Аҧсны Аҳәынҭқарра Ахада

 

Ахада Руслан Ҳашыг 60-шықәсаихыҵратәи аиубилеи идиныҳәалеит

14.06.2019

Рашәарамза 14 рзы Аҧсны Аҳәынҭқарра Ахада Рауль Ҳаџьымба Аҧсны Ажурналистцәа реидгыла Ахантәаҩы, ателеканал «Абаза ТВ» Адиректор хада, ауаажәларратә палата алахәҩы, «Ахьӡ-Аҧша» аорден III аҩаӡара занашьоу Ҳашыг Руслан 60-шықәсаихыҵратәи аиубилеи идиныҳәалеит.

Адныҳәалараҟны, ҷыдала, иҳәоуп:

«Ҳаҭыр зқәу Руслан Мкан-иԥа,

Ишәыдысныҳәалоит 60-шықәсашәхыҵратәи аиубилеи!

Шәара акыршықәса лыҵшәабзиала имҩаҧыжәго шәыпрофессионалтә усура аԥсуа журналистика аҿиараҿы лагаламҭа дуны иҟоуп.
Напхгара зышәҭо ихьыԥшым ателехәаԥшратә еилахәыра «Абаза ТВ» уажәшьҭа жәашықәса инареиҳаны ахәаԥшцәа ирыднагалоит зхаҭабзиара ҳараку, изаамҭанытәиу аинформациа.

Ателеилахәыра «Абаза ТВ» аколлектив аҩныҵҟа реидкылара шәылшеит абаҩхатәра змоу, зыпрофессионалтә ҩаӡара есааира иазҳауа аҿар.

Иазгәаҭазар ахәҭоуп, Шәара Ажурналистцәа реидгыла анапхагарахь шәнеижьҭеи, уи аусура амҽхак акыр иҭбаахеит. Шәырҿиаратә усура ианыҧшуеит иара убас қәҿиарала имҩаҧысуа аҳәаанырцәтәи шәколлегацәеи шәареи шәеимадарақәа.

Руслан Мкан-иԥа, шәымшира аҽны ишәзеиӷьасшьоит агәабзиара, агәамч ӷәӷәа, шәнапы злаку аусқәа рҿы аихьӡара ҿыцқәа!»

Возврат к списку

 
 
 
 
© 2015 Аҧсны Ахада Иусбарҭа, Аҟәа ақ., Амҳаџьырқәа рымҩа, 32, АҬЕЛ.: +7 840 226 46 31, АФАКС: +7 840 226 46 31
info@presidentofabkhazia.org
АСАИТ АУС АДУЛАРА - AIT