Аҧсны Аҳәынҭқарра Ахада

 

Ареспублика Никарагуа Аҷыдалкаатәи Азинмчызмоуи Ацҳаражәҳәаҩ Аҧсны Аҳәынҭқарра Ахада агәраргагатә бҕьыц ианалшьеит

23.08.2019
Ареспублика Никарагуа Аҷыдалкаатәи Азинмчызмоуи Ацҳаражәҳәаҩ Аҧсны Аҳәынҭқарра Ахада агәраргагатә бҕьыц ианалшьеит

Нанҳәамза 23 рзы Ареспублика Никарагуа Аҷыдалкаатәи Азинмчызмоуи Ацҳаражәҳәаҩ Альба Асусена Торрес-Мехиа Аҳәынҭқарра Ахада Рауль Ҳаџьымба агәраргагатә бҕьыц ианалшьеит.

Рауль Ҳаџьымба: Ҳаҭыр зқәу Ацҳаражәҳәаҩ, гәык-ҧсыкала бзиала шәаабеит ҳәа шәасҳәоит, иагьшәыдысныҳәалоит Аҧсны Аҳәынҭқарраҟны иҟоу Ареспублика Никарагуа Аҷыдалкаатәи Азинмчызмоуи Ацҳаражәҳәаҩ ҳаҭыр змоу, аҭакҧхықәра зцу имиссиа официалла ахацркра. Ҳара иаҳҭахуп, ҳара ҳзы акыргьы аҵанакуеит Шәара шәусура алҵшәа аманы, ҩ-ганктәи аимадарақәа рырҕәҕәара иазкны иҟалар.

Агәра ганы шәыҟазар шәылшоит Аҧсны анапхгара, аминистррақәа, аусбарҭақәа, иара убас ауаажәларра-политикатәи аустә уаажәларреи рганахьала ганрацәала ацхыраара шшәыҭахо. Гәахәарала иазгәасҭарц сҭахуп, ҳусеицура ашықәсқәа рыҩныҵҟала ишьақәгылаз аҳәынҭқаррабжьаратә еизыҟазаашьақәа шьаҭас ишрымаз аиҩызара, агәреибагара, аҳаҭырқәҵара. Арҭ аизыҟазаашьақәа ҳара ҳзы аҵак ҷыда рымоуп.

2008 шықәса цәыббрамза 3 Аҧсны Аҳәынҭқарра аҭоурых ҿыц аҟны, аиашазы, акрызҵазкуа мшны иҟалеит. Абри амш аҽны зхы иақәиҭу аҳәынҭқарра аргыларазы иҳамоу агәазыҳәара иадгылеит ахьыҧшымра амҩа иацу ауадаҩрақәа ртәы бзианы издыруа Никарагуа ажәлар, аҧхьагылаҩ дуӡӡа, Аҧсны аҩыза ду акомандант Хосе Даниель Ортеги Сааведра. Ҳара Аҧсны есқьынгьы иаҳгәалашәоит абри амш, ҳҭоурых аҿы иҟаз аамҭа хьанҭақәа раан иҳашәҭаз адгылара атәы .

Цәыббрамза 10 рзы 10 шықәса ҵуеит Аҧсны Аҳәынҭқарреи Ареспублика Никарагуеи рыбжьара адипломатиатә еизыҟазаашьақәа анышьақәгылаз амш инаркны. 2010 шықәса ҧхынгәымза 10 рзы Аҧсны Ахада Сергеи Багаҧшь официалтә визитла Никарагуа даныҟаз ирыҵаҩын раҧхьатәи ҩ-ганктәи адокументқәа, аҿиара иалагеит аҧсны-никарагуатәи аусеицура иазку аиқәшаҳаҭра-зинтә шьаҭа.

Иҭышәынтәалоу аимадарақәеи, адунеишьақәгылара аган хадақәеи, ҩ-ганктәи аусеицуреи рызҵаарақәа рзы азеиҧш позициеи, иара убас еиҧҟьарада ишьақәгылоу аиҳабырабжьаратәии аусбарҭабжьаратәии еимадарақәеи шьаҭа ҕәҕәаны ироуеит аҧхьаҟатәи аҳәынҭқаррабжьаратә еизыҟазаашьақәа рыҿиара.

Ҳара ахә ҳаракны иаҳшьоит Ареспублика Никарагуа иаҳнаҭо адгылара, арегионтәии жәларбжьаратәии аиҧыларақәа рыҟны, ҷыдала, Еиду Амилаҭқәа Реиҿкаара аҳәаақәа ирҭагӡаны. Аҳәынҭқаррабжьаратә еизыҟазаашьақәа рымшахәаҧштә амҽхак ҭбаахо иалагеит. Ҳара ҳполитикатә диалог аҿиара ҳадгылаҩцәоуп. Ареспублика Никарагуа анапхгара ахьӡала иҭабуп ҳҳәар ҳҭахуп ҳазҭоу ашықәс ҧхынгәымзазы Сандинисттәи ареволиуциаҟны Аиааира агара 40 шықәса ахыҵра иазкыз агәаларшәагатә усмҩаҧгатәқәа рылахәхаразы Аҧсны Аҳәынҭқарра аделегациа Манагуа имҩаҧнагаз авизит лҵшәабзиала аиҿкааразы.

Шәаҳаракыра, ҳара Ареспублика Никарагуа анапхгара иҭабуп ҳәа азаҳҳәар ҳҭахуп еицакрада ҳтәыла ианаҭо азҿлымҳаразы. Ахә ҳаракны иаҳшьоит ҩ-ганктәи аимадарақәа рырҿиараҟны хаҭала Ареспублика Никарагуа Ахада Хосе Даниель Ортеги Сааведра илагаламҭа. Ҳаҭыр зқәу Ацҳаражәҳәаҩ, шәаҧхьаҟа акрызҵазкуа, аҭакҧхықәра зцу аусқәа шьҭоуп. Ҳҳәынҭқаррақәа русеицура амҽхак арҭбаареи арҵаулареи рзы алшарақәа маҷымкәаны иҟоуп. Сара агәра згоит, аҧсны-никарагуатәи ҩ-ганктәи аусеицура ацҵараҟны шәлагаламҭа шдухо. Гәык-ҧсыкала ишәзеиҕьасшьоит аихьӡарақәа, Никарагуа ажәлар – аҭынчреи аизҳазыҕьареи. Даҽазныкгьы бзиала шәаабеит ҳәа шәасҳәоит.

Альба Асусена Торрес-Мехиа (ишеиҭагоу): Шəхаҵкы, ҳаҭыр зқəу Аҳəынтқарра Ахада Рауль Ҳаџьымба, ҳаҭыр зқəу Аиҳабыра, Аҧсны иқəынхо ажəлар зегьы, сара сзы ихьӡуп сыжəлар рымаҵ аура, урҭ ринтересқəа инарымаданы Аҧсны Аҳəынҭқарраҟны аҟазаара. Исҭахуп Аҳəынҭқарра Ахада Даниель Ортегеи Никарагуа Ареспублика Ахада ихаҭыҧуаҩ Росарио Мурильои рыхьӡала гəыла-ҧсыла иаарҭиз асалам шəысҭарц. Шəарҭи ҳареи акыршықəсатəи аҿиарамҩа ҳаиднакылоит, ҳтəылақəа жəашықəса рыҩныҵҟа еиҧшу амҩа ианысит, ҳарҭ гəҭакыс иҳамоуп ҳаимадара шьақәырҕәҕәо, урҭ рыцҵара. Агəра ҳгоит ҳамчқəа анеилаҳҵа, ҧхьаҟа ҳашцо. Аҧсни Никарагуеи зхатəы мҩа ылызхыз ҳəынҭқаррақəоуп, уи аҭынчра ахьӡала ахақәиҭрахь ҳназго амҩоуп. Аус еицаҳаулоит ҳтəылақəа рыҟны аҭынчра ыҟазарц азы. Сара иҭабуп ҳəа шəасҳəарц сҭахуп иахьа ара ҳаҭырла сахьшәыдышәкылаз. Гəахəара дула аус ҳаулоит ҳтəылақəа реимадара арҕəҕəаразы. 

Сара исҭахуп аҧсуа бызшəа сҵарц, мышкы зны аҧсышəала срыҧхьарц шəпоет ду Баграт Шьынқəба иажəеинраалақəа. Сара издыруеит, 1975 шықəсазы чилиатəи апоет ду Пабло Нерудеи иареи шеибадырыз, иара убас  исҭахуп ҳтəылақəа еимаздо цҳаны иҟаларц алитературеи аҟазареи. Ҳарҭ аус еицаҳаулоит аҭынчреи аихьӡарақәеи ралыршаразы. Иҭабуп идуӡӡаны.

2 (2).JPG

1 (1).JPG

3.JPG

 


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org