Аҧсны Аҳәынҭқарра Ахада

 

Ҭаҭарсҭан Ареспублика ақыҭанхамҩеи афатә-арыжәтәи рминстрраҟны аиҧылара

24.07.2015

Казан, 10.00

Рауль Ҳаџьымба дызхагылоу Аҧсны аделегациа рыдыркылеит Ҭаҭарсҭан Ареспублика ақыҭанхамҩеи афатә-арыжәтәи рминстрраҟны.

Аҧсны Ахада бзиала уаабеит иаҳәо, аҧыа-министр, ақыҭанхамҩеи афатә-арыжәтәи рминстр Марат Ахметов иазгәеиҭеит Рауль Ҳаџьымбеи Ҭаҭарсҭан Ареспублика Ахада инапынҵақәа назыгӡо Рустам Минниханови реиҿцәажәараҟны ақыҭанхамҩа аҟәшаҟны аусеицура ҧыжәара шамаз атәы.

Аганқәа рылацәажәеит агроааглыхратә комплекс, аенергетика уҳәа егьырҭ ахырхарҭақәа жәпакы рыҟны аусеицура.

Рауль Ҳаџьымба иазгәеиҭеит, иахьа Аҧсны имҩаҧысуа аҿиара акыр Урыстәылатәи Афедерациа иҟанаҵо ацхыраара ишабзоуроу.

«Ҳара арҭ ашықәсқәа зегьы уснагӡатәны ҳҿаҧхьа иқәҳаргылон асоциалтә инфраструктура аиҭашьақәыргылара, афинанстә цхыраарагьы иара иазкын, уажәы уи атуризми агидрофымцамчи адҳәаланы агроааглыхратә комплекс аҿиара иазаҳкуеит.

Аиҭашьақәыргылара ҳалагеит аӡахәааӡара, ашәыр, ацитрусааӡара. Иахьа Урыстәыла иаҳҭиуа аҩы азы Аҧсны аҧхьагылаҩцәа ирылаҧхьаӡахоит. Асовет аамҭазы ара иҿианы иҟан ачаиааирыхра. Аҵыхәтәантәи аамҭазы ари аҟәша иақәнагоу зҿлымҳара амамызт, уажәы уи аиҭашьақәыргылара ҳалагоит. Аҧсны ахаангьы ҧхьагылара амамызт арахәааӡаразы, ари аҭагылазаашьагьы аҧсахра ҳазхәыцуеит», - иазгәеиҭеит Рауль Ҳаџьымба.
Ахада иҳәеит ақыҭанхамҩа аҟәшаҟны Аҧсны ихацыркхараны иҟоу абизнес маҷ кредитла аиқәыршәара апрограмма атәы.

Иҳәеит иара убас атәыла ахатәы биуџьет ахашәалатә хәҭа аизырҳара уснагӡатәны ишықәиргылаз, насгьы аҳәынҭқарра аинвесторцәа радҧхьаларазы алшарақәа раҧҵара хықәкыс иҟаҵаны ашәахтә закәанҧҵара аиҕьтәразы аусура шымҩаҧысуа атәы.

Иазгәаҭан аҩ-тәылак ирыбжьоу Ахәаахәҭра-ааглыхратә палатақәа реимадарақәа ртәы.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org