Ахада ин. н. инапы аҵаиҩит Аҧсны Аҳәынҭқарраҟны ауааҧсыра рыхьчара иазку аҧкратә уснагӡатәқәа рыҧсахразы Адҵа

17.04.2020

Аҧсны Аҳәынҭқарра Ахада инапынҵақәа назыгӡо Валери Бганба инапы аҵаиҩит Аҧсны Аҳәынҭқарраҟны ауааҧсыра рыхьчара иазку аҧкратә уснагӡатәқәа рыҧсахразы Адҵа.

Адҵа атекст аҟны иҳәоуп:

«Аҧсны Аҳәынҭқарра ауааҧсыра рыҧсҭазаареи ргәабзиареи рыхьчареи коронавирустә Коронавирустә ҿкы COVID-19 алаҵәара аҧырҟәҟәаареи хықәкыс иҟаҵаны:

1. Еиҭахацыркзааит мшаҧымза 20 инаркны Аҟәа ақалақьи Аҧсны Аҳәынҭқарра араионқәеи рыҟны афатәаалыҵтәи ақыҭанхамҩатәи џьармыкьақәа русура администрациа ахада ишьақәиргыло аграфики аҧҟарақәеи инарықәыршәаны.
Аҧсны аҳәынҭқарратә санитартә ҳақьым хада, асанитартә-епидемиологиатә маҵзурақәа Аҟәа ақалақьи Аҧсны Аҳәынҭқарра араионқәеи еиҿыркааит зусура еиҭахацыркхо аџьармыкьақәа рырзҩыдатәра амҩаҧгара.
2. Иаҧыхзааит 2020 шықәса мшаҧымза 20 инаркны Гагра араиони Гал араиони рыҟны акомендантә сааҭ.
3. Иаанкылазааит Аҧсны Аҳәынҭқарра адгьылҵакыраҟны акультуратә, абаҩрҵәыратә, аспорттә, арлахҿыҿратә, алалабаратә, ацәыргақәҵатә усмҩаҧгатәқәа рымҩаҧгара 2020 шықәса лаҵарамза 1 аҟынӡа.
4. Иаанкылазааит Аҧсны Аҳәынҭқарраҟны ачаратә, аныҳәатә, егьырҭ усмҩаҧгатәқәа рымҩаҧгара 2020 шықәса лаҵарамза 1 аҟынӡа.
Иаанкылазааит иарбоу аамҭа аҩныҵҟа ачаратәи егьырҭ аныҳәатә залқәа русура.
5. Иаанкылазааит Аҧсны Аҳәынҭқарра адгьылҵакыраҟны атуристтәи аекскурсиатәи усура 2020 шықәса лаҵарамза 1 аҟынӡа.
Иаанкылазааит иарбоу аамҭа аҩныҵҟа атуристқәеи аекскурсантцәеи зҭаауа аобиектқәа русура.
6. Иаанкылазааит асасааирҭақәа, агәабзиарачаҧарҭақәа, асасааирҭа ҩнқәа, иара убас даҽа ҭыҧқәак рыҟны аҭыҧ нкылареи, ауааҧсыра рыдкылареи рыҩнаҵареи 2020 шықәса лаҵарамза 1 аҟынӡа.
7. Иҧкызааит атәылауаа ркатегориақәа зегьы ирыҵаркуа атәылауаа аҧсны-урыстәылатәи аҳәынҭқарратә ҳәаа аужьратә пунктқәа рыла ралалара 2020 шықәса лаҵарамза 1 аҟынӡа:
- Аҧсны Аҳәынҭқарраҟны аккредитивра змоу адипломатиатә усҳәарҭақәа русуҩцәа, Аҧсны Аҳәынҭқарраҟны ААМ Аҳәаахьчаратә усбарҭа аррамаҵзуҩцәа, Еиду урыстәылатәи арратә база;
- жәларбжьаратәи аидарақәа мҩанызго ахархәагақәа рныҟәцаҩцәа;
Аидаратә дәыҕбақәа рныҟәцаҩцәа;
- атәым ҳәынҭқаррақәа рмедицинатә усҳәарҭақәа рыҟнытә илҩаау Аҧсны аҳәынҭқарра атәылауа, ирыцу ахаҿқәа (аҭынхацәа);
хымҧадатәи рҽыҧхьакреи иақәнагоу амедицинатә хылаҧшра рыҭареи раан ҿыц иизи урҭ рҭаацәеи, атәым ҳәынҭқаррақәа рмедицинатә усҳәарҭақәа рыҟнытә илҩаау
-Аҧсны атәылауаа рыҧсыбаҩ аагареи урҭ ирыцу ахаҿқәа (аҭынхацәа) рыда.
8. Коронавирустә ҿкы COVID-19 ачымазара ахьышьақәыргылоу аҭагылазаашьақәа рыҟны 14 мшы ҿҳәарас иаҭаны атәылауаа рҽыҧхьакра алыршазааит.
9. Иаанкылазааит ҳазада ахәаахәҭра ахьымҩаҧысуа адәқьанқәа (диути-фри) русура аҧсны-урыстәылатәи аҳәынҭқарратә ҳәааҟны 2020 шықәса лаҵарамза 1 аҟынӡа.
10. Иаанкылазааит 2020 шықәса лаҵарамза 1 аҟынӡа аресторанқәа, акафеқәа, абарқәа, аҧацхақәа, акрыфарҭақәеи ауаажәларратә крыфарҭақәа ирызку егьырҭ аобиектқәа, ас еиҧш иҟоу акрыфарҭақәа атәылауаа рҭаарада, идәылганы амаҵура аламҵакәа, иара убас иҿаҵоу анагара.
11. Иаанкылазааит ауаажәларратә транспорт (ақалақьҩныҵҟатә, ақалақьнҭыҵтә, ақалақьбжьаратә) аныҟәара атакси аламҵакәа 2020 шықәса лаҵарамза 1 аҟынӡа.
12. Иаанкылазааит 2020 шықәса лаҵарамза 1 аҟынӡа ахцәыҟаҵарҭақәа, аҽырҧшӡарҭақәа, акосметологиатә салонқәа, фитнес-центрқәеи аспорттә задқәеи, СПА-салонқәа, асаунақәаа, массажтә салонқәа русура.
13. Иаанкылазааит 2020 шықәса лаҵарамза 1 аҟынӡа астоматологиатә маҵзурақәа рынагӡара иазку аусура иаарласны, хырҧашьа змам аформақәа рыҟны астоматологиатә цхыраара ахьаҭаху ачымазарақәеи аҭагылазаашьаақәеи аламҵакәа.
14. Иаанкылазааит акультура аусҳәарҭақәа (атеатрқәа, амузеиқәа, абиблиотекақәа, акультуратә центрқәа, акультура аханқәа, аконцерттә залқәеи аҭоурых-культуратә ҳәырҧсаррақәа) русура 2020 шықәса лаҵарамза 1 аҟынӡа.
15. Аҳәынҭқарратә напхгараҭаразы ихадоуи аҭыҧантәии аусбарҭақәа, аҳәынҭқарратә усҳәарҭақәеи аиҿкаарақәеи 2020 шықәса лаҵарамза 1 аҟынӡа 60 шықәса иреиҳаны изхыҵуа аусуҩцәеи ашколнӡатәи ақәра змоу ахәыҷқәа змоуи рџьатә (рмаҵуратә) напынҵақәа рынагӡараҟнытә рхы иақәиҭыртәааит аусура ҧырхага амҭакәа, руалафахәы еиқәырханы.
Хазхаҭалтәи аусҳәарҭақәа, анаплакқәа рнапхгаҩцәа ирабжьгазааит 2020 шықәса лаҵарамза 1 аҟынӡа 60 шықәса иреиҳаны изхыҵуа аусуҩцәеи ашколнӡатәи ақәра змоу ахәыҷқәа змоуи рџьатә (рмаҵуратә) напынҵақәа рынагӡараҟнытә рхы иақәиҭыртәааит аусура ҧырхага амҭакәа, руалафахәы еиқәырханы.
16. Аҳәынҭқарратә напхгараҭаразы ихадоуи аҭыҧантәии аусбарҭақәа, аҳәынҭқарратә усҳәарҭақәеи, анаплакқәеи, аиҿкаарақәеи рнапхгаҩцәа иааныркылааит иазгәаҭоу аусбарҭақәа, аусҳәарҭақәа, аиҿкаарақәа русзуҩцәа аҳәаанырцәтәи аустәныҟәарақәа рышҟа рдәықәҵара 2020.
17. Иаанкылазааит ахәыҷтәы школнӡатәи усҳәарҭақәа русура 2020 шықәса лаҵарамза 1 аҟынӡа.
18. Аҧсшьармшқәа ирыцҵазааит ашколтә ҵараиуратә усҳәарҭақәа рыҟны 2020 шықәса лаҵарамза 1 аҟынӡа.
19. Иаанкылазааит азыҟаҵарақәа Аҧснытәи аҳәынҭқарратә университет, Аҟәатәи иаарту аинститут аҟны, иара убас Аҧсны Аҳәынҭқарра абжьара-занааҭтә ҵараиуратә усҳәарҭақәа рыҟны 2020 шықәса лаҵарамза 1 аҟынӡа.
20. Иаанкылазааит аҵараиуратә кружокқәа, аспорттә, акәашаратә, аҽазыҟаҵарә залқәа русура 2020 шықәса лаҵарамза 1 аҟынӡа.
21. Иаанкылазааит 2020 шықәса мшаҧымза 20-нӡа атәылауаа адинтә еиҿкаарақәа ркульттә обиектқәа рҭаара, адинтә еиҿкаарақәа рдоуҳамаҵзуҩцәеи рдинтә хаҭарнакцәеи аламҵакәа лаҵарамза 1 аҟынӡа.
22. Абри Адҵа анагӡаразы аҭакҧхықәра рыдҵара шьақәыргылазааит азинмчы змоу аусбарҭақәа:
Аҧсны Аҳәынҭқарра Афинансқәа рминистрра, Аҧсны Аҳәынҭқарра Акультура аминистрра, Аҧсны Аҳәынҭқарра Аҵара аминистрра, Аҧсны Аҳәынҭқарра аҿари аспорти русқәа рзы аилак, Аҧсны Аҳәынҭқарра ақалақьқәеи араионқәеи радминистрациақәа рхадацәа».

- Аҟәа ақалақьи араионқәеи радминистрациақәа; Аҧсны аҳәынҭқарратә санитартә ҳақьым хада, Аҧсны Аҳәынҭқарра Аҩныҵҟатәи аусқәа рминистрра – Адҵа апункт 1 анагӡаразы;
- Аҧсны Аҳәынҭқарра Аҩныҵҟатәи аусқәа рминистрра – Адҵа апунктқәа 2, 3, 4, 11 рынагӡаразы;
- Акурортқәеи атуризми рзы Аҧсны Аҳәынҭқарратә еилакы – апунктақә 5, 6 анагӡаразы;
- Аҧсны Аҳәынҭқарратә шәарҭадара амаҵзура -– Адҵа апункт 7 анагӡаразы;
- Аҧсны Аҳәынҭқарра агәабзиарахьчареи асоциалтә еиқәыршәареи рзы аминистрра; Аҧсны аҳәынҭқарратә санитартә ҳақьым хада; араионқәеи рхадацәа – Адҵа апункт 8 анагӡаразы;
- Аҧсны Аҳәынҭқарратә ҳазалхратә еилакы – Адҵа апункт 9 анагӡаразы;
- Аҟәа ақалақьи араионқәеи рхадацәа; Аҧсны Аҳәынҭқарра Аҩныҵҟатәи аусқәа рминистрра – адҵа апунктқәа 10, 12, 13 рынагӡаразы;
- Аҧсны Аҳәынҭқарра Акультура аминистрра; Аҟәа ақалақьи араионқәеи рхадацәа – Адҵа апункт 14 анагӡаразы;
- Аҧсны Аҳәынҭқарра Аминистрцәа реилазаара Аппарат – Адҵа апункт 15 анагӡаразы;
- Аҧсны Аҳәынҭқарра Афинансқәа рминистрра – Адҵа апункт 16 анагӡаразы;
- Аҧсны Аҳәынҭқарра аҵара аминистрра – Адҵа апунктқәа 17-20 рынагӡаразы.
23. Абри Адекрет амч аиуеит 2020 шықәса мшаҧымза 4 инаркны».

Возврат к списку