Аҧсны Аҳәынҭқарра Ахада

 

Аҧсны Аҳәынҭқарра Ахада имаҵурахьы иеиҭалхразы Рауль Ҳаџьымба ихьӡала адныҳәаларақәа ааира иаҿуп

12.09.2019

Урыстәылатәи Афедерациа Ахада Ицхырааҩ Владислав Сурков Рауль Ҳаџьымба Аҧсны Аҳәынҭқарра Ахада имаҵурахьы иеиҭалхра идиныҳәалеит, изеиҕьеишьеит агәабзиара, аҳәынҭқарра Ахада имаҵураҟны аихьӡарақәа.


Афганистан аветеранцәа Аҧснытәи реидгыла Рауль Ҳаџьымба Аҧсны Аҳәынҭқарра Ахада имаҵурахьы иеиҭалхра идырныҳәалеит.

«Ҳаҭыр зқәу Рауль Џьумка-иҧа, милаҭрацәала еилоу Аҧсны жәлар Ахада иҿҳәара ҿыц азы амандат шәыҭаны шәыгәра шырго аадырҧшит.

Иаадырҧшит иара убас жәларбжьаратәи анаҧшҩцәа зхылаҧшуаз зхы иақәиҭу, ииашоу алхрақәа ирыдгыланы ҳажәлар адемократиа апринципқәа ишрықәныҟәо.

Ҳара агәра ҳгоит Шәара адемократиа аҿиареи ҳуаажәларра рекономикатә ҭагылазаашьа бзиа алыршареи рымҩа шәшацәхьамҵуа.

Ажәлар ишәырҭаз агәрагара милаҭрацәала еилоу Аҧсны жәлар рыҿиареи реизҳазыҕьареи рус аҟны илагаламҭаны иҟалоит, иара убас ҳтәыла жәларбжьаратәи аҩаӡараҟны ашьақәырҕәҕәара иацхраауеит ҳәа иҳаҧхьаӡоит», - абас азгәаҭоуп Афганистан аветеранцәа Аҧснытәи реидгыла иҟанаҵаз адныҳәалараҟны.


Аҧсны Жәлар рпоет, Аҧсны аҭҵаарадыррақәа ракадемиа академик Мушьни Лашәриа Рауль Ҳаџьымба Аҧсны Аҳәынҭқарра Ахада имаҵурахьы иеиҭалхра идиныҳәалеит.

«Сара агәра згоит аринахысгьы аҧсуа ҳәынҭқарра аргылараҟны Шәара шәлагаламҭа аҵак ду аманы ишыҟало. Ишәзеиҕьасшьоит Ҳаҧсадгьыли ҳажәлари рымаҵ аураҟны аҧхьаҟагьы аихьӡарақәа».

Урыстәыла Ашәҟәыҩҩцәа Реидгыла Ахантәаҩы Николаи Иванов иҟаиҵаз адныҳәалараҟны иҳәоуп:

«Шәара, иналукааша аҳәынҭқарратәи аполитикатәи усзуҩы, гәык-ҧсыкала ишәыдысныҳәалоит иреиҳаӡоу аҳәынҭқарратә маҵурахьы еиҭа шәалхра. Ахақәиҭра азықәҧаҩцәа, фырхаҵара згым ажәлар ргәазыҳәара хҳәаара аҭахымкәа иҟоуп. Ааигәа Аҧсны имҩаҧысыз Аҧсни Урыстәылеи рышәҟәыҩҩцәа реиҧылара ҩ-тәылак рышәҟәыҩҩцәа рыбжьара арҿиаратә еизыҟазаашьақәа рырҿиара ахацыркра иацхрааит, иҭабуп ҳәа шәаҳҳәар ҳҭахуп ари шәаҧшьгаразы, аҳәынҭқаррақәа рыбжьара алитературатә еимадарақәа рыҿиара иашәҭаз адгыларазы. Ҳгәыҕуеит ҳажәларқәа рыбжьара иҿыцу лыҵшәазмоу аизыҟазаашьақәа шьақәгылап ҳәа».

Шьамтəылатəи Арабтə Республика апарламент адепутат, Шьамтəыла аибашьратə еидысларақəа рҿы иҭахаз ргəалашəаразы Агəыҳалалратə Фонд анапхгаҩы, аинрал Уалид Маршьан иҧшəмаҧҳəыс Џьансеҭ Казанҧҳа Рауль Ҳаџьымба аҳəынҭқарра Ахадарахьы иеиҭалхра идылныҳəалеит, изеиҕьалшьеит аихьӡара ҿыцқəа, Аҧсны жəлар зегьы - аизҳазыҕьара.

Аҧсуа культуратə центрқəа рфедерациа ахада Аҭанур Аҟəысба иҟаиҵаз адныҳəалараҿы, иазгəаҭоуп:

«Ҳаҭыр зқəу, Рауль Џьумка-иҧа! Изаамҭанытəиу Аҧсны Аҳəынҭқарра Ахада иалхрақəа ҳара ҳҭоурыхтə ҧсадгьыл аҿы қəҿиарала имҩаҧысит. Ҳгәы иаанагоит, ари ҳаҧсадгьыли, адунеи иқәынхо ҳдиаспореи рзы алҵшəа аманы иҟалоит ҳәа. Ҭырқəтəылатəи Ареспубликаҿы иҟоу Аҧсуа культуратə центрқəеи ҳдиаспореи рыхьӡала ишəыдаҳныҳəалоит ижəгаз аиааира, шəусураҿы ишəзеиҕьаҳшьоит ақәҿиарақәа. Агəра ҳгоит, ишəымоу хəы змаӡам аҧышəа аҧсуа жəлар иҿыцу аҳаракырақәеи аихьӡарақәеи рышҟа ишнанаго».

Иорданиа иҟоу аҧсуаа реидгыла ахантəаҩы Ҳасан Абаза иҟаиҵаз адныҳəалараҿы иҳəоуп: «Иорданиатəи аҧсуаа реидгыла ахьӡала ишəыдысныҳəалоит алхрақəа рҿы ижəгаз аиааира. Ишəзеиҕьаҳшьоит аҧхьаҟагьы Ҳаҧсадгьыл аизҳазыҕьара иазку шəусқəа зегьы рҿы аихьӡарақəа.


Урыстəылатəи Афедерациа Афедералтə Еизара Аҳəынҭқарратə Дума I, VI, V и VII ааҧхьара адепутат, Ихьыҧшым Аҳəынҭқаррақəа Реидгыла аусқəеи ҳџьынџьуаа реимадареи рзы Аҳəынҭқарратə Дума аилак ахантəаҩы актәи ихаҭыҧуаҩ Константин Затулин иҟаиҵаз адныҳəаларатə аацҳамҭаҿы иазгəаҭоуп:

«Акыр иаҧсоу, Рауль Џьумка-иҧа! Ишəыдысныҳəалоит Аҧсны Аҳəынҭқарра Ахада иалхрақəа рҿы ижəгаз аиааира! Урыстəылатəи Афедерациа Аҳəынҭқарратə Думаҿы ибзианы еилыркаауеит, излыҵыз ишьаарҵəыраз Аџьынџьтəылатə еибашьра анаҩс, иуадаҩу аиҭашьақәгылара мҩа иану Аҧсны аҩнуҵҟатəи аполитикаҟны ишыҟам имариам амҩақәеи аӡбарақәеи. Шəара аҧхьа шәнаргыланы, аҧсуа жəлари милаҭрацəала Аҧсны иқәынхо ауаажəлар зегьи ирзеиҕьаҳшьоит Аҳəынҭқарра аизҳазыҕьареи аҭынч ҧсҭазаара аҿиара аус аҟны аидгылареи. Аҧхьаҟа аус дуқəа шəаҧхьа ишьҭоуп, урҭ рыҟны Урыстəыла адгылара шшəынаҭало агәра жәгарц ҳҭахуп».

Адыгеиатəи Ареспублика Аҳəынҭқарратə бжьгаҩы Аслан Тхакушинов иҟнытә адныҳəаларатə аацҳамҭаҿы иазгәаҭоуп:

«Ҳаҭыр зқəу Рауль Џьумка-иҧа! Гəык-ҧсык ала ишəыдыснҳəалоит Аҧсны Аҳəынҭқарра Ахада имаҵурахьы еиҭа шәалхра. Агəабзиара, агəамч, аихьӡарақәа».

Ҟабарда-Балкариатəи Ареспублика Ахада Казбек Коков иҟаиҵаз адныҳəаларатə аацҳамҭаҿы иазгəаҭоуп:

«Аҧсны Аҳəынҭқарра Ахада иалхрақəа рҿы ижəгаз аиааира гəахəара дула исыдыскылеит. Гəык-ҧсык ала ишəыдыснҳəалоит шəзыҧсахаз шəыжəлар рыгəрагара. Ишəзеиҕьасшьоит агəабзиара, Аҧсны Аҳəынҭқарра ахьӡала кыршықәсала лыҵшәабзиала аусура. Агəра згоит шәара шәыпрофессионалтə, шәустə, иара убас аҧызатә ҟазшьақəа ирыбзоураны шəыуаажəлаар ргəыҕрақəа ишырмеижьо». 

… 

Алада Уаԥстәыла Ареспублика Апарламент Ахантәаҩы Алан Тадтаев иҟнытә иааз адныҳәаларатә шәҟәаҿы иазгәаҭоуп:

«Ҳаҭыр зқәу Рауль Џьумка-иԥа! Аԥсны Аҳәынҭқарра Ахадас шәалхра инамаданы ишәыдышәкыл гәык-ԥсык ала адныҳәалара!

Агәра згоит, Шәара шәыхьӡ-шәыԥшеи, шәполитикатә ԥышәеи алшара шшәырҭо иреиҳау аҳәынҭқарратә  маҵзураҿы қәҿиарала аусура. Шәара шәалхыҩцәеи аԥсуа жәлар зегьи ишәырҭаз агәрагара шаҳаҭра ауеит ихьыԥшым исуверентәу аҳәынҭқарра аргыларазы имҩаҧыжәго аусураҿы ихадараны иахьыҟоу, асоциалтә-економикатә ҿиареи, жәларбжьаратәи аренаҿы апозициақәа рырӷәӷәареи, ауаа гәцаракрала рызнеиреи, рыҧсҭазаашьа аиҕьтәреи рус аҿы  адгылара шшәырҭо атәы аҳәоит.

Алада Уаԥстәыла ахә ҳаракны иршьоит, акыргьы еиҷаҳауеит Аԥсни ҳареи ҳаиҩызара, аԥхьаҟагьы ҳаизыҟазаашьақәа есааира ишыӷәӷәахо агәра ҳгоит.

Ҳаҭыр зқәу Рауль Џьумка-иԥа, ишәзеиӷьасшьоит агәабзиара, Аԥсны жәлар рымаҵ аураҿы аихьӡарақәа».

 …

Урыстәылатәи Афедерациа Аҳәынҭқарратә Дума адепутат Фатих Сибагатуллин иҟаиҵаз адныҳәаларатә аацҳамҭаҟны, иҳәоуп:

«Ҳаҭыр зқәу, Рауль Џьумка-иԥа!

Ишәыдысныҳәалоит Аԥсны Аҳәынҭқарра Ахадас еиҭа шәалхра! Шәара шәганахь иаадырԥшыз агәрагара шаҳаҭра ауеит шәтәыла арҿиара аус аҟны шәлагала шырацәоу.

Агәра згоит, Шәара шәыхьӡ-шәыԥша, шәыпрофессионализм, шәыԥсҭазааратә ԥышәа ду, хаҭала шәҟәазшьақәа  шәыԥсадгьыл аизҳазыӷьара иазку шәыгәҭакқәа қәҿиарала рынагӡара ишацхраауа.

Гәык-ԥсык ала ишәзеиӷьасшьоит агәабзиара, аманшәалара, еицакра зқәым агәамч, шәусураҿы аихьӡара ҿыцқәа».

 …

 Аԥсны Аҳәынҭқарраҟны иҟоу Приднестровиа-Молдавиатәи Ареспублика Аофициалтә хаҭарнакра ахада Гарри Кәпалба иҟаиҵаз адныҳәаларатә шәҟәаҿы, иҳәоуп:

«Ҳаҭыр зқәу, Рауль  Џьумка-иԥа!

Гәык-ԥсык ала ишәыдысныҳәалоит Аԥсны Аҳәынҭқарра Ахада  имаҵурахьы шәеиҭалхра.

Азин сышәҭозар,  агәрагара  шсымоу сҳәарц сҭахуп иҳараку аҳәынҭқарратә маҵзураҿы шәара шәусура иахьатәи Аԥсны асоциалтә-економикатә ҭагылазаашьа лассы аиҕьтәра, иара убас приднестровиатәи-аԥснытәи аизыҟазаашьақәа рырӷәӷәара ишацхраауазы. Шәара шәнапы иҵышәххьо, насгьы  зынагӡара шәгәы иҭоу апроектқәа аизҳареи аҿиареи роуааит.

Гәык-ԥсык ала ишәзеиӷьасшьоит Шәаргьи Аԥсны жәларгьы аидгылара, аҳәоуеиқәшәара Аԥсуа ҳәынҭқарра аҧхьаҟагьы аизҳазыҕьара аус аҟны». 


Краснодартәи атәылаҿацә Администрациа ахада ихаҭыԥуаҩ, Ҟәбантәи аказакцәа рырхәҭа атаман, аинрал Николаи Долуда иааишьҭыз аацҳамҭаҿы, иҳәоуп:

Ишәыдысныҳәалоит Аԥсны Аҳәынҭқарра Ахадас шәалхра!

Шәара шәполитикатә ҟәыӷареи, зыдкылара шәылшо аӡбамҭақәеи, шәхы иадышәҵо аҭакԥхықәреи Аԥсны аҿиара аус аҟны аҳаҭыр ду иаҧсамзар ҟалом. 

Гәык-ԥсык ала ишәзеиӷьаҳшьоит агәабзиара, кавказтәи ақәранҵыра ду».


Урыстәылатәи Афедерациа Аҳәынҭқарратә дума адепутат  Гаџьимет Сафаралиев  иҟаиҵаз адныҳәаларатә аацҳамҭаҿы, иазгәаҭоуп:

«Ҳаҭыр зқәу, Рауль Џьумка-иԥа!               

 Гәык-ԥсык ала ишәыдысныҳәалоит Аԥсны Аҳәынҭқарра Ахада имаҵзурахьы шәалхра. Уи шәара шәылшамҭақәа разхаҵареи Ареспублика атәылауаа иҳаҩсыз ашықәсқәа ирылагӡаны  Шәара шәнапхгарала Аԥсны иҟаҵаз аиҭакрақәеи ирырҭаз ахәшьара ҳараки ртәы аҳәоит.

Агәра згоит, Шәара шәыпрофессионалтә ԥышәа, шәнапхгаратә ҟыбаҩ, имҩаҧыжәгоз аиҿкааратә усура, иара убас хамеигӡарада шәыҧсадгьыл амаҵ аура иабзоураны аҧхьаҟагьы аихьӡара дуқәа шшәоуа.

Шәаргьы Аԥсуа жәларгьы  ишәзеиӷьасшьоит аҭынчра, аизҳазыҕьара, шәыгәҭакқәа рынагӡараҟны аихьӡарақәа».


Ауаажәларратә ветерантә еиҿкаара «Абааш» иҟанаҵаз адныҳәалараҿы, иазгәаҭоуп:

«Агәыӷра ааҳарԥшуеит, шәара шәнапхгаратә ԥышәа, шәыпрофессионализм ҳуаажәлар ргәы змырҭынчуа апроблемақәа рыӡбара аус аҟны хархәара шроуа. Ҳара иаҳдыруеит Шәара шаҟа ҳаҭырқәҵарыла Аԥсны Аџьынџьтәылатә еибашьцәа шәаҳзыҟоу, гәыҩбаракгьы ҳамам аԥхьаҟагьы ацхыраареи адгылареи шҳашәҭо азы.

Ишәзеиӷьаҳшьоит агәабзиара, агәамч, ақәҿиарақәа шәыжәлар рымаҵ аураҿы». 

 … 

Аԥсны Аҳәынҭқарраҿы иҟоу Алада Уаԥстәыла Ареспублика   Аҷыдалкаатәи Азинмчзмоуи Ацҳаражҳәаҩ  Олег Боциев иҟаиҵаз дныҳәаларатә шәҟәаҿы, иазгәаҭоуп:

«Ҳаҭыр дула ишәыдысныҳәалоит иреиҳау аҳәынҭқарратә маҵзураҿы  Аԥсны Аҳәынҭқарра Ахадас шәеиҭахьалырхыз!

Шәара еиҭа шәалхра шаҳаҭра ауеит Аԥсны Аҳәынҭқарра Ахада иалхразы аиҭабжьыҭара зхы алазырхәыз Аԥсны Аҳәынҭқарра ауаажәларра рыхәҭа дук шәыгәра шыргаз. Агәра згоит, Шәара шәымч-шәылша, шәԥышәа, шәдырра, шәыԥсадгьыл аизҳазыӷьареи шәуаажәлар рыԥсҭазаара аиӷьтәреи ишрызкхо.

Алада Уаԥстәыла Шәара шәзыҧсу аҳаҭыр ду шәықәуп, Шәара ара шәырдыруеит аҩыза бзиеи аԥышәа змоу политикк иаҳасабала. Агәра згоит, иҟашәҵо азҿлымҳара иабзоураны, Алада Уаԥстәылеи Аԥсынтәылеи рыжәларқәа рҭахрақәа рыла ишьақәгылоу аҳәынҭқаррабжьаратә еизыҟазаашьақәа ԥхьаҟа ишыҿиало».


Аԥсны Асахьаҭыхҩцәа реидгыла ахантәаҩы, Аҧсны Жәлар рсахьаҭыхҩы Витали Џьниа иҟаиҵаз адныҳәалараҿы иҳәоуп:

«Гәык-ԥсык ала идысныҳәаларц сҭахуп Аԥсны Аҳәынҭқарра Ахада Рауль Ҳаџьымба алхрақәа рҿы иигаз Аиааира.  Сгәы иаанагоит аиҭакрақәа ирыдҳәалоу аусурақәа мҩаҧгахоит, акультуреи аҟазареи иахәҭоу азҿлымҳара рыҭахоит ҳәа  аҳәынҭқарра аганахьала. Ҳажәлар зегьы ирзеиӷьасшьоит аҭынчра, аҭышәынтәалара, аизҳазыӷьара».

 …

 Урыстәылатәи Афедерациаҟны иҟоу Аԥсны Ацҳаражәҳәаҩ Игор Ахба иҟаиҵаз адныҳәалараҿы иазгәаҭоуп:

 «Урыстәылатәи Афедерациаҿы иҟоу  Аԥсны Ацҳаражҳәарҭа ахьӡала, иара убас хаҭала сара сҟынтә ҳаҭырқәҵарыла ишәыдысныҳәалоит  Аԥсны Аҳәынҭқарра Ахадас шәахьалырхыз!

 Аҧсны жәлар рыҧсҭазаашьа аиҕьтәразы аҳәынҭқарра Ахада иҿаԥхьа иқәгылоу азҵаарақәа зегьы рынагӡараҿы  гәык-ԥсык ала ишәзеиӷьасшьоит ақәҿиарақәа!». 

… 

АУЕ «Москватәи Аҧсуа диаспора» Анапхгара Ахантәаҩы Беслан Агрба иҟаиҵаз адныҳәалараҟны иҳәоуп:

«Ҳаҭыр зқәу Рауль Џьумка-иҧа!

Ишәыдысныҳәалоит Аҧсны Аҳәынҭқарра Ахада иалхрақәа рыҟны ижәгаз аиааира.

 Гәыкала агәра згоит ҳҳәынҭқарра аусхк хадақәа реиҭакра иазку аусура еиҭахацыркхап ҳәа, аҵак ду змоу асоциалтә, аҵараиуратә, аекономикатә программақәа, иара убас атәылауаа раҧшьгарақәа зҿлымҳара ду рыҭахап ҳәа аҳәынҭқарра аганахьала.   

Москватәи адиаспора есқьынгьы адгылара рырҭоит Ҳаҧсадгьыл аҿиара иазку апроцессқәа, урҭ рыцҵара, аҳәаанырцә изыҧсоу ала ацәыргарагьы иазхиоуп аҧхьаҟа. 

Ишәзеиҕьасшьоит агәкамҳара, Аҧсны аизҳазыҕьара иазку шәусураҟны агәамчи агәаҕьреи, иара убас еицҿакрыла аус шәыцызуа апрофессионалцәа, инарҵауланы мҽхакыҭбаала аиҭакрақәеи изинтәу, економикала иҕәҕәоу, исуверентәу аҳәынҭқарра аҧҵара иазку агәҭакқәеи рынагӡара зылшо». 


Аҧсны Аҭҵаарадыррақәа Ракадемиа Ахада, академик Зураба Џьапуа иҟаиҵаз адныҳәалараҟны иҳәоуп:

«Ҳаҭыр ду зқәу Рауль Џьумка-иҧа!

Аҧсны Аҭҵаарадыррақәа ракадемиа аилазаара ахьӡала гәык-ҧсыкала ишәыдсныҳәалоит шәыжәлар ҩынтәны ишәырҭаз агәрагара!

Ҳҳәынҭқарраҿы изаамҭанытәиу алхрақәа еиҿкаарыла иманшәаланы имҩаҧысит. Аҧсны Алхратә комиссииа хада Аҧсны Ахадас шәшалху азы алкаа ҟанаҵеит, ҳҳәынҭқарра адгылаҩцәа, еиуеиҧшым атәылақәа рнапхгаҩцәа, Урыстәыла Ахада Владимир Путин аҧхьа днаргыланы,шәиааира шәыдырныҳәалоит.

Хаҭала шәара, Аҧсны Аҭҵаарадыррақәа ракадемиеи уи иаҵанакуа аинститутқәеи зинтә шьаҭала, финанстә лшарала рырӷәӷәараҿы, аҳәынҭқарратә дгылара рыҭараҿы, иара убас аҭҵаарадырратә кадрқәа реиҵааӡараҿы шәлагала бзианы ирдыруеит Аҧсны аҭҵаарадырратә акзаара. Сагьақәгәыӷуеит ҧхьаҟагьы ари агәцаракра иацҵахоит, аҳәынҭқарреи аҭҵаарадырреи реимадарақәа акыр еиҵыххоит, иҵаулахоит ҳәа. Ижәдыруеит, иарбанҳәынҭқарразаалак аҿиараҿы шьаҭас иҟалароуп аҭҵаара ҿыцқәа, аартра ҿыцқәа, ҳаамҭазтәи аҩаӡара иашьашәалоу адырра ҿыцқәа.

Рауль Џьумка-иҧа, алхыҩцәа бжьыҭарала шәнап ианырҵаз аус ду аҿы, шәдырреи, шәҧышәеи, шәҭакҧхықәреи рышьаҭала, ҳажәлар реидкылара, ракзаара, реизыразра алыршара насыҧс ишәоуааит! Уи иаҭаху агәабзиареи анархеи Анцәа ишәаҭәеишьааит!».


Боливариантәи Ареспублика Венесуелеи Ареспублика Никарагуеи еидбало арҭ аҳәынҭқаррақәа рыҟны иҟоу Аҧсны Аҳәынҭқарра Аҷыдалкаатәи Азинмчзмоуи Ацҳаражҳәаҩ Заура Гәаџьаа иҟаиҵаз адныҳәалараҟны иҳәоуп:

«Ҳаҭыр зқәу Рауль Џьумка-иҧа!

Боливариантәи Ареспублика Венесуела иҟоу Аҧсны Аҳәынҭқарра Ацҳаражәҳәарҭа ахьӡала, хаҭала сара сҟынтә гәык-ҧсыкала ишәыдысныҳәалоит Аҧсны Аҳәынҭқарра Ахада имаҵурахьы иеиҭа шәалхра.

Шықәсырацәалатәи шәааҧсара иаҳәоит Шәара ҧсахрада шәымч-шәылша зегьы, шәыпрофессионалтә дыррақәа, шәҧышәа Аҧсны Аҳәынҭқарра аҿиара ишазышәкуа. Сгәы иаанагоит ҳусеицура иацҵахап ҳәа ҳтәыла арҕәҕәара ахьӡала. Ижәгаз аиааира ишьақәнарҕәҕәоит ишәымоу аполитикатә хьӡы. 

Рауль Џьумка-иҧа, ишәзеиҕьасшьоит агәабзиара, аихьӡарақәа, шәнапы злаку аусқәа рыҟны ақәҿиарақәа, Аҧсны жәлар - аизҳазыҕьара».

 …


 Урыстəылатəи Афедерациа Афедералтə Еизара Аҳəынҭқарратə Дума адепутат Александр Иушьенко «Урыстəылатəи Афедерациа Акоммунисттә партиа» аҟнытә  иҟаиҵаз адныҳәалараҟны иҳәоуп:

«Ҳаҭыр зқәу Рауль Џьумка-иҧа!

  Гәык-ҧсыкала ишәыдысныҳәалоит иреиҳаӡоу, аҭакҧхықәра зцу амаҵурахьы шәалхра!

Аҧсуа менталитет, ҟазара дула Фазиль Искандер иааирҧшыз, хымҧада, иалоуп зхы иақәиҭу ахәыцреи алафи, – убри аҟнытә имариаӡам Ареспубликаҟны ишьақәгылаз аполитикатә ҧсҭазаара. Аха Аҧсны жәлар ирымоуп шәышықәсала иаарго аполитикатә ҟәыҕара, ари аҭагылазаашьа уадаҩ аҟынгьы аиаша адгылара рылнаршоит. Сара агәра згоит шәусушьала шәыдгылаҩцәа рыгәрагара шәаҧсахоит ҳәа, шәоппонентцәагьы урҭ агха шырмыхьыз разагаара шәылшоит ҳәа.   

Шәара Аҧсны азы иҟашәҵаз рацәоуп, агәрагьы згоит уи аиҳагьы шыҟашәҵо ажәлар раҳаҭыр шәаҧсахартә еиҧш.  Ҳаҭыр зқәу Рауль Џьумка-иҧа! Аихьӡарақәа, анасыҧ! Аҧсны аизҳазыҕьара!». 

Адунеизегьтәи аҧсуа-абаза конгресс Иреиҳаӡоу ахеилак Ахантәаҩы Мусса Екзеков иҟаиҵаз адныҳәалараҟны иазгәаҭоуп:

«Адунеизегьтәи аҧсуа-абаза конгресс ахьӡалеи хаҭала сара сҟынтәии ишәыдысныҳәалоит Аҧсны Аҳәынҭқарра Ахада имаҵура ҳаракы ашҟа шәалхра.

 Ишәзеиҕьасшьоит аус шәыцызуа шәҩызцәагьы Шәаргьы, Аҧсны жәлар алархәны, Ареспублика иқәынхо ауааҧсыра рыҧсҭазаашьа аиҕьтәреи атәыла асоциалтә-економикатә ҿиара ашьҭыхреи алзыршо аидеиақәеи апроектқәеи рынагӡара.

 Агәра згоит, Шәара, ҷыдала, аҧсуа-абаза бызшәа, акультура, атрадициақәа реиқәырхареи рырҿиареи рызҵаара хшыҩзышьҭра шашәҭо, иара убас адунеи аҟны иҟоу аҧсуа-абаза диаспора аҩныҵҟа ишьақәгылахьоу аимадарақәа рырҕәҕәареи урҭ рыцҵареи шәшацхраауа.

 Ишәзеиҕьасшьоит агәабзиара, аҭакҧхықәра зцу аҳәынҭқарратә маҵзураҟны аихьӡарақәа». 

  …

Ҭаҭарсҭан Ареспублика Ахада Рустам Минниханов иаацҳамҭаҟны иазгәаҭоуп:

«Ҳаҭыр зқәу Рауль Џьумка-иҧа! Гәык-ҧсыкала ишәыдысныҳәалоит Аҧсны Аҳәынҭқарра Ахада иалхрақәа рыҟны ижәгаз аиааира. Имариамыз алхратә процесси алҵшәақәеи иаадырҧшит Шәара аҧсуа уаажәларра реидкыларазы аҧхьаҟа аус ду  шәнапы ишану, убри аангьы ари аҧхьа аҳәынҭқарратә маҵура ҳарак аҟны имҩаҧыжәгаз аусура ахә ҳаракны изшьаз атәыла ауааҧсыра ишәырҭо адгылара шәақәгәыҕыртә ишыҟоугьы .

   Ишәзеиҕьасшьоит Аҧсны Аҳәынҭқарреи Аҧсни жәлари реизҳазыҕьара ахьӡала гәацҧыҳәаралеи лыҵшәабзиалеи аусура, шәнапы злашәкуа аус бзиақәа рыҟны агәамчи агәышьҭыхреи».

Аурыси аказактә уаажәларратә еиҿкаарақәа Реидгыла ацхантәаҩы Олег Иурченко  иаацҳамҭаҟны иҳәоуп:

«Ҳаҭыр зқәу Рауль Џьумка-иҧа! Гәык-ҧсыкала ишәыдаҳныҳәалоит Аҧсны Аҳәынҭқарра Ахада иалхрақәа рыҟны ижәгаз аиааира.

Ҳара ахә ҳаракны иаҳшьоит Аҧсни Урыстәылеи реиҩызаратә, ргәылеимабзиаратә еизыҟазаашьақәа рырҕәҕәараҟны иҟашәҵо. Агәра ҳгоит ҳҳәынҭқарра аҿиаразы, милаҭрацәала еилоу Аҧсны жәлар рҭагылазаашьа аиҕьтәразы ҳусеицура алҵшәақәа шаиуа. Гәыбаракгьы ҳамам Шәара гәацҧыҳәара ҿыцла аҩныҵҟаполитиктәи асоциалтә-економикатәи ҳасабтәқәа рыӡбара аус ишацышәҵо.

Ҳгәыҕуеит Аҧсны иқәынхо аурыс милаҭ ҩаҧхьа адгылара рышәҭалоит ҳәа.

Гәык-ҧсыкала ишәзеиҕьаҳшьоит аихьӡара ҿыцқәа, ақәҿиарақәа ареспубликеи ауааҧсыреи рыхьӡала имҩаҧыжәго аусураҟны».   


 

Аԥсны Абыргцәа рхеилак Иреиҳаӡоу Асовет алахәылацәа иҟарҵаз адныҳәалараҟны, ҷыдала, иазгәаҭоуп: 

«Аԥсны абыргцәа рхеилак Иреиҳаӡоу Асовет гәык-ԥсыкала ишәыдныҳәалоит Аԥсны атәылауаа иқәынхо раӷьырак ԥасеиԥш уажәгьы, даҽа хәышықәса ҳҳәынҭқарреи ҳуаажәлари рԥеиԥши рразҟи агәрагара нацҵаны, Аԥсны Аҳәынҭқарра анапхгараҿы аԥхьагылара ахьшәаҭәаршьаз.

Иарбан усзаалакгьы, иагьа ԥынгыла ҟаларгьы, жәлар зныԥшыло ргәы асаркьа ианхалаз иакәын измардоз рразҟы.

Аԥсуа жәлар еснагь иацклаԥшуан абарҭ реиԥш иҟаз ауаҩы иҟазшьақәа: иламыс, ипату, итәашьа, игылашьа, иаҳаҭырқәҵашьа, ихәыцшьа, ихаҵашьа, ицәажәашьа, зегь раԥхьа иргыланы, ичҳара.

Абарҭ аҟазшьақәа зегь хаҿык аҿы ирбеит ҳәа ҳгәы иаанагоит раӷьырак ҳалхыҩцәа! Убарҭ ргәаанагара хымԥада иаҭахуп гәҿыӷьра ҟамҵакәа еснагь ацклаԥшра, ашьақәырӷәӷәара. Уи амҩаҿы иаҭахуп иацы ҳазнысыз азхьаԥшра, агәаларшәара, уаҵәти амш иҵегь иманшәалахарц ҳауаажәлар рҭагылазаашьа аиӷьтәразы. 

Ахархәара роуроуп апартиақәеи ауаажәларратә хеидкылақәеи, актәии аҩбатәии атурқәа рҿы Аԥсны Ахада иалхразы еиндаҭлоз акандидатцәа иҟарҵаз азгәаҭақәа; рҭыԥқәа рҿы иргылатәуп агха-ԥха иҟази, аполитикатә ҵаҵӷә змаз аҿԥныҳәақәеи.

Хымԥадатәизароуп аусуратә политикатә леишәа, Аԥсны азакәан ишьақәнарӷәӷәо атәылауаа зегьы еилых ҟамҵакәа, амчхаратә усбарҭақәа ҭакԥхықәра дула иазнеилартә еиԥш аҭагылазаашьа аԥҵара.

Агәра ҳгоит, иаҳхысыз имариамыз ҳаҩныҵҟатәи аполитикатә еибарххарақәа, аимак-аиҿакқәа ааныжьны ҳҳәынҭқарра ауасхыр аҵшәаара акәымкәа, уи арӷәӷәарахьы амҩа ҳанылап ҳәа. 

Иаҳҳәоит ҳаицҿакны — мҩамш! Ҳазшази ҳажәлари рылԥхеи ргәыԥхеи шәыцзааит гагаҵас. 

Ишәзеиӷьаҳшьоит агәамч ӷәӷәа агәабзиара цқьа зцу, аманшәалара, агәахәтәыхьӡара!

Мышьҭабзиала аҩбатәи ахәышықәса! Еиҭа дырҩагьых ачҳара! Хьӡи-ԥшеи рԥеиԥшзааит ҳауаажәлар».


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT