Аҧсны Аҳәынҭқарра Ахада

 

Аҧсны Ахада Хьыбла Гьерзмавеи Алеқсандр Сладковскии дырҧылеит

29.07.2015

Аҟәа, 15.00

Рауль Ҳаџьымба Аҧсны Жәлар рартист, Урыстәыла Жәлар рартист Хьыбла Гьерзмавеи Ҭаҭарсҭан Ареспублика Аҳәынҭқарратә симфониатә оркестр Асахьаркыратә напхгаҩы, Урыстәыла зҽаҧсазтәыз артист Алеқсандр Сладковскии иҧшәмаҧҳәыси дырҧылеит.

Аиҧылара ҧхынгәы 30 рзы С. Ҷанба ихьӡ зху Адраматә театр аҟны гала-концертла иаатраны иҟоу аклассикатә музыка XIV афестиваль «Хьыбла Гьерзмава шәаалыҧхьоит…» инамаданы имҩаҧысит. Аконцерт апрограммаҟны иҟоуп Хьыбла Гьерзмава, Николаи Ерохин (атенор), Ильдар Абдразаков (абас), Алеқсандр Сладковски напхгара ззиуа Ҭаҭарсҭан Ареспублика Аҳәынҭқарратә симфониатә оркестри инарыгӡо адуетқәа, аоперақәа рыҟнытә ариақәа.

Аиҧылара иалахәын иара убас Акультуреи аҭоурых-культуратә ҭынхеи рминистр Эльвира Арсалиеи, амеценат, афестиваль аспонсорцәа ируаӡәку Николаи Ачба.

Асасцәа бзиала шәаабеит ҳәа раҳәо, Рауль Ҳаџьымба иазгәеиҭеит ари афестиваль атәыла акультуратә ҧсҭазааразы иамоу аҵакы. «Ҳара ҳзы гәадуроуп Шәара шәеиҧш аҟаза ду дахьҳамоу, ҳтәыла адунеи иреиҕьу асценақәа рыҟны иахьӡырыжәго, адунеи аҟны иеицырдыруа амузыкантцәа рҟазара ҳтәылаҿы ирбартә, ираҳартә иахьыҟашәҵо», - иҳәеит Ахада Хьыбла Гьерзмава ихы налықәкны.

Хьыбла Гьерзмава аҳәынҭқарра ахада иҭабуп ҳәа иалҳәеит асасцәа ирырҭаз адкыларазы, инаҵшьны илҳәеит уажәтәи афестиваль апрограмма ҷыдала аинтерес шаҵоу. «Уаҵәтәи аконцерт иалахәхоит Ҭаҭарсҭан Ареспублика Аҳәынҭқарратә симфониатә оркестр. Урҭ инаргӡоит бзиа избо арҿиамҭа, уи аоркестр ҷыдала аҧсуа публиказы иааргеит», - лҳәеит Хьыбла Гьерзмава. Уи илҳәеит афестиваль аҧхьаҟагьы аизҳазыҕьара шамазаауа, иазгәалҭеит раҧхьаӡакәны иара Аҳәынҭқарратә Драматә театр аҟны ишымҩаҧысуа.

Алеқсандр Сладковски Ахада иҭабуп иеиҳәеит афестиваль аиҿкаареи амҩаҧгареи рзы. «Гәахәара дууп ҳара ҳзы ара, иҧшьоу шәыдгьыл аҟны ҳахьыҟоу. Ари акультура аҟәшаҟны Ҭаҭарсҭани Аҧсни гәыблыла русеицура иалагамҭоуп ҳәа сгәы иаанагоит», - иҳәеит иара. «Ҳара ҳзы ҳаҭыр дууп ҳәа иҳаҧхьаӡоит ҳконцерт аҭаара шәылшар», - иҳәеит Сладковски.

Рауль Ҳаџьымба иазгәеиҭеит, Аҧсни Ҭаҭарсҭани реиҩызаратә, аҩ-ганк ирзыфеидоу аизыҟазаашьақәа рыҿиара ауасхыр шазышьҭаҵоу. «Шәара шәтәылоуп раҧхьаӡа ҳабжьара аиҩызареи аусеицуреи рзы Аиқәшаҳаҭра анапаҵаҩразы иақшаҳаҭхаз, ари ҳара ҳзы аҵакы ду амоуп», - иҳәеит Ахада. Уи далацәажәеит ааигәа усуратә визитла Казан даныҟаз иоуз агәаанагара атәы, иҳәеит, хара имгакәа Ҭаҭарсҭан Ахада Рустам Миннихановгьы усуратә визитла Аҧсныҟа даараны дшыҟоу атәы.

Акультуреи аҭоурых-культуратә ҭынхеи рминистр Ельвира Арсалиа Рауль Ҳаџьымба иҭабуп ҳәа иалҳәеит афестиваль иаиҭаз адгыларазы. «Адунеи аҟны иеицырдыруа аҟазацәа дуқәа злахәу афестиваль хҭыс дууп аҧсуа уаажәларразы», - лҳәеит аминистр.

Ельвира Арсалиа илҳәеит жәиҧшьтәи афестиваль ахыркәшара ашьҭахь Акультуреи аҭоурых-культуратә ҭынхеи рминистрра аклассикатә музыка XIV афестиваль «Хьыбла Гьерзмава шәаалыҧхьоит…» жәохәтәи, аиубилеитә фестиваль азҧхьагәаҭара напы аркраны ишыҟоу.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org