларра акра иаҧырхагамхароуп.

Рауль Ҳаџьымба Ахада Иусбарҭа аусураҟны Аҧсны иҟоу аетностә уаажәларрақәа зегьы русеицура хылаҧшра азҭаша хазы хырхарҭак алкаатәуп ҳәа иҧхьаӡоит. Аҧсны иҟоу Урыстәылатәи аџьынџьуаа руаажәларреи Акоординациатә хеилаки Ахада Иусбарҭеи иааиҧмырҟьаӡакәа Адиалог рыбжьазароуп. «Есҽны аусура мҩаҧыслароуп, алҵшәа ҟаларц азы», - иҳәеит Ахада.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org