Аҧсны Аҳәынҭқарра Ахада

 

АШЬАПЫЛАМПЫЛАСРАЗЫ АФЕДЕРАЦИА АХАҬАРНАКЦӘА РҦЫЛАРА

18.08.2015

Аҟәа, 11.00

Ахада Рауль Ҳаџьымба имҩаҧигеит аусуратә еиҧылара Аҧсны ашьапылампыласразы Афедерациа ахаҭарнакцәа – Афедерациа Ахада Џьамал Гәбази араионтә шьапылампыласратә клубқәа рнапхгаҩцәеи алархәны.

Аиҧылара иара убас иалахәын аҧыза-министр Актәи ихаҭыҧуаҩы Шамиль Аӡынбеи Ахада Ицхырааҩы Беслан Аџьынџьали.

Ирылацәажәан Аҧсны ашьапылампыласра аҿиара азҵаарақәа, убрахь иналаҵаны ахәыҷтәи ақәыҧшқәеи ршьапылампыласра азҵаарагьы. Рауль Ҳаџьымба иазгәеиҭеит атәылаҟны иҟоу иуадаҩу афинанстә ҭагылазаашьа, аха убас ишыҟоугьы иҳәеит, Аҧсны анапхгара излалшо ала ашьапылампыласра Афедерациа адгылара шанаҭо. Ахада иргәалаиршәеит, араионтә напхгарақәа зегьы араионтә шьапылампыласратә клубқәа финансла реиқәыршәара азҵаара рхы иадырҵарц азы адҵа шриҭахьаз.

Рауль Ҳаџьымба иаҵшьны иазгәеиҭеит ашьапылампыласра асезон аиҧымҟьара аҵак ду атәы. «Атәыла ачемпионат хыркәшазароуп, даҽа знеишьак ҟамлароуп», - иҳәеит Ахада.

Ахада далацәажәеит 2016 шықәсазы Аҧсны ашьапылампыласра адунеитә чемпионат ConIFA (ФИФА иалахәым атәылақәа рзы иеиҿкаау жәларбжьаратәи ашьапылампыласратә турнир) амҩаҧгара алшар шауа атәы. «Ҳара ибзиаӡаны ҳалшарақәа ҭаҳҵаароуп, иҟоу аинфраструктура, зымҽхак дуӡӡоу аусмҩаҧгатә ҳтәылаҟны амҩаҧгара егьырҭ аганқәагьы », - иҳәеит Рауль Ҳаџьымба. Ахада аҧыза-министр актәи ихаҭыҧуаҩы Шамиль Аӡынба инапы ианиҵеит Аспорти абаҩрҵәыреи рзы аҳәынҭқарратә еилаки ашьапылампыласразы Афедерациеи еицхырааны абри азҵааразы аҵыхәтәантәи аӡбамҭа ашьҭыхразы аматериал аздырхиарц азы. «Ашьапылампыласра – баша спорт мацараӡам, ҳара ҳшьапылампыласыҩцәа аҳәаанырцә хаҭарнакра ҳзызуа раҳасабала ҳрыхәаҧшуеит, акраҵанакуеит ҳара ҳзы Аҧсны жәларбжьаратәи аспорттә хәмаррақәа рыҟны рықәгылара», - иҳәеит аҳәынҭқарра Ахада.

Араионтә клубқәа рнапхгаҩцәа иазгәарҭеит агәыпқәа рфинанстә ҭагылазаашьа ауадаҩра атәы. Очамчира, Гал, Гагра аклубқәа рхаҭарнакцәа ирҳәеит араионтә стадионқәа шыбааҧсу.

Рауль Ҳаџьымба иҳәеит аҳәынҭқарратә еицлабраҟны аҽалархәразы агәыҧқәа зегьы алшарақәа еиҟараны ишрымазаракәу. «Ашьапылампыласра ҳтәылаҟны иҟазароуп иагьыҿиалароуп», - иҳәеит Ахада.

«Ҳара иаҳгәалашәоит афинанстә ҭагылазаашьа еиҳагьы ианыуадаҩыз, аха ашьапылампыласра аҿиараҟны иаҭахуп системала, иеишьҭаргыланы апрограмма ақәныҟәара», - иҳәеит Шамиль Аӡынба.

Аҧыза-министр актәи ихаҭыҧуаҩы иазгәеиҭеит, раҧхьа иргыланы, аҳәынҭқарра ахәыҷтәи ақәыҧшцәеи ршьапылампыласра арҿиалароуп ҳәа, апрофессионалтә клубқәа алшарақәа даргьы рыҧшаара рылшоит ҳәа.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org