Аҧсны Аҳәынҭқарра Ахада

 

Аслан Бжьаниеи Аҧсны иҟоу Урыстәыла ацҳаражәҳәаҩи реиҧылара

23.04.2020
Аслан Бжьаниеи Аҧсны иҟоу Урыстәыла ацҳаражәҳәаҩи реиҧылара

Аҧсны Аҳәынҭқарра Ахада Аслан Бжьаниа Аҧсны Аҳәынҭқарраҟны иҟоу Урыстәылатәи Афедерациа Аҷыдалкаатәи Азинмчызмоуи ацҳаражәҳәаҩ Алеқсеи Аркади-ҧа Двинианин дидикылеит.

Аҳәынҭқарра Ахада ацҳаражәҳәаҩ аҧсшәа иаҳәаны, далацәажәеит коронвирус аҿагылара иазку азеиҧш усмҩаҧгатәқәа рынагӡараҟны аҩ-тәылак русбарҭабжьаратә усеицура азҵаарақәа, аҧсны-уырстәылатәи аҳәааҟны имҩаҧысуа аусмҩаҧгатәқәагьы убрахь иналаҵаны.  

«Сара ишәарҭоу авирус иадҳәалоу Урыстәыла иҟоу аҭагылазаашьа сацклаҧшуеит. Ҳара иара убас Урыстәылатәи Афедерациаҟны иҟанаҵо ашьаҿақәа ҳаҽрықәыршәо ҳаауеит, ҷыдала, Краснодартәи акәакь аҟны. Сара уажәы Валери Рамшьыхә-иҧа сиацәажәон, уи инарҭбааны адырра сиҭеит. Ҳәарада, аҳәынҭқарратә ҳәаа аусура арежим макьана аҧсахра аҭахым ҳәа ҳазааит.  Аҭагылазаашьа схы иархәаны, иҭабуп ҳәа шәасҳәар сҭахуп Урыстәылатәи Афедерациа анапхгара Аҧсны жәлар рзы иҟанаҵо ацхырааразы. Сара издыруеит арахь иҷыдоу атехника шааз, ианаҭахха адезинфекциа иазку аусмҩаҧгатәқәа рынагӡара ишазхиоу. Ари даҽазныкгьы иаҳнарбеит бзиа ҳшеибабо, ҳшеихӡыӡаауа, аҧхьаҟатәи ҳҧеиҧшгьы хымҧада ишеидҳәалахо», - иҳәеит Аслан Бжьаниа.

Урыстәыла Ацҳаражәҳәаҩ  аҳәынҭқарра Ахада идиныҳәалеит амаҵурахьы инеира, иҳәеит аҩ-тәылак реизыҟазаашьа аҿиара аиуеит ҳәа, ирыбжьоу аиқәшаҳаҭрақәа рҳәаақәа рыҩныҵҟа аҿиара дшақәгәыҕуа:

«Азин сышәҭозар, даҽазныкгьы ишәыдысныҳәалоит Аҧсны Ахадас шәалхра.   Ҳгәы иаанагоит 2008-еи 2014-и ашықәсқәа рызтәи аиқәшаҳаҭрақәа хаҭәааны инагӡахоит ҳәа. Иахьазы Урыстәылатәи Афедерациа шәгәаанагара шәыцеиҩнашоит ҳамчқәа зегьы коронавирустә ҿкы аҿагылара ишазктәу азы.    Ареспублика Аиҳабыра Урыстәылатәи Афедерациаҟны рколлегацәа ирыдҵаалеит инагӡатәу аусхкқәа рыҟны ацхыраара иаҳәаны. Иаашьҭуп арахь амедицинатә препаратқәак, ахьчага сабрадақәа уҳәа уб.егь.  Урыстәылатәи Афедерациа Атәылахьчара аминистрра еиҳа оперативла ацхыраара ҟанаҵеит: Ареспублики Крым аҟнытә ауаажәларра зҭаауа ахыбрақәа рдезинфекциазы  иҷыдоу атехника аколонна ааит. Урыстәылатәи аган аҧснытәи аколлегацәа рыдыргыланы ауааҧсыра короновирус ацәыхьчаразы аринахыстәи аусмҩаҧгатәқәа рымҩаҧгара иазхиоуп».

Аиҧылара хыркәшо, Алеқсеи Двинианин Аслан Бжьаниа изеиҕьеишьеит аҳәынҭқарратә маҵзураҟны аихьӡарақәа, агәабзиара, агәамч.

        
            


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org