Аҧсны Аҳәынҭқарра Ахада

 

Аҟәатәи Иҷыдоу аказактә ҟәша арегионалтә штабқәа рхаҭарнакцәа рҧылара

18.08.2015

Аҟәа, 16.00

Рауль Ҳаџьымба Аҟәатәи иҷыдоу аказактә ҟәша арегионтә штабқәа рказакцәа дырҧылеит.

Рауль Ҳаџьымба Владимир Москаленко идиныҳәалеит Ҟәбантәи ар Аҟәатәи иҷыдоу аказактә ҟәша атаманс иалхра. «Ҳара акрааҵуеит аказакцәеи ҳареи аиашьаратә еимадара ҳабжьоижьҭеи, ахаангьы иаҳхашҭӡом Аҧсны ахақәиҭразы ақәҧараҿы ишҳадгылаз. Владимир Георги-иҧа – Аҧсны жәлар рџьынџьтәылатә еибашьра даветерануп, уи дҿырҧшыга бзиоуп абиҧара ҿыцқәа рзы», - иҳәеит Ахада.

Аҳәынҭқарра Ахада иҳәеит атәыла анапхгара Аҧсны амилаҭбжьаратә ҳәоуеиқәшәара арҕәҕәараҟны злагаламҭа маҷым аказакцәа адгылара шрырҭо. «Сара аҳәара ҟасҵоит аказакцәеи Аҧсны анапхгареи русеицуразы ажәалагалақәа азшәырхиарц азы, уи ҳара ҷыдала зҿлымҳара аҭаны ҳазнеиуеит», - иҳәеит Рауль Ҳаџьымба.

Владимир Москаленко Ахада иҭабуп ҳәа иаҳәо, иаҵшьны иҳәеит аказакцәа аҧсуаа ишрыдгылаз, аахангьы ишрыдгылазаауа – аибашьраан еиҧш, аҭынч ҧсҭазаара аангьы.

Аиҧылара далахәын Ахада Иусбарҭа Анапхгаҩы Асҭамыр Ҭаниа.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org