Аҧсны Аҳәынҭқарра Ахада

 

Зхатәгәаҧхарала иеибашьуаз Рымш

15.08.2015

Зхатәгәаҧхарала иеибашьуаз Рымш

15.08.2015

Ҳаҭыр зқәу ҳџьынџьуаа!

Акыр иаҳзаҧсоу ҳашьцәа - зхатәгәаҧхарала Аҧсны ахақәиҭразы игылаз!

Гәык-ҧсыкала ишәыдысныҳәалоит Зхатәгәаҧхарала иеибашьуаз Рымш!

Сынтәа ҳара иазгәаҳҭоит Аҧсны жәлар Рџьынџьтәылатә еибашьра иалагазар аахыс 23-шықәсаҵра. 1992 шықәса нанҳәамза 14 рзы Қырҭтәыла Аҳәынҭсовет, ақәылаҩцәа рҽеибыҭаны Аҧсны иалалеит аҧсуа жәлар ртәыртәырц, ҳкультура, ҳҳәынҭқарра ыҟаӡамкәа ақәхра ргәы иҭакны.

Аибашьра аҧхьатәи амшқәа инадыркны, ҳажәлар аҧсреи аӡреи ахықә ианынхықәгыла аамҭазы Аҩада Кавказынтәи ҳашьцәа ашьхақәа ирхыҵны иааит, иҳадгылеит. Иуадаҩуп ажәала аиҭаҳәара, аибашьра аҩбатәи амш аҽны, 1992 шықәса нанҳәамза 15 рзы Кавказ Ашьхарыуа Жәларқәа Рконфедерациа (КАЖӘР) атәылахьчара аилак ахантәаҩы Султан Сосналиев дызхагылаз зхатәгәаҧхарала иеибашьуаз аотриад рашьцәа ирыцхраарц азы Аҧсныҟа ианааз атәы. Ари ахҭыс ҳажәлар акырӡа ргәы шьҭнахит, аиааиразы ирымаз агәрагара арҕәҕәеит.

Зхатәгәаҧхарала иҳацеибашьырц игылаз ҳашьцәа ирылшаз атәы изныкымкәа иқәгыларақәа рыҟны иазгәеиҭахьан Аҧсны жәлар рмилаҭтә ҧхьагыла Владислав Арӡынба: «Иҧшьоу ари аибашьарҟны аиааира ҳазгаӡомызт Аҩадатәи Кавказ ҳаиашьаратә жәларқәа иҳарҭаз ацхыраара акәымзар».

Рыжәҩахыр ҳадҵаны иҳадгыланы иеибашьуан Аҩадатәи Кавкази Алада Урыстәылеи рреспубликаҟнытә, аҧсуа-адыгатәи адиспора ахьынхо хара аҳәаанырцәынтә, Алада Уаҧстәылантәи, Приднестровиантәи зхатәгәаҧхарала иааз. Урҭ зааз, хықәкыс ирымаз еилкаан - аҧсуаа рхақәиҭреи рхьыҧшымреи рзы рықәҧараҟны ацхыраара рыҭара акәын. Еибашьра ицон, иҭахаргьы шауаз еилкааны.

1992-1993 шш. Аҧсны жәлар Рџьынџьтәылатә еибашьра иалахәын ҩнызқь инареиҳаны зхатәгәаҧхарала иҳацеибашьуаз, урҭ рахьтә 51-ҩык «Аҧсны Афырхаҵа» ҳәа ахьӡ рыхҵоуп, 247-ҩык – Леон Иорден ранашьоуп, 623 – «Агәымшәаразы амедаль».

260-ҩык зхатәгәаҧхарала иеибашьуаз Аҧсны ахақәиҭра рхы ақәырҵеит. Рыхьӡ кашәара ақәымзааит Аҧсна ахақәиҭра зхы ақәызҵаз, ҳхырхәоит аҵеицәа хьӡырҳәагақәа зааӡаз анацәа рҿаҧхьа.

Зхатәгәаҧхарала иааны иҳадгылаз аибашьцәа иаадырҧшит иреиҕьӡоу ауаҩытәҩсатә , ҟазшьақәа, агәымшәара, аиаша азықәҧара, ахамеигӡара. Ҳара иаҳуалуп хәызмаӡам арҭ аҟазшьақәа ҿыц игыло абиҧарақәа рымадара, ҳаиашьара, ҳакра, ҳаихаҵгылара мырӡкәа даргьы ирылаҳааӡароуп.

1992-1993 шш. Аџьынџьтәылатә еибашьраҟны аиааира газ рфырхаҵара иабзоураны иахьа Аҧсны Аҳәынҭқарра ихьыҧшым демократиатәу ҳәынҭқарраны аҿиара иаҿуп. Иахьа зхатәгәаҧхарала иеибашьуаз рхаҭарнакцәа ҳтәыла анапхагараҟны аҭакзыҧхықәу аҳәынҭқарратә маҵзурақәа аус руеит, иҳацхраауеит аекономика арҿиараҟны, атәыла ашәарҭадара арҕәҕәараҟны.

Акыр иаҧсоу ҳашьцәа - зхатәгәаҧхарала Аҧсны ахақәиҭразы иеибашьуаз! Ҳара есқьынгьы қәнагала ахә ҳшьоит шәара иаашәырҧшыз афырхаҵара, ҳаҭыр ақәаҳҵоит шәареи ҳареи ҳаиашьара.

Ишәзеиҕьасшьоит агәабзиара, ҭынч ҧсҭазаара.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org