Аҧсны Аҳәынҭқарра Ахада

 

Ахада Очамчыра араион ахь иусуратә ныҟәара

04.07.2019
Ахада Очамчыра араион ахь иусуратә ныҟәара

Ҧхынгәымза 4 рзы Аҧсны Аҳәынҭқарра Ахада  Рауль Ҳаџьымба  Очамчыра араион ахь аусуратә ныҟәара мҩаҧигеит.

 Очамчыра имҩаҧысит Асоциалтә-економикатә ҿиара ацхрааразы Аинвестициатә  программа ахарџь ала автобусқәа жәаба рыҭара. Жәаба рахьтә хәба ақалақьбжьаратә маршрут Ҧсоу-Очамчыра ала иныҟәалоит, автобуск – Очамчыра ақалақь аҩныҵҟа , ашколтә автобусқәа хҧа Кындыҕ, Џьгьерда, Ҷлоу ақыҭақәа рахь идәықәҵахоит, ашколтә автобуск - Очамчыра ақалақь ахь.

«Араион аҟны 29 школ ахьыҟоу зынӡа 16 автобус рыман. Аҿыцқәа рахьтә акы ақалақь аҟны инрыжьит, ара ҧшь-школк ыҟоуп азы, аспорттә школгьы уахь иналаҵаны, иара убас акака рырҭеит ақыҭақәа Кындыҕ, Џьгьерда, Ҷлоу. Автобус ҿыцқәа даара иаҳҭахын, ари азы Аиҳабыра иҭабуп ҳәа раҳҳәоит», - иҳәеит Очамчыра араион Администрациа ахада ихаҭыҧуаҩ Славик Қәычбериа.  

Аҵареи аҭҵаарадырреи рминистр  Адгәыр Какоба иҳәеит азеиҧшҵараиуратә усбарҭақәа равтопарк арҿыцра иамоу аҵакы:

«Иахьа ҳтәыла азеиҧшҵараиуратә усбарҭақәа равтопарк хаҭәааит иҿыцу  автобусқәа ҧшьба рыла. Урҭ  Очамчыра араион ашколқәа ирызшахоит. Арҭ автобусқәа даара иҳагын. Иҵегьы автобусқәа аараны иҟоуп, егьырҭ араионқәа рыҟны иҟоу апроблемақәагьы ӡбахоит».

Ҷлоу ақыҭа ахада Беслан Сангәлиа иазгәеиҭеит, атранспорт ҿыц ақыҭазы ихәарҭа духоит ҳәа: «Аиашазы, аҭагылазаашьа даара иуадаҩын, ҳқыҭа автобуск азхаӡомызт. Ҩ-втобуск ҟалар уаҳа проблема ҳауӡом».

Аҳәынҭқарра Ахада иара убас Очамчыра ақалақь аҟны АҬАР ахыбра аартра даҭааит. Ахыбра арҿыцратә усурақәа мҩаҧган ара ареспубликатә биуџьет ахарџь ала. 

«Ари ахҭыс аҵак ду амоуп, раҧхьа иргыланы, араион ауааҧсыра рзы. Иахьа АҬАР – ҭбааҭыцәӡа иҟоуп, архив аҵәахразы ауада ыҟоуп, ара аҭаацәалалара ацеремониа ауада ыҟоуп», - лҳәеит  аартра ацеремониаҟны Аиустициа аминистр Марина Ҧлиа.

Ахада Рауль Ҳаџьымба иара убас дахәаҧшит Очамчыра зыргылара мҩаҧысуа ахәыҷбаҳчеи Ҭхьына ақыҭаҟны азеиҧшҵараиуратә школи. 

«Ари аобиект аргылара хацыркын 2017 шықәса аҩбатәи ашықәсбжазы, аусура ахыркәшаразы ҿҳәарас иамоуп  2019 шықәса анҵәамҭа. Ихадоу аусурақәа хыркәшоуп, уажәы аҩныҵҟатәи аусурақәа ирҿуп, ауадабжьаратәи ашәқәа рҿаҵара иалагеит, хара имгакәа асантехника  ашьақәыргыларагьы нап адыркуеит. Иҟаҵатәны инхеит адашьмақәа, аҭыӡқәа рышәра, иара убас аиҿкааратә  усқәак. Амыруга ари аусбарҭаҟны астандартқәа зегьы ирықәшәоит», - абас адырра риҭеит ахәыҷбаҳча аргылара аҭыҧ аҟны АЕ  «Аҧсныргылара» Адиректор хада  Ҭемыр Тҟьебучаа.

Аргыларатә фирма «Вефа-ргылара» адиректор Лаша Быҭәба иҳәеит Ҭхьына ашкол аргыларазы аусурақәа цәыббрамза аказы ихыркәшахараны ишыҟоу: 

«Аргылара ҩышықәса раҧхьа иалагеит, ихыркәшахоит ҳазҭоу ашықәс цәыббрамзазы. Аграфик ҳақәныҟәоит, адашьмақәа ықәҵатәуп, маҷ-саҷқәак аанхеит, урҭгьы цәыббрамзазы ихҳаркәшоит. Ашкол 120 –ҩык аҵаҩцәа, классцыҧхьаӡа 15-20 –ҩык ахәыҷқәа акуа иҟалоит.  13 класс уада ыҟоуп, алабораториа, химиа, физика ауадақәа, аспорттәзал, акрыфарҭа уахь иналаҵаны. Ашкол иаҭаху зегьы аманы, ҳазҭагылоу аамҭазтәи ашколқәа рыстандартқәа ирықәшәо иҟалоит».

Аҳәынҭқарра  Ахада Рауль Ҳаџьмба аусуратә ныҟәара аихшьала ҟаиҵеит:

«Аусурақәа ахыркәшарахь инеиуеит, цәыббрамза 1 азы арҭ ахыбрақәа зегьы русура хыркәшаны ахархәарахь ирыҭатәуп, ахәыҷқәа ашкол ҿыц ахь иааины аҵаратә процесс иалагарц азы. АҬАР атәы ҳҳәозар, ари ахҭыс араион азы аҵак ду амоуп. Акыраамҭа АҬАР иадҳәалоу аусмҩаԥгатәқәа зегьы Очамчыра ақалақь администрациа ахыбраҿы имҩаԥысуан. Иахьа  иҳамоуп иҿыцу  иԥшӡоу ахыбра ҿыц. Аиустициа аминистрра аусзуҩцәа ражәақәа рыла,   ари ахыбра АҬАР иаҵанакуа аусбарҭақәа зегьы ирылукаартә иҟоуп. Уажәшьҭа ҳгәыҕлоит, АҬАР ашҟа ауаа аилыҵра азы акәымкәа, аҭаацәара аԥҵаразы инеилоит ҳәа. Ари акырӡа аҵанакуеит ҳара ҳтәылазы, ҳдемографиатә ҭагылазаашьазы. Ашколқәеи АҬАР-и рхыбрақәа шаҳаҭра руеит, ҳҳәынҭқарра арҭ азҵаарақәа рыӡбара ишаҿу».

1 (7).JPG
1 (9).JPG1 (8).JPG1 (5).JPG


Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT