Аҧсны Аҳәынҭқарра Ахада

 

Аҧсны Жәлар Рџьынџьтәылатә еибашьраҟны хатәгәаҧхарала иеибашьуаз – аветеранцәа рҧылара

14.08.2015

Рауль Ҳаџьымба хатәгәаҧхарала иеибашьуаз Рымш иазкыз аусмҩаҧгатәқәа рхы аладырхәырц азы иааз Аҧсны Жәлар рџьынџьтәылатә еибашьра аветеранцәа – хатәгәаҧхарала иеибашьуаз дырҧылеит.

Аиҧылара иалахәын иара убас Ахада ихаҭыҧуаҩы Витали Габниа, Ашәарҭадара Ахеилак Амаӡаныҟәгаҩ Муҳамед Кьылба, Атәылахьчара Аминистр Мираб Қьышьмариа.

Ахада Президент хатәгәаҧхарала иеибашьуаз гәыблыла бзиала шәаабеит ҳәа раҳәаны иазгәеиҭеит, Аҧсны жәлар раҧхьаҟа иҟарҵаша аусқәа шырацәоу аибашьра ахҟьа-ҧҟьақәа ирыцәцарц азы. «Ҳара Аҩадатәи Кавкази Алада Урыстәылеи рыҟнытә хатәгәаҧхарала иеибашьуаз ҳабжьара иааигәаны аимадарақәа рышьақәыргыларазы ашьаҿақәа рыҟаҵара ҳаҿуп»,- иҳәеит Ахада. Уи иазгәеиҭеит иара убас хатәгәаҧхаралатәи аибашьцәа раара аҧсуа жәлар рхақәиҭратә қәҧараҟны акырӡа ргәы шышьҭнахыз. Рауль Ҳаџьымба иаҵшьны иҳәеит, нанҳәамза 14 – Аҧсны аҭоурых аҟны шлахьеиқәра мшу, аха уи аиааирахьы амҩа ахацыркра иамшны ишынхо. «Шәара иҟашәҵаз ҟашәымҵазҭгьы, иахьа Аҧсны ҟамлар алшон»,- иҳәеит Ахада. Уи иҳәеит Аҧсны жәлар рџьынџьтәылатә еибашьра афырхацәа ҿырҧшыганы ишыҟаҵатәу ҿыц игыло аҿар рааӡараҟны. «Иахьа зегьы иҳалшо ҟаҳҵароуп ҳаззеибашьыз ҳҳәынҭқарра шьақәгыларц азы»,-иҳәеит Ахада.

Кавказ ашьхарыуа жәларқәа Рконфедерациа аветеранцәа Реидгыла Ахантәаҩы Муса Шанибов аиҧылара иалахәыз хатәгәаҧхарала иеибашьуаз Имш рыдиныҳәалеит. «Аҧсны ахьыҧшымра иазықәҧоз, уи аазгаз ибзианы ирдыруеит Аҧсны аҧхьаҟа иаҭаху»,- иҳәеит иара Аҧсны Ахада ихы иқәкны. «Аҧсны ахақәиҭра ахә ҳаракны иашәеит, хатәгәаҧхарала иеибашьуазгьы ргәы ирыҵанаҳәаз ала иааны уи иадгылеит»,- иҳәеит аҵыхәтәан Шанибов.

Аиҧылара иалахәыз минуҭктәи аҿымҭрала Аҧсны ахақәиҭтәраан иҭахаз ргәаладыршәеит.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org