Аҧсны Аҳәынҭқарра Ахада

 

ЖӘЫНДӘРЫҦШЬ АҚЫҬАУАА РҦЫЛАРА

18.08.2015

Аҟәа, 12.30

Рауль Ҳаџьымба Гәдоуҭа араион Жәындәрыҧшь ақыҭауаа дырҧылеит.

Ақыҭа аусбарҭа анапхгаҩы Виктор Гәымба Ахада иҟынӡа инеигеит ақыҭауаа зынио ауадаҩрақәа ртәы. «Ҳқыҭаҟны зегь реиҳа иуадаҩраны иҳамоу аӡымҩангареи афымцамчи роуп», -ҳәа азгәеиҭеит иара.

Рауль Ҳаџьымба ақыҭауаа агәра диргеит Жәындәрыҧшь ақыҭа излауала аӡи афымцамчи рызҵаарақәеи иҟоу егьырҭ ауадаҩрақәеи шыӡбахо ала.

Аиҧылараҟны иара убас ишьҭыхын ашколқәа рырҭбаара азҵаара. «Сара иеилыскаауеит ақыҭауаа аӡәырҩы ари рацәак ишадымгыло. Жәындәрыҧшь қыҭа дууп – ашколхәыҷқәа транспортла реиқәыршәаразы алшарақәа ҳаҧшаауеит, аҭаацәа ахәыҷқәа ашкол ахь изларго уадаҩраны ирмоурц азы», -иҳәеит Ахада.

Жәындәрыҧшь ақыҭаахаҭарнакцәа абри азҵаараҟны Ахада иаҧшьгара иадгылеит. «Аҵыхәтәантәи ашықәсқәа рыла ашкол аҟны аҵаҩцәа рхыҧхьаӡара акыр иагхеит. Сара ашкол адиректорс саныҟаз аҵара рҵон 350 – ҩык ахәыҷқәа, уажәы шәҩыкгьы ҟалаӡом», - иҳәеит Виктор Гәымба. Уи иазгәеиҭеит ақыҭашколқәа рырҭбаара аҵараиура ахаҭабзиара аиҕьхара иацхраар шалшо .

Рауль Ҳаџьымба иазгәеиҭеит, атәыла анапхгара рҿаҧхьа ихадароу зҵаараны ишықәгылоу ақыҭа ашьақәырҕәҕәара, ақыҭауаа адгылара рыҭара.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org