Аҧсны Аҳәынҭқарра Ахада

 

Абиуџьеттә зыҧхьагәаҭареи, ашәахтәқәҵареи, Аҧсны араионқәа рыҟны иҟоу аҭагылазааашьеи рызҵаарақәа ирызкыз аусуратә еилацәажәара

11.08.2015

Аҟәа, 11.00

Рауль Ҳаџьымба имҩаҧигеит абиуџьеттә зыҧхьагәаҭареи, ашәахтәқәҵареи, Аҧсны араионқәа рыҟны иҟоу аҭагылазааашьеи рызҵаарақәа ирызкыз аусуратә еилацәажәара. Аилацәажәара иалахәын Ахада ихаҭыҧуаҩы Витали Габниа, аҧыза-министр Артур Амқәаб, аҧыза-министр актәи ихаҭыҧуаҩы Шамиль Аӡынба, аҧыза-министр ихаҭыҧуаҩы Дмитри Сериков, Ахада Иусбарҭа Анапхгаҩы ихаҭыҧуаҩы Асҭамыр Аппба, Афинансқәа рминистр Амра Қәаранӡиа, Аекономика аминистр Адгәыр Арӡынба, Ашәахтәқәеи аизгатәқәеи рзы аминистр Рауф Цымцба, Аҳәынҭқарратә ҳазалхратә еилакы Ахантәаҩы Даур Кобахиа, Ахада Иабжьагаҩ Амиран Лагәлаа, Ахада Иусбарҭа Аексперттә усбарҭа Аиҳабы Иракли Хынҭәба, араионқәеи Аҟәа ақалақьи рхадацәа.

Аилацәажәара аартуа, Ахада иалатәаз азхьаирҧшит атәылауаа ишҟа иззааиуа азҵаарақәа жәпакы араионтә усбарҭақәа ирыӡбартә ишыҟоу, аҳәынҭқарра Ахада идымҵаалакәа.

Ҳазҭоу ашықәс абиуџьет азҵаара шьҭыхны, Рауль Ҳаџьымба иазгәеиҭеит, асоциалтә хыдҵақәа – ауалафахәқәеи атәанчахәқәеи рызшәара иахмырҧакәа шымҩаҧысуа. «Исҳәар сылшоит араионқәа рзы иарбаз ауалафахәқәеи атәанчахәқәеи рызшәаразы афинанстә хархәагақәа рымҽхак зегьы хаҭәааны ашәара ишаҿу», - иҳәеит иара.

Ахада иаҵшьны иазгәеиҭеит, ашәатәқәа аҩныҵҟатәи алшарақәа рхархәарала ишымҩаҧысуа. Рауль Ҳаџьымба ҷыдала иагәеиҭеит атәыла анапхгара абиуџьет асоциалтә-зкратә аҟнытә аҿиара абиуџьет ашҟа аиагаразы аусура шымҩаҧнаго. «Ари аусура заа иалагазҭгьы, арҭ ашықәсқәа зегьы иаауаз иара урыстәылатәи афинанстә цхыраара раҧхьатәи амшқәа инадыркны аекономика аҿиарахьы ишьҭызҭәгьы, иахьа даҽа лҵшәақәак ҳамазаарын»,- иҳәеит иара.

Ашәахтәқәеи аизгатәқәеи рзы аминистр Рауф Цымцба иааркьаҿны Ахада иҟынӡа инеигеит ашәахтәқәа реизгаразы аплан анагӡашьа атәы, убри аан ашәахтә системаҟны аҧсахрақәа рзы ажәалагалақәа хара имгакәа Жәлар Реизарахь ишдәықәҵахо, адепутатцәа аҧсшьарамшқәа рышьҭахь иахәаҧшырц азы.

Гагра араион аусбарҭа ахада Беслан Барцыц 2015 шықәсазтәи акурорттә аамҭа ахҳәаа ҟаиҵеит. «Араион аусбарҭа иаду аганахьала зегьы анагӡара ҳашьҭоуп ауаа раҳаҭны рыҧсшьара мҩаҧысырц азы», - иагәеиҭеит иара. Беслан Барцыц афымцамчы инамаданы иҟоу аҭагылазаашьа шымариам иҳәеит, араионтә станциа маҷқәа ирымоу аидарақәа иахьрыцло азы. «Аамҭала афымцамчы арцәара аҭахны иҟоуп», - иазгәеиҭеит Гагра ахада.

Гәдоуҭа араион ахада Руслан Ладариа дазааҭгылеит араион азы иуадаҩраны иҟоу аҵараиура азҵаара. «Араионтә биуџьет аҟнытә 159 миллион мааҭ 154 - аҵараиура иахҭынҵоуп, аха аҵараиура ахаҭабзиара акала ианыҧшӡом. Уи иазгәеиҭеит аусбарҭақәа реиҵатәрала абиуџьеттә хархәагақәа қәнагала рхархәара аҭахны ишыҟоу. «Араион аҟны иҟоуп 12-15 ҵаҩы ахьҭоу, аӡәы иныҟәгара шықәсык 161 нызқь мааҭ артәоит. Иҟоуп 500-600 – ҩык ахәыҷқәа аҵара ахьырҵо ашколқәа, аӡәы иныҟәгара 13 нызқь мааҭ ахьақәхарџьхо. Арахь, аҵараиура аҩаӡара аҩбатәи аҭагылазаашьаҟны иеиҕьхеит», - абас иажәа хиркәшеит Руслан Ладариа.

Аҟәа араион аусбарҭа ахада Беслан Аҩыӡба иҳәеит мызкы аҧхьа араион аҟны иҟалаз аҧсабаратә рыцҳара ахҟьа-ҧҟьақәа раҧыхразы имҩаҧгаз аусурақәа ртәы. «Инықәырҧшны аҧсабаратә рыцҳара иаҳнаҭаз аҧхасҭа 10 млн мааҭ раҟара артәеит, уи ҳраион абиуџьет аҟнытә 20 процент артәоит. Ари ацифра ашьҭыхра ҳалшаӡом ҳара», - иҳәеит Беслан Аҩыӡба. Беслан Аҩыӡба иазгәеиҭеит иара убас ақыҭашколқәа раартра ма раркразы аӡбамҭа адкылара аҧхьа аилыркааратә усура мҩаҧгазар бзиоуп ҳәа, уи ҵаҵҕәыс иамоу рылаҳәаразы.

Аилацәажәараан Рауль Ҳаџьымба атәылауаа иеиҭамҵуа амазара раархәара азҵаара шьҭихит. «Сара издыруеит ашәарҭарақәа шыҟоу. Ауаа аҭирақәа ҟамлароуп зҳәо ыҟоуп. Аха убри аан ҳара ҳаҟны зегь рҭиуеижьҭеи акырҵуеит закәандарыла. Шәааи, ари апроцесс закәанла ашьақәырҕәҕәарахь ҳаиасып, аџьырмыкьа, иеиҭамҵуа амазара хылаҧшра аҭара ҳалшартә еиҧш», - иҳәеит иара. Ахада ирыдигылеит амазара аҭиразы аҧҟарақәа рышьақәыргылара, иҵоурам алҵшәақәа нызкылаша амеханим азырхиара. Аҳәынҭқарра ахада иазгәеиҭеит амазара аҭираҟнытә иааиуа аҧаратә хархәагақәа рыхәҭак асоциалтә нхарҭа аргылараҟны ҳхы иаҳархәар шауа.

Афинансқәа рминистр Амра Қәаранӡиа далацәажәеит ҳазҭало ашықәсазтәи абиуџьет ашьақәыргылара апроцесс атәы. «Ҳара макьана аҧхьаӡара ҳаҿуп ашәахтә закәанҧҵараҟны аҧсахрақәа рыдкылара абиуџьет ахашәалатә хәҭа ишаныҧшуа, убри аҟнытә абиуџьет ахашәалатә хәҭа макьана аус адулара мҩаҧысуеит», - иазгәалҭеит аминистр. Уи иацҵаны илҳәеит ҳазҭагылоу аамҭазы абиуџьет аҟнытә 80 процент асоциалтә хырхарҭоуп иамоу, ашәахтә лаҟәуп, иагьазгәалҭеит ашәахтә ҟәшаҟны аиҭакрақәа аныҟамла, абиуџьет адефицит аизҳара ишалаго .

Рауль Ҳаџьымба ҷыдала даааҭгыланы иазгәеиҭеит 2016 шықәсазтәи абиуџьет азырхиара аҿҳәара ахыҧара шыҟамло. «Нанҳәа 30 рзы шәцифрақәа сырзыҧшуп», - иҳәеит Ахада. подчеркнул Президент.

Аекономика аминистр Адгәыр Арӡынба иазгәеиҭеит аҵыхәтәантәи аамҭазтәи илҵшәадоу аҳәынҭқарратә економикатә политика аҿиара амҩахь архара даара иуадаҩуп ҳәа, иагьыргәалаиршәеит ашәахтә закәанҧҵараҟны лассы аиҭакрақәа шаҭаху атәы. «Атәылауаа аҳәынҭқарра адгылара рыҭара ишалаго рбоит, уи абизнес аартразы альготақәа рынаҭоит, ари иаҳәоит аекономика ашәшьыра аҵыҵра ишалаго атәы», - абас иажәа иациҵеит Адгәыр Арӡынба.

Ахада иабжьагаҩ Амиран Лагәлаа иазгәеиҭеит атәыла афинанстә документ апринципқәа шьаҭанкылатәи иҧсахымкәа, абиуџьет адефицит ҳзацәцаӡом ҳәа.

Аҧыза-министр ихаҭыҧуаҩы Дмитри Сериков иҳәеит ашәахтә закәанҧҵара аиҕьтәразы зырхиара иаҿу азакәанапроектқәа рпакет атәы. Уи дахцәажәеит аҳәынҭқарратәи амуниципалтә унитартәи наплакқәа ртәы, урҭ аҳәынҭқарра ацәыӡ шарҭо атәы. «Аҳәынҭқарра ахы иаднаҵаз аҧшәымаратә функциа акала агәаҭара мҩаҧысӡом, арҭ аҟәшақәа рыҟны аџьармыкьа хнарбгалоит, ахазхатәы бизнес аҿиара иаҧырхагоуп. Аҳәынҭқарра астратегиатә ҵакы змам аекономика аҟәшақәа ирыдымҵыр, ҳара абиуџьет ҳзышьҭыхӡом», - иазгәеиҭеит аҧыза-министр ихаҭыҧуаҩы.

Аҧыза-министр Артур Амқәаб иагәеиҭеит аҳәынҭқарратә усбарҭаҟны аиҭакрақәа шаҭаху, иҳәеит абри аганахьала имҩаҧысуа аусура атәы.

Аилацәажәара аихшьалақәа рыла ашәахтә реформазы ажәалагалақәа рцәыргара азҵаара инадҳәаланы Ахада аиҳабыра анапынҵақәа риҭеит. Уи иара убас адҵа ҟаиҵеит аҳәынҭқарратәи амуниципалтә унитартәи наплакқәа аҧхьаҟатәи рлахьынҵа иазку аилацәажәара азырхиаразы.

Аилацәажәараан Рауль Ҳаџьымба заалаҳәара ҟаиҵеит Ҭаҭарсҭан Ахада Аҧсныҟа иааразы, араионтә усбарҭақәа рхадацәа адҵақәа риҭеит Урыстәылатәи Афедерациа асубиект аус ацуразы ажәалагалақәа аздырхиаразы.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org