Аҧсны Аҳәынҭқарра Ахада

 

Аҧсны Жәлар Рџьынџьтәылатә еибашьра алагамҭа 23 шықәса ахыҵра инамаданы Аҧсны Ахада Рауль Ҳаџьымба иҟаиҵаз Ааҧхьара

14.08.2015

Акыр иаҧсоу ҳџьынџьуаа!

Ҳаҭыр зқәу аветеранцәа!

Нанҳәамза 14 рзы ҳара иазгәаҳҭоит 1992-1993 шш. Аҧсны Жәлар Рџьынџьтәылатә еибашьра иалагамҭаны.

Абри амш азы иаҳгәалаҳаршәоит ҳажәлар рфырхаҵара, ақырҭуа агрессиа иаҿагыланы Аҧсны ахьчаразы игылаз ҳаибашьцәа ргәымшәара.

Ҳара иазгәаҳҭоит Ҳаҧсадгьыли зыгәрагара даҧсахаз ҳажәлари рлахьынҵа аӡбаразы аҭакҧхықәра ду зхы иадызҵаз, амилаҭ раҧхьагыла Владислав Григори – иҧа Арӡынба иҵакы дуӡӡа.

Аибашьра ианналага аҩбатәи амш аҽны, нанҳәамза 15 рзы Аҧсны жәлар ацхыраара рырҭарц азы иааит Султан Сосналиев дызхагылаз актәи агәып, рашьцәа аҧсуааи дареи рҽеидыркыларц ҭаҷкәым ҕәҕәак иеиҧшны.

Жәлар ргәалашәараҿы наунагӡа инхоит Аҧсны ахақәиҭра зхы ақәызҵаз хьӡи-ҧшеи змоу Аҧсны аҵеицәеи зхатәгәаҧхарала еибашьра иааз ҳашьцәеи.

Нанҳәамза 14 - жәаҳәарада, лахьеиқәҵара мшуп, иара убас уи аҧсуа жәлар зықьҩыла рҵеицәа зхы зқәырҵаз ахақәиҭра ганы рхышьҭыхра анрылшаз иамшуп.

Аибашьра агәаларшәара, иҭахаз рыхьӡ акамыршәра, аветеранцәеи милаҭрацәалатәи ҳажәлар рфырхаҵареи ҳаҭырла азныҟәара – Аҧсны иахьатәии ҿыц игыло абиҧарақәеи рзы иҭышәынтәалоу, ишәарҭарадоу рҧеиҧш ачаҧараҟны уасхырс иазышьҭоуп.

Ишәҭааит, иеизҳааит ихьыҧшым Аҧсны Аҳәынҭқарра!

Аҭынчреи аразҟы бзиеи рҧеиҧшзааит фырхаҵара згым ҳажәлар!


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org