Аҧсны Аҳәынҭқарра Ахада

 

Ахада Шьамтәылатәи Арабтә Республика адепутатцәа рделегациа идикылеит

01.10.2019

Цәыббрамза 1 азы Аҧсны Аҳәынҭқарра Ахада Рауль Ҳаџьымба Аҧсны Аиааиреи Ахьыҧшымреи рныҳәа зҽалазырхәырц иааз Шьамтәылатәи Арабтә Республика адепутатцәа рделегациа идикылеит.

Аҳәынҭқарра Ахада асасцәа аҧсшәа реиҳәеит.

«Аҧсныҟа шәаара даара сеигәырӷьеит. Ҳара гәыблыла иаҳгәалашәоит Шьамтәыла ҳаҟазаара. Сгәы иаанагоит иҟаҵоу ашьаҿақәа аҧхьаҟагьы ирыцҵатәуп, ирӷәӷәалатәуп ҳәа. Ишәзеиӷьасшьоит аҭынчра, сара агәра згоит Шьамтәылатәи ажәлар риаара», - иҳәеит Ахада. 

Шьамтәылатәи Арабтә Республика адепутат Џьансеҭ Казанҧҳа аделегациа алахәцәа рыхьӡала иҟаиҵаз адкыларазы Ахада иҭабуп ҳәа иалҳәеит.

«Ҳара иаҳҭахуп ишәыдаҳныҳәаларц Ахада имаҵурахьы еиҭа шәалхра, Шьамтәылатәи Ареспублика Апарламент Аиҳабы ихьӡала саламгьы шәаҳҭарц. Гәахәас иҟаҳҵоит Аиааира амш ныҳәа ҳхы алаҳархәыртә еиҧш аҭагылазаашьа ахьҳамоу. Шьамтәылатәи ажәлар рыхьӡала ҳшәыдныҳәалоит, Аҧсны жәлар зегьы ирзеиӷьаҳшьоит аихьӡарақәа, ақәҿиарақәа.

Ҳара иара убас Шьамтәылатәи арепатриантцәа ҳарҧылеит, дара рҟынтә ирацәоуп иҳаҳаз ажәа ҧхақәа, шаҟа адгылара рышәҭо азы. Аҧсны жәлар ирдыруеит аибашьра закәу, аҧсуа жәлари атәыла анапхгареи иҭабуп ҳәа раҳҳәарц ҳҭахуп иҟарҵо адгылареи ацхыраареи рзы»,- лҳәеит Џьансеҭ Казанҧҳа.

Аиҧылара ахыркәшамҭаз агәаларшәагатә ҳамҭақәа еимырдеит.

7.JPG

4.JPG

6.JPG



Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT