Урыстәыла Амш иазку адкылара

11.06.2015

Аҟәа, 17.00

Аҧсны Ахада Рауль Ҳаџьымба Урыстәылатәи Афедерациа Ацҳаражәҳәара иеиҿнакааз Урыстәыла Амш иазку адкылара далахәын.

Уи аҧхьа Урыстәыла Амш иазкыз аныҳәа азгәаҭара аҳәаа иҭагӡаны дыҟан аурыс театр аҟны имҩаҧысуаз аныҳәатә концерт аҟны. Уи еиҿнакааит Аҧсны иҟоу Урыстәылаусеицзура Ахатарнакра.

* * *

Аҧсны Ахада Рауль Ҳаџьымба Урыстәыла Амш иазку адкылараҟны иқәгылара

Ҳаҭыр зқәу Семион Виачеслав-иҧа! Иахьа урыстәылатәи ажәлари Урыстәылатәи Афедерациа аҩызцәа зегьи акрызҵазкуа аныҳәа - Урыстәыла Амш азгәарҭоит.

РСФСР аҳәынҭқарратә суверенитет азы Адекларациа рыдыркылеижьҭеи 25 шықәса ҵит. Арҭ ашықәсқәа рыла урыстәылатәи аҳәынҭқарра арҕәҕәареи, аҿиареи, атәыла аидгылареи, милаҭрацәала ишьақәгылоу Урыстәыла ажәлар ракреи амҩа ду ианысит.

Урыстәылатәи Федерация иахьа иҕәҕәоу, економикала иҿиоу, жәларбжьаратәи аполитикаҿы зҵакы дуу, аҳәынҭқаррақәа жәпакы рзы, Аҧсны аҳәынҭқаррагьы налаҵаны, ҩызара рзызуа, аусеицураҟны аҭакҧхықәра зхы иадызҵо ҳәынҭқарроуп.

Абри амш азы исгәаласыршәарц сҭахуп, Аҧсны Актәи Ахада Владислав Григори-иҧа Арӡынба иажәақәа: «Аҧсны – лахьынҵала Урыстәылоуп ҩызара азызуа».

Ҳажәларқәеи ҳҳәынҭқаррақәеи аиҩызаратәи аидгыларатәи еизыҟазаашьақәа рымацара ракәӡам иеидызҳәало.

Ҳара зқьыла асоциалтәи акультуратәи рахәыцла ҳаидҳәалоуп, ҳара ауаатәыҩсатәи апрофессионалтәи еимадарақәа ҳаидыркылоит.

Ҳара ауаатәыҩса зегьы ҭынха дуны ирымоу - аурыс бызшәа адырра ҳаиднакылоит.

Ҳара ҳаиднакылоит гәык-ҧсыкалатәи ҳаизыҟазаашьа, ҳзеиҧш ҭоурых ҳаҭырла азнеира, аҧеиҧш бзиа азхәыцра, аиҩызара змоу ҳажәларқәа рзы аҭышәынтәалареи аизҳазыҕьареи рзаҧҵаразы иҳамоу агәазыҳәара.

Иахьа сара ашәҟәы дәықәысҵеит Урыстәылатәи Афедерациа Ахада Владимир Владимир-иҧа Путин, Аҧхьагылаҩ ду, Урыстәыла ажәлари Урыстәыла аҩызцәеи Атәыла дуӡӡа ргәы азгәдухартә, уаҵәтәи амш агәра ргартә иҟазҵаз.

Аиқәшаҳаҭра-зинтә шьаҭа змоу аҧсуа-аурыс еизыҟазаашьақәа иццакны аҿиара иаҿуп.

Аҧсни Урыстәылеи ирыбжьоу Аиқәшаҳаҭра аҧҟарақәа аҧсҭазаараҟны ралаҵәара иаҿуп, ҳусеицура иеиуеиҧшым ахырхарҭақәа рхацыркразы аусура мҩаҧысуеит.

Ҳара уснагӡатәны ҳҿаҧхьа иқәгылоуп аҳәынҭқаррабжьаратә еизыҟазаашьақәа рыҽрықәыршәара, Урыстәылеи ҳареи ҳабжьара профессионалла, зхаҭабзиара ҳараку аусеицура аиҿкаара.

Ҳара даара хшыҩла, еиҿкаарыла ҳхы иаҳархәароуп Урыстәыла иаҳнаҭо афинанстә цхыраара, уи аекономика арҿиарахьы, аекономика иреалтәу аҟәшахьы, изықәнагоу аинфраструктуратә проектқәеи аконституциатә еиҭакрақәеи рышҟа иҳархароуп – Аҧсны ҕәҕәаӡа ашьапы иқәгыларц азы.

Абас – аарыхра зылшо, дотациала ишьақәгылоу акәымкәа, иеилыкка иҟоу аҧҟарақәа рыла иаҧҵоу аекономика змоу, аинвестициақәа рзы ишәарҭам, ҳазҭагылоу аамҭа иақәшәо акурортқәа ахьыҟоу, акультурақәа реиҧшымзаарақәа ҳаҭырла ирзыҟоу, феидазмоу аусеицуразы иаарту Аҧсны – Урыстәылатәи Афедерациа зинла иаҟароу ҳәынҭқарраны иқәгылар алшоит имариам Кавказа иаҵанакуа арегион аҟны.

Агәра ганы сыҟоуп, ҳазегьы ҳаидгылар, Урыстәыла дуӡӡа иаҳнаҭо адгылара иабзоураны Аҧсны аизҳазыҕьара шыҟало. Азин сышәҭ, аныҳәа иалахәу зегьы Урыстәыла Амш рыдныҳәаларазы. Аҧсни Урыстәылеи ажәларқәа гәык-ҧсыкала ирзеиҕьасшьоит аҭынчра, аманшәалара, аизҳазыҕьара.


Возврат к списку