13.10.2020
Аԥсны Аҳәынҭқарра Ахада Аслан Бжьаниа еицырдыруа аҳәынҭқарратә, ауаажәларратә усзуҩы, «Ахьӡ-Аҧша» аорден I аҩаӡара занашьоу Тарас Мирон-иԥа Шамба иԥсҭазаара иалҵра инамаданы иуацәеи иҭынхацәеи дрыдышшылеит.
Адышшыларатә цҳамҭаҟны иҳәоуп:
«Гәалсра дула срыдышшылоит еицырдыруа аҳәынҭқарратә, ауаажәларратә усзуҩы, «Ахьӡ-Аҧша» аорден I аҩаӡара занашьоу Тарас Мирон-иԥа Шамба иуацәеи иҭынхацәеи иԥсҭазаара иалҵра инамаданы. Зыԥсҭазаара зегьы Аԥсны амаҵура иазкыз ауаҩы иԥсра цәыӡ дууп ҳажәлар зегьы рзы.
Тарас Мирон-иԥа дыруаӡәкуп исуверентәу аԥсуа ҳәынҭқарра ашьақәгылара ахыҵхырҭақәа рыҟны игылаз, шықәсарацәала Аԥсны аинтересқәа рыхьчареи аҳәынҭқарратә институтқәа рырӷәӷәареи рыҟны илагаламҭа дууп.
Ас еиԥш ауаҩы иԥсра Аԥсны атәылауаҩ дарбанзаалак гәалсрыла, хьааны идикылоит.
Тарас Мирон-иԥа иҭаацәа зықәшәаз арыцҳараҟны гәыла-ԥсыла срыдгылоуп, рхьаа рыцеиҩысшоит».