Аҧсны Аҳәынҭқарра Ахада

 

Ҭаҭарсҭан Ареспублика Аҳәынҭқарратә Абжьагаҩ иҧылара

23.07.2015

Казан, 15.30

Рауль Ҳаџьымба дызхагылоу Аҧснытәи аделегациа Ҭаҭарсҭан Аеспублика анапхгара ирҧылеит. Казантәи Кремль Ахаҭарнакратә хыбраҟны Рауль Ҳаџьымба Ҭаҭарсҭан Ареспублика Аҳәынҭқарратә Абжьагаҩ Минтимер Шаимиев диҧылеит.

Аиҧылара иалахәын иара убас Ҭаҭарсҭан Аеспублика аҧыза-министр ихаҭыҧуаҩы, ақыҭанхамҩеи афатә-ажәтәи рминистр Марат Ахметов, Урыстәылатәи Афедерациа Аҳәынҭқарратә Дума адепутат Фатих Сибагатуллин.

Минтимер Шаимиев асасцәа аҧсшәа раҳәо, иҳәеит Ҭаҭарсҭани Аҧсни рыбжьара аусеицура шыҕәҕәахо азы агәыҕра шимоу атәы. Уи игәаларшәаны далацәажәеит акыршықәсқәа раахыс аҳәынҭқаррақәа рыбжьара аусеицура атрадициа шышьақәгылаз.

Минтимер Шаимиев иазгәеиҭеит ҷыдала Аҧсны Аҳәынҭқарра Актәи Ахада Владислав Арӡынба ҧасатәи асоветтә автономиақәа рыҿиараҿы илшамҭа дуқәа ртәы.

"Арӡынба иҭагылазаашьа усҟан егьырҭ зегь ртә аасҭа ихьанҭан, избанзар Аҧсноуп раҧхьаӡа ахьыҧшымра рылазҳәаз, уи иахҟьаны аибшьрагьы ахнагеит", - иҳәеит иара. Аҧсуаа ркультуреи рҳәынҭқарреи аиқәырхара рылшеит. Ҳара даара ҳгәы иалоуп Владислав Григори-иҧа абас заа иҧсҭааара дахьалҵыз. Гәахәароуп уи дахьышәхамышҭуа, абас иахьазгәашәҭо Актәи Ахада диижьҭеи 70 шықәсаҵра".

Рауль Ҳаџьымба, иара иганахьала, иҭабуп ҳәа реиҳәеит иҟарҵаз адкыларазы. "Ҳара ҳзы акраҵанакуеит шәара зегьы Владислав Арӡынба шәидгыланы зуасхыр шьҭашәҵаз аус анагӡара", - иҳәеит Ахада. Уи иацҵаны иҳәеит, Аҧсны аибашьрахьҭахьтәи аҭагылазаашьаан Ҭаҭарсҭан Аҧсны аиҩызаратә еизыҟазаашьақәа рышьақәыргылара иалагаз Урыстәылатәи Афедерациа раҧхьатәи асубиектқәа ишыруаку атәы.

"Ҳара ибзианы иаҳгәалашәоит Аҧсны Аҳәынҭқарреи Ҭаҭарсҭан Ареспубликеи реиҩызареи русеицуреи рзы 1994 ш. Аиқәшаҳаҭра. Уи усҟан иазхаҵамыз Аҧсны анапхгара рнапы зҵарҩыз раҧхьатәи адокументқәа ируакуп", - иазгәеиҭеит Рауль Ҳаџьымба.


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org