Аҧсны Аҳәынҭқарра Ахада

 

Денис Чачхалиа ииубилеи идныҳәалара

21.08.2015

Ахада Рауль Ҳаџьымба Денис Кьыршьал-иҧа Чачхалиа 65-шықәсаихыҵра идиныҳәалеит.


«Ҳаҭыр зқәу Денис Кьыршьал-иҧа!


Гәык-ҧсыкала ишәыдысныҳәалоит шәиижьҭеи 65 шықәса аҵра амшныҳәа.


Аҧсни Урыстәылеи иеицырдыруеит шәара шәлитературатәи шәҭоурыхҭҵааратәи усура алҵшәақәа. А.М. Горки ихьӡ зху Москватәи алитературатә институт аҿы шәҵара  хыркәшаны, қәҿиарала аус жәуан агазеҭ “Советская Абхазия» аредақциаҿы, Аҧсны ашәҟәыҩҩцәа Реидгылаҿы, иара убас Москватәи алитературатә институт аҿы, аҧсуа поезиеи апрозеи рсеминар анапхгаҩыс.


Шәалоуп Аҧсны ашәҟәыҩҩцәа Реидгыла, Урыстәылатәи ашәҟәыҩҩцәа Реидгыла. Шәҩымҭақәа рахәыц ҟаҧшьны иргәылсуеит Аҧсни уи аҭоурыхи ртема. Хаз шәҟәны иҭыҵхьеит шәлирикатә еизгақәа жәпакы. Шәара шәкалам-ҧынҵа иҵшәыжьхьеит А. Пушкин,Ф. Тиутчев, А. Блок, С. Есенин, А. Ахматова, Гиоте, Шиллер уҳәа раҧҵамҭақәа. Аҧсшәаҟынтә аурысшәахь ҟазарыла еиҭажәгахьеит Д. Гәлиа, И. Коҕониа, Б. Шьынқәба,Кь. Чачхалиа, А. Аџьынџьал, Т. Аџьба, Г. Аламиа, Р. Смыр ражәеинраалақәа.С. Ҷанба ихьӡ зху Аҧсуа ҳәынҭқарратә драматә театр асценаҿы иқәдыргылахьеит шәыдраматә рҿиамҭа “Али- Беи” иалху Нелли Ешба режиссиорс дызмоу аспектакль.


Шәара шәахьыҟазаалак аҧсуа традициақәа, ҳмилаҭтә доуҳатә культура аӡыргара шәашьҭоуп. Шәара шәыруаӡәкыуп Москватәи Аҧсуа диаспора рхеилак  ацхыраара азҭо, ҧхьаҟа изго ҳинтеллигенциа ахаҭарнакцәа нагақәа.


Акыр иаҧсоу Денис Кьыршьал-иҧа, Шәымшира аҽны ишәзеиҕьасшьоит агәамч ҕәҕәа, аманшәалара, ҧхьаҟатәи арҿиаратә иааирақәа!»


Аҧсны Аҳәынҭқарра Ахада                                      Р. Џь. Ҳаџьымба.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org